बलिउड सिनेमालाई सिँगार्ने अञ्जन गजुरेल (भिडियो)

A+ A A-

कुनै पनि सिनेमा निर्माणअघि लेखकले कथा लेख्छ । कथाको परिवेश कस्तो छ ? पात्रको पेरिफेरी कस्तो छ ? लेखकको परिकल्पनालार्ई निर्देशकले दृश्यका रूपमा परिकल्पना गर्छ । अनि, निर्देशकको परिकल्पनालाई दुुरुस्तै आममान्छेलाई कसरी अनुभूूत गराउने ? यो जिम्मेवारीचाहिँ कला निर्देशकको हुन्छ ।

निर्देशकले देखेको दृश्य क्यामेरामा कैद गर्दा कतिपय अवस्थामा ठ्याक्कै दृश्य नआउन पनि सक्छ ।

उदाहरणका लागि कुनै पात्रलाई बजारको दृश्यमा देखाउनुपर्नेछ । तर, बजारमै सुटिङ गरे पनि क्यामेराले दृश्य खिच्दा ठ्याक्कै पात्रको पृष्ठभूूमि बजारमा जस्तो नदेखिन सक्छ । त्यसलाई कसरी क्यामेराबाट ठ्याकै देखाउने ? यो महत्त्वपूर्ण हुन्छ ।

अर्थात् लेखकले भन्न खोजेको विषयलाई न्यूूनतम खर्चमा जीवन्तता दिने कला निर्देशकको कुशलतासँग जोडिएको हुन्छ । यसमै सिनेमाको सफलता पनि लुकेको हुन्छ ।

हलिउडमा हेर्ने हो भने निर्देशकपछि प्रोडक्सन म्यानेजर अथवा कला निर्देशकको सबैभन्दा ठूूलो भूूमिका रहने गर्छ । बलिउडमा भने निर्देशक र डीओपीपछि प्रोडक्सन म्यानेजर अर्थात् कला निर्देशकको भूूमिका सबैभन्दा महत्त्वपूर्ण हुने गर्छ ।

यही भूमिकामा देखिन मिथिला नगरी भनिने जनकपुरको लालगढका अञ्जन गजुरेल फाइन आर्ट्स पढ्न बुम्बई पुगे । त्यसबेला उनले फाइन आर्ट्समा पनि भीएफएक्समा राम्रो सम्भावना देखे । तर, उक्त विषयको अध्ययन धेरै खर्चिलो छ । त्यही भएर पढाइ खर्च जुटाउन बम्बईको चलचित्र क्षेत्रमा प्रवेश गरे । रजत पद्धारको ‘कुसुम कसौटी’ टेलिभिजन कार्यक्रममार्फत सहायक कला निर्देशकका रूपमा कला निर्देशनको यात्रा सुरु गरे ।

त्यस समय कला क्षेत्रमै अध्ययन गरेर आउने मान्छेको संख्या थोरै थियो, जसमध्येमा उनी पनि एक थिए । तर, सिनेमा क्षेत्रको कला निर्देशनमा गजुरेल नयाँ थिए । पद्धारले गजुरेलकोे काम गर्ने शैलीलाई मन पराए । कुसुम कसौटीपछि उनले गर्ने हरेक कार्यक्रममा गजुरेललाई बोलाउन थाले । सहयोग माग्न थाले । त्यहीँबाट कला निर्देशकको रूपमा करियर सुरु भएको गजुरेल बताउँछन् ।

लगत्तै ‘एसराज फिल्म्स’को ‘काबुल एक्सप्रेस’ सिनेमामा काम गर्ने मौका मिल्यो । ‘काबुल एक्सप्रेस’ छायाङ्कन गर्न अफगानिस्तानमा ५२ दिन लागेको थियो ।

‘काबुल एक्सप्रेसको सुटिङ निकै गाह्रो तरिकाले भयो । त्यहाँ ज्यान नै जोखिममा राखेर सुटिङ गर्नुुपर्‍यो । गोलीसमेत चलेको थियो । हामीेले कविर खानसँग सुट गरेका थियौँ,’ गजुरेल सम्झिन्छन् ।

उनले थपे, ‘मेरो सेटमा आएका मान्छेहरू मैले बनाएका प्रप्सहरू ओहो ! यो सक्कली नै हो ? भन्दै छामेर हेर्छन् । त्यसपछि फ्लेक्स हो भनेर ठम्याउँछन् ।’

विल यु म्यारी मी ?, आगया हिरो लुडोलगायत थुप्रै बलिउड सिनेमामा काम गरेको अनुभव उनीसँग छ ।

हाल ‘सत्य प्रेम की कथा’ नामक सिनेमाको सुटिङ सकेर अर्को अनुराग बासुको ‘मेट्रो इन दिनो’ नामक सिनेमामा काम गरिरहेका गजुरेलले ब्रेकको समयमा नेपाल आएको शिलापत्रलाई बताए ।

उनले अमिताभ बच्चन, शारुख खान, अमिर खानलगायतका अधिकांश भारतीय चर्चित कलाकारसँग काम गरिसकेका छन् । उनलाई सलमान खानसँग चाहिँ काम गर्ने मौका मिलेको छैन ।

उसो त उनले उनले नेपाली कला क्षेत्रमा पनि काम नगरेका भने होइनन् । स्वर्गीय श्रीकृष्ण श्रेष्ठ बम्बईस्थित उनकै घरमा पुगेर सहयोग मागेपछि उनले आफ्नो सेटमा लाइटबाहेक सित्तैँमा उपलब्ध गराइदिएका थिए ।

त्यसबाहेक ग्यालेक्सी टेलिभिजनको ‘सारेगम लिटिल च्याम्प्स’ र ‘क्राइम पेट्रोल’को सेट पनि गजुरेलले नै तयार गरेका हुन् ।

सिनेमा क्षेत्रको कला निर्देशनमा पछिल्लो समय आउन चाहनेहरूका लागि धेरै अवसर रहेको गजुरेलको भनाइ छ । तथापि, यो क्षेत्रमा लाग्न केवल कला मात्र जानेर नपुग्ने उनी बताउँछन् ।

‘विषयवस्तुभन्दा बाहिर सोच्ने क्षमता भएका व्यक्ति जसले संसारलाई केही नयाँपन दिन सक्छन्, उनीहरूका लागि यो क्षेत्र अत्यन्तै राम्रो छ’, गजुुरेलले भने, ‘त्यसका लागि आर्किटेक्ट, इन्टेरियर र फाइन आर्ट्स विषय सबैभन्दा सहयोगी हुन सक्छ ।’

प्रकाशित मिति: आइतबार, वैशाख १७, २०८० २०:००