मेडिकल बाेर्डकाे सिफारिसबिनै भारत गएकाले उपचार खर्च आफैँ ब्यहोर्नुपर्ने बाध्यतामा राष्ट्रपति

मेडिकल बाेर्डकाे सिफारिसबिनै भारत गएकाले उपचार खर्च आफैँ ब्यहोर्नुपर्ने बाध्यतामा राष्ट्रपति

फाइल तस्वीर ।

A+ A A-

राष्ट्रपति रामचन्द्र पौडेलको सचिवालयले भारतमा उपचार गर्दाको खर्च राष्ट्रपतिले नै ब्यहोर्न चाहेको भन्दै १९ वैशाखमा विज्ञप्ति जारी गर्‍यो । तर, राष्ट्रपति पौडेल प्रक्रिया नै पूरा नगरी उपचारका लागि भारत गएकाले उपचार खर्च आफैँले ब्यहोर्नुपर्ने बाध्यता रहेकाे खुलेकाे छ ।

राष्ट्रपति र उपराष्ट्रपतिको सेवा सुविधासम्बन्धी ऐनको दफा ९ मा नेपालमा उपचार हुन नसकेमा मेडिकल बोर्डको सिफारिसमा विदेशमा उपचार गराउँदा लागेको उपचार खर्च सरकारले ब्यहोर्ने उल्लेख छ । तर, राष्ट्रपति पौडेल बोर्डको सिफारिस नलिई उपचारका लागि ६ वैशाखमा भारत उडेका थिए ।

बोर्डका अध्यक्ष डा. सन्तोष पौडेलले राष्ट्रपति कार्यालयबाट सिफारिसका लागि कुनै निवेदन नआएको बताएका छन् । ‘राष्ट्रपतिलाई के भएको हो ? उहाँलाई उपचारका लागि भारत किन लगियो भनेर बोर्ड समितिमा निवेदन आउनुपर्छ । अहिलेसम्म त्यस्ताे निवेदन आएको छैन,’ डा. पौडेलले भने ।

मेडिकल बोर्डमा वीर अस्पतालका निर्देशकको अध्यक्षतामा दुई जना वरिष्ठ चिकित्सक रहने प्रावधान छ । डा. पौडेलका अनुसार, समितिमा निवेदन आएपछि मूल्यांकन गरेर मात्र विदेशमा रिफर गरिने प्रावधान छ । यसरी राष्ट्रपति पौडेलले प्रक्रिया पूरा नगरेका कारण उपचार खर्च आफैँले ब्यहोर्नुपर्ने हुन्छ । तर, उनले बोर्डबाट सिफारिस लिएकाे भए उपचार खर्च सरकारले ब्यहोर्ने व्यवस्था थियो ।

उता, जनस्वास्थ्य ऐन २०७५ को दफा ३० मा कुनै पनि व्यक्तिले विदेशमा उपचार गरेमा सरकारले खर्च उपलब्ध नगराउने भनिएको छ । ‘कुनै पनि व्यक्तिलाई विदेशमा उपचार गर्नुपर्ने भएमा उपचारका लागि लाग्ने खर्च नेपाल सरकारबाट उपलब्ध गराइने छैन,’ ऐनमा भनिएको छ । कांग्रेस महामन्त्री एवं सांसद गगनकुमार थापाले राष्ट्रपतिले दिल्लीमा भएको स्वास्थ्य उपचारको खर्च आफैँले तिर्नुपर्ने बताउँदै आएका छन् ।

राष्ट्रपतिकाे उपचार खर्च विवादमा गगन सचिवालयले दियाे थप प्रस्टीकरण

राष्ट्रपतिको उपचार नेपालमा सम्भव थिएन ?

त्रिवि शिक्षण अस्पतालका अनुसार राष्ट्रपति पौडेलको छातीमा पानी जमेका कारण थप परीक्षण र उपचारका लागि भारतको नयाँ दिल्लीस्थित एम्स अस्पताल लगिएको थियो । राष्ट्रपति पौडेललाई श्वासप्रश्वाससम्बन्धी पनि समस्या छ । तर, यो रोगको उपचार नेपालमै सम्भव रहेको चिकित्सकहरू बताउँछन् ।

राष्ट्रपतिको स्वकीय सचिवालयले भने चिकित्सककै परामर्शमा भारत लगिएको जिकिर गर्दै आएकाे छ । भारतको एम्स अस्पतालबाटै छाती रोगसम्बन्धी विशेषज्ञता हासिल गरेका तीन चिकित्सक वीर अस्पतालमै कार्यरत छन् । वीर अस्पतालमा छातीको उपचारका लागि छुट्टै विभागसमेत छ । ‘यही विभागमा राष्ट्रपतिको उपचार सम्भव थियो,’ वीर अस्पतालका एक चिकित्सकले भने, ‘अत्याधुनिक उपकरण पनि छ । तैपनि भारत लगियाे ।’

शिक्षण अस्पतालमा छातीरोग विशेषज्ञ डा. सन्तकुमार दास र डा. निरज बम छन् । डा. बम राष्ट्रपति पौडेलका निजी चिकित्सकसमेत हुन् । तर, राष्ट्रपतिलाई भारत लैजानुमा उनका निजी चिकित्सककै जोडबल देखिएकाे छ । राष्ट्रपति वा उपराष्ट्रपति अस्पताल भर्ना भई उपचार गराउँदा कुरुवा बस्नुपर्ने भएमा कुरुवा खर्चबापत तीन जनासम्मको खर्च सरकारले उपलब्ध गराउने प्रावधान छ । राष्ट्रपति पौडेलसँग उनका निजी चिकित्सक डा. बम, पौडलकी श्रीमती, छोरा चिन्तन पौडेल र कान्छी छोरी भारत गएका थिए ।

पौडेललाई कस्ताे छ अहिले ?

पेटमा समस्या देखिएपछि राष्ट्रपति पौडेल गत १८ चैतमा त्रिवि शिक्षण अस्पताल महाराजगञ्ज पुगेका थिए । त्यो बेला उनलाई एन्टिबायोटिक चलाइएको थियो । तर, फेरि ५ वैशाखमा समस्या देखिएपछि थप उपचारका लागि त्रिवि शिक्षण अस्पताल भर्ना भए ।

अस्पताल भर्ना भएका पौडेलको उपचार सम्भव नभएको भन्दै थप उपचारका लागि ६ वैशाखमा श्रीएयरको एयर एम्बुलेन्समार्फत भारतको नयाँ दिल्लीस्थित अल इन्डिया इन्स्टिच्युट अफ मेडिकल साइन्सेस (एम्स) लगिएको थियो । उपचार गरी उनी १७ वैशाखमा स्वदेश फर्किएका छन् । हाल उनको स्वास्थ्य अवस्था सामान्य रहेको निजी चिकित्सक डा. बमले बताए । ‘उहाँको स्वास्थ्य अहिले सुधार हुँदैछ,’ उनले भने ।

सम्बन्धित समाचार