पाकिस्तान र भारतसँग खेल्ने नेपालकाे सपना, अब एक कदम टाढा

A+ A A-

एसीसी प्रिमियर कप क्रिकेट प्रतियोगिताको फाइनलमा सोमबार घरेलु टिम नेपालले यूएईसँग प्रतिस्पर्धा गर्दैछ । यो फाइनल नेपाली क्रिकेटका लागि एउटा खेल मात्रै होइन, वर्षौंदेखि गर्दै आएको तपस्या पूरा गर्ने एउटा मूल ढोका पनि हो ।

नेपाली खेलप्रेमी सबैले भारत र पाकिस्तानको सिनियर टिमसँग क्रिकेट खेलेको हेर्ने तपस्या वर्षौंदेखि गरिरहेका छन् । खेलाडीले पनि विश्वविजेता टिम भारत र पाकिस्तानसँग खेल्ने सपना बुनिरहेका छन् । त्यो सपना र तपस्याबाट नेपाल केवल एक कदम मात्रै पछि छ । सोमबार हुने फाइनलमा नेपालले यूएईलाई पराजित गरे, एसिया कपमा भारत र पाकिस्तानसँग खेल्ने सपना पूरा हुनेछ ।

सोमबार पानी परिरहे के हुन्छ ?

यो प्रतियोगितालाई पानीले निकै खल्लो बनाइरहेको छ । समूह चरणका खेलहरू हुँदादेखि नै पानी पर्न थालेको नेपालमा अझै केही दिन वर्षा हुने सम्भावना छ ।

जसको असर फाइनलमा पनि देखिने निश्चितजस्तै छ । यसअघि सेमिफाइनलका खेल र तेस्रो स्थानका लागि भएको ओमान र कुवेतबीचको खेल वर्षाले प्रभावित बन्यो । तर, फाइनलका लागि भने एसियन क्रिकेट काउन्सिल (एसीसी) ले ‘रिजर्भ डे’ राखेको छ ।

सोमबार खेल नभए मंगलबार हुनेछ । तर, मंगलबार पनि समयमै खेल हुन नसके अपराह्न ४ः४० बजेमा सुपर ओभर हुनेछ । यो सुपर ओभरबाट पनि खेलको छिनोफानो नभए एकदिवसीय अन्तर्राष्ट्रिय वरीयताका आधारमा विजेताको टुंगो लाग्नेछ ।

वर्षाका कारण सुपर ओभर पनि हुन नसके विजेता घाेषणा प्रतियोगिताको प्रदर्शनका आधारमा हुन्छ कि आईडीआईको आधारमा भनेर अझै पनि धेरैलाई दोधार नै छ । तर नेपाल क्रिकेट संघ (क्यान) का क्रिकेट म्यानेजर विनोद दासले ओडीआई वरीयताको आधारमा विजेताकाे टुंगो लाग्ने बताए ।

नेपाल विश्व वरीयतामा १४औँ स्थानमा छ । यूएई १९औँ स्थानमा छ । यसकारण सुपर ओभरबाट पनि खेलको टुंगो नलागे ओडीआई वरीयताका आधारमा नेपाल विजेता हुनेछ । र पाकिस्तानले यसै वर्षकाे सेप्टेम्बर २-१७ सम्म आयाेजना गर्ने एसिया कपका लागि छनाेट हुनेछ । एसिया कपका लागि समूह विभाजन भइसकेकाे छ । जसमा एसीसी प्रिमियर कपकाे विजेता, भारत र पाकिस्तान एउटै समूहमा छन् ।

यूएईभन्दा नेपाल अघि

नेपाल जस्तो टिम हो यूएई पनि त्यस्तै प्रवृत्तिको टिम हो । नेपालका कुनै पनि खेलाडी खेल विजेताका रुपमा उदाउन सक्छन् । खराब प्रदर्शन गरिरहेको बेला १०औँ नम्बरमा आएका ब्याटरले पनि नेपालाई सम्हाल्न सक्छन् । यस्तै, खुवी यूएईका खेलाडीहरूमा पनि छ । यसकारण फाइनल खेल निकै रोमाञ्चक र प्रतिस्पर्धात्मक हुने निश्चित छ ।

विगतका नतिजालाई नियाल्ने हो भने यूएईविरुद्ध नेपाल हावी भएको छ । पछिल्लो पाँच खेललाई नियाल्दा यूएईसँग नेपालले एक खेलमा मात्रै हारेको छ । बाँकी चार खेलमा नेपालले यूएईविरुद्ध सानदार जित निकालेको छ । यसकारण पनि यूएईविरुद्ध नेपाली खेलाडी उच्च मनोबलमा हुनेछन् ।

पछिल्लो पाँच खेलमध्ये तीन खेल नेपालले टीयू क्रिकेट मैदानमा जितेको छ । उसैको घरेलु मैदानमा नेपालले एक खेल जितेको छ भने एक खेलमा हार ब्यहोरेको छ ।

ओपनिङ ब्याटिङको चिन्ता

लगातार जित निकाल्दै फड्को मारिरहेको नेपाली क्रिकेट टिमको केही कमजोर पक्ष भने छोपिएको छ । त्यो कमजोर पक्ष भनेको नेपालको ओपनिङ ब्याटिङ नै हो ।

कुशल भुर्तेल र आसिफ शेखले नेपालको ब्याटिङ ओपनिङ गर्दै आएका छन् । कुवेतविरुद्धको सेमिफाइनलमा नेपालले राम्रो सुरुवात गर्‍याे । ७७ रन हुँदा पहिलो विकेट गुमायो । तर यही प्रतियोगिताका अरु खेलमा नेपालको ओपनिङ जोडी जम्न सकेकाे छैन ।

कमजोर कतारविरुद्ध ६८ रनको जित निकाल्दा पनि नेपालले तीन रनमै पहिलो विकेट गुमाएको थियो । ओमानविरुद्ध ८४ रनको सानदार जित निकाल्दा त झनै नेपालको ओपनिङ अहिलेसम्मकै झुर भयो । नेपालले शून्यमै कुशल भुर्तेल र आसिफ शेखलाई गुमायो । मलेसियाविरुद्धको खेलमा पनि नेपालले पाँच रन जोड्दा पहिलो विकेट गुमाएको थियो ।

पछिल्लो चार खेलमध्ये तीन खेललाई हेर्ने हो भने नेपालको ओपनिङ ब्याटिङ झुर छ । यो प्रतियोगिताभन्दा अघि नेपालले पछिल्लो १२ एकदिवसीय अन्तर्राष्ट्रिय खेलमध्ये ९ खेलमा एकदमै खराब सुरुवात गरेको थियो ।

यूएई एकदमै बलियो र सन्तुलित टिम हो । कुनै पनि बेला यूएईका प्रत्येक खेलाडीमा खेल जिताउन सक्ने क्षमता छ । यूएईलाई पराजित गर्न नेपालले राम्रो सुरुवात गर्नै पर्छ । नेपालले राम्रो सुरुवात गरेको खण्डमा जित्ने सम्भावना अधिक रहन्छ ।

त्यसो त, कुशल भुर्तेल, आसिफ शेख, भीम सार्की, रोहितकुमार पौडेल, कुशल मल्ल, आरिफ शेख र दीपेन्द्रसिंह ऐरी नेपाली ब्याटिङका खम्बा हुन् । करण केसी, सोमपाल कामी र सन्दीप लामिछानेले पनि नेपालको स्कोरलाई थप उचाईमा लान सक्छन् ।

वृत्या, वासिम र आसिफको डर, सन्दीप, ललित र सोमपालको भर

नेपालका लागि यूएईका वृत्या अरभिन्द, कप्तान मोहम्मद वासिम र आसिफ खान खतराको घण्टी सावित हुन सक्छन् ।

नेपालले यी तीनै खेलाडीलाई सस्तैमा समेटेको खण्डमा यूएईलाई कम स्कोरमै समेट्न सक्छ । तर यी तीन खेलाडीमध्ये कुनै एक खेलाडी मात्रै चलेको खण्डमा नेपालविरुद्ध यूएईले विशाल रन बनाउन सक्छ । यसकारण नेपाली बलरलाई मुख्यगरी यी तीन खेलाडीलाई सस्तैमा आउट गर्न निकै चुनौती छ ।

त्यसो त, वृत्या निकै लयमा रहेका छन् । उनले यो प्रतियोगितामा मात्रै ४४६ रन बनाएका छन् । जुन नेपालबाट यो प्रतियोगितामा सर्वाधिक रन बनाएका कुशल मल्लको भन्दा २०८ रनले बढी हो । कुशलले २३८ रन बनाएका छन् ।

कप्तान मोहम्मद वासिम पनि उत्तिकै प्रभावशाली ब्याटर हुन् । उनले यही प्रतियोगितामा सिंगापुरविरुद्ध १६० रन बनाएका थिए । आसिफ खान पाँचौँ नम्बरमा ब्याटिङ गर्न आउँछन् । विष्फोटक ब्याटिङ गरेर आफ्नो टिमलाई जिततर्फ लान सक्ने खेलाडी हुन् । यसअघि नेपालविरुद्ध आईसीसी क्रिकेट विश्वकप लिग टु को अन्तिम खेलमा आसिफले विष्फोटक ब्याटिङ गर्दै शतक बनाएका थिए । आर्यन लाक्रा, रमिज शाहजाददेखि अलराउण्डर रोहन मुस्तफा र आयन अफ्जल खान पनि नेपाली बलरमाथि हावी हुन सक्छन् ।

तर, नेपालसँग दुर्लभ विश्व कीर्तिमान राखेका खेलाडीदेखि स्टार बलरसम्म छन् । सन्दीप लामिछाने नेपालका मुख्य हतियार हुन् । यूएईको मुख्य लक्ष्य नै सन्दीपको बलमा टिकेर खेल्ने हुनेछ । सुरुमै तीव्र गतिका बलर सोमपाल र करणले नेपाललाई राम्रो सुरुवात दिलाए पावर प्लेपछि सन्दीप र ललितनारायण राजवंशीको जोडीले यूएईको ब्याटरलाई धरापमा पार्न सक्छन् ।

प्रकाशित मिति: आइतबार, वैशाख १७, २०८० १९:०८