नेपालको एसिया कप सपनाः २००२ कै नियति दोहोरिने चिन्ता

A+ A A-

नेपाल एसिया कप क्रिकेट प्रतियाेगितामा पुगेसँगै नेपाली खेलाडीको वर्षौदेखिको सपना पूरा हुने अवस्था आएकाे छ । भारत र पाकिस्तान जस्तो विश्वविजेता टिमसँग खेल्न नेपालले वर्षौंदेखि तपस्या गरिरहेकाे छ । एसिया कपका लागि छनाेट भएसँगै त्याे सपना पूरा हुने चरणमा पुगेकाे बेला आएका समाचारहरू भने नेपालका लागि सुखद् छनैनन् । त्याे सपनामाथि तुसारापात भइदिने हो कि भन्ने चिन्ता बढेको छ ।

लाखौँ नेपालीलाई यतिबेला खुसी बनाइरहेको एउटा उपलब्धि हो, नेपालले एसीसी प्रिमियर कपको उपाधि जित्दै एसिया कपमा पुग्नु ।

हिमाल झै अटल यो झुकेन यो कहिल्यै
लत्रेन यो कहिले जंगी निशान हाम्रो
यो जन्मदै जगतमा कयौं प्रहार आए
साम्राज्य दुई हारे हारेन शान हाम्रो
रातो र चन्द्र सुर्य...

यही गीत यतिबेला सबैको मुखमा गौराम्वित भावसहित झुण्डिएको छ । सबैले गाइरहेका छन्, ‘साम्राज्य दुई हारे हारेन शान हाम्रो ।’ देशमा व्याप्त भ्रष्टाचार, अनियमितता, अव्यवस्थित, अस्थिर सरकार, कालोबजारी, आर्थिक संकट लगायतबाट आजित भएका जनतालाई क्रिकेटले उमंग दिएको छ । एसीसी प्रिमियर कपको उपाधि जित्नुभन्दा पनि नेपालले एसिया कपमा भारत र पाकिस्तानसँग खेल्ने कुराले नेपालीहरू हर्षित छन् ।

राष्ट्र गीतबाट खेल सुरू गर्दै विजयीसँगै रातो र चन्द्र सुर्य गाउने टिमका कप्तान रोहितकुमार पौडेलमा खुसीकाे सीमा छैन । ‘हामी सानैदेखि नै भारत र पाकिस्तानको खेल हेर्दै आइरहेका छौँ । भारत र पाकिस्तानसँग खेल्नु भनेको हाम्रो लागि एकदमै ठूलो अवसर हो । गौरव गरिरहेको छु’, रोहित सुनाउछन् ।

एसीसी प्रिमियर कपकाे सेमिफाइनल र फाइनलमा लगातार दर्शक भिजेर मैदानमा बसिरहे । सोमबारदेखि मंगलबारसम्म लम्बिएको खेलमा दर्शकको उपस्थिति भने मैदानले नै धान्न नसक्ने गरी थियो । हजारौँ दर्शक र समर्थकलाई साक्षी राखेर नेपाल एसिया कपमा पुग्दा खेलाडीसँगै सिंगो देश हर्षित भयाे ।

कप्तान रोहित भन्छन्, ‘२०१४ को विश्वकपले हामी सबैलाई प्रेरणा दिएको थियो । पारस र ज्ञानु दाइलाई हेरेर हामीलाई प्रेरणा मिलेको थियो । अबको एसिया कपले पनि सबैलाई प्रेरणा दिनेछ ।’

यता, सन्दीप लामिछाने पनि नेपाली क्रिकेट अर्को अध्यायमा पुगेको तर्क गर्छन् । ‘यो हाम्रो लागि एकदमै ठूलो उपलब्धि हो । हामी एउटा चरण पार गरेर अर्को चरणमा पुगेका छौँ । फेरि पनि हामी फेर्केर हेर्न चाहन्नौँ’, सन्दीपले भने ।

देशमा खुसी छाएको छ । सबै खेलाडीले भारत र पाकिस्तानसँग खेल्ने सपना देखिरहेका छन् । अन्तर्राष्ट्रिय रूपमै नेपालको चर्चा भइरहेको छ । हार्न बिर्सेको नेपाली क्रिकेट टिमले पाएको एकपछि अर्को सफलताले सबैलाई आकर्षित गरिरहेको छ ।

तर, नेपाली क्रिकेट टिमलाई फेरि उही २००२ को नियति त दोहोरिने होइन ? भन्ने चिन्ता पनि छ । एसिया कपका लागि नेपाल छनाेट भएकाे याे पहिलाेपटक हाेइन । २००२ मा छनाेट भएर पनि खेल्न नपाएकाे भुल्नलायक विगत छ नेपालसँग । त्यतिबेला नेपालले भारत र पाकिस्तानसँग खेल्न नपाउनुकाे कारण हाे प्रतियाेगिता नै रद्द हुनु । अहिले पाकिस्तानले आयाेजना गर्ने तय भइसकेकाे एसिया कप २०२३ माथि पनि कालाे बादल मडारिरहेकाे छ । त्यसैले नेपालीकाे चिन्ता बढेकाे हाे ।

सन् २००२ मा सिंगापुरमा एसीसी ट्रफिको उपविजेता हुँदै नेपाल एसिया कपमा प्रवेश गरेको थियो । त्यो एसीसी ट्रफिको फाइनलमा नेपाल यूएईसँग ६ विकेटले पराजित भए पनि पहिलोपटक एसिया कपमा पुग्यो । तर २००२ मा एसिया कप नै भएन ।

नेपालले टेस्ट मान्यता प्राप्त देशसँग खेल्ने मौका गुमायो । त्यो बेला ‘कार्गिल’ युद्धका कारण भारत र पाकिस्तानबीचको सम्बन्ध सामान्य नरहेकाले एसिया कप हुन सकेन । जसकाे मूल्य नेपालले चुकाउनु पर्‍याे । एसिया कप खेल्न नेपालले २१ वर्ष पर्खनु परेकाे छ । तर प्रतियाेगिता हुने नहुने निश्चित भइसकेकाे छैन । नेपाली खेलाडी त्यो बेला पनि अहिलेकै जसरी खुसी मनाइरहेका थिए । तर त्यो खुसी एकाएक कार्गिल युद्धकाे बाछिटामा विलिन भयो ।

अहिले फेरि भारत र पाकिस्तानबीच राजनीतिक कारण सम्बन्ध चिसिँदै गएको छ । भारत कुनै पनि हालतमा पाकिस्तानमा एसिया कप नहोस् भन्ने अडानमा छ । भारतले आफ्नो टिम पाकिस्तानी भूमिमा क्रिकेट खेल्न नपठाउने भनिसकेको छ । यता, पाकिस्तानले भने भारतको खेल अन्य देशमै गराएर अरू देशको खेलमा आफ्नै देशमा गराउने प्रस्ताव गरेको छ । तर भारत भने यो प्रस्तावमा पनि सहमत छैन ।

यसरी दुई देशबीचको तनावका कारण एसिया कप नै नहुन पनि सक्ने सम्भावना छ । यसबारे नेपालका कप्तान रोहित भन्छन्, ‘धेरै परिश्रम गरेका छौँ । जहाँ भए पनि हाम्रो लागि एसिया कप होस् भन्ने हो ।’ उनी थप्छन्, ‘भारत र पाकिस्तानसँग खेल्दा विश्वले हेर्नेछ । यसले गर्दा व्यक्तिगत रुपमा पनि त्यहाँ हामीले राम्रो गर्दा फ्रेन्चाइज लिगहरूमा पनि हामीले मौका पाउँछौँ ।’

सन् २०२४ मा भारतमा आम निर्वाचन हुँदैछ । अहिलेका प्रधानमन्त्री नरेन्द्र मोदी फेरि पनि चुनाव जित्नका लागि राष्ट्रभक्ति देखाउन पाकिस्तानमा आफ्नो टिम नपठाउने अडानमा रहेकाे भन्ने मतहरू आइरहेको छ । त्यसमाथि क्रिकेटमा भारतकाे दबदबा छ । एसिया कप आयाेजना गर्ने एसियन क्रिकेट काउन्सिलका अध्यक्ष भारतका जय शाह छन् । उनी भाजपा नेता तथा गृहमन्त्री अमित शाहका छाेरा हुन् । त्यसैले भारतले इग्नाेर गरेर एसिया कप हुने सम्भावना छैन ।

प्रकाशित मिति: बुधबार, वैशाख २०, २०८० १७:५५