कतारविरुद्ध सहज जित निकाल्दै नेपाल समूह ‘ए’ को विजेता

A+ A A-

घरेलु टिम नेपाल एसीसी प्रिमियर कप क्रिकेट प्रतियोगिताको समूह ‘ए’ को विजेता बनेको छ । एक खेलअघि नै सेमिफाइनलमा पुगेको नेपालले कतारलाई ६८ रनले पराजित गर्दै समूह ‘ए’ को विजेता बनेको हो ।

नेपालले दिएको १५८ रनको चुनौती पछ्याउँदै ब्याटिङ गरेको कतारले राम्रो ब्याटिङ गर्न सकेन । नेपाली बलरको किफायती बलिङसामु कतारका कुनै पनि ब्याटर खुलेर खेल्न सकेनन् । कतारले २५.१ ओभरमा सबै विकेटको क्षतिमा ८९ रन मात्रै बनाएपछि नेपालले सहज जित निकालेको हो ।

नेपालका लागि सन्दीप लामिछानेले पाँच विकेट लिए । उनले ९.१ ओभरमा तीन मेडन विकेट राख्दै १४ रन खर्चिर्एर पाँच विकेट लिएका हुन् । सन्दीपले खुर्राम शाहजादलाई १५, जाहिर इब्राहिमलाई १५, गयन मुनविराले चार, मोहम्मद रिजलानलाई चार र भलिद भितिललाई तीन रनमा आउट गराए ।

त्यस्तै, सोमपाल कामीले पनि तीन विकेट लिए । सोमपालले इमाल लियानागलाई ६, इक्रामउल्लाह खानलाई पाँच र मोहम्मद तानविरलाई शून्यमै बोल्ड आउट गराए । ललितनारायण राजवंशीले दुई विकेट लिए । उनले अमिर फारुकलाई १४ र काम्रान खानलाई आठ रनमा आउट गराएका थिए ।

यसअघि टीयू क्रिकेट मैदानमा टस हारेर पहिले ब्याटिङ गरेको नेपालले ४०.३ ओभरमा सबै विकेटको क्षतिमा १५७ रन बनाएपछि कतारले सामान्य चुनौती पाएको हो । नेपालका लागि सन्दीप लामिछानेले सर्वाधिक ४२ रन बनाए । उनले ५८ बलमा ६ चौका प्रहार गरे ।

नेपालका लागि कप्तान रोहितकुमार पौडेल २७, आसिफ शेख १९, दीपेन्द्रसिंह ऐरीले १२, सोमपाल कामी ११, आरिफ शेख ११, गुल्सन झाले सात, भीम सार्की ६, कुशल मल्ल तीन, कुशल भुर्तेल दुई र ललितनारायण राजवंशीले एक रन बनाए । कतारका अमिर फारुकले चार विकेट लिए । त्यस्तै, ओवाइस अहमदले ३ विकेट लिए । गायन मुनाविराले दुई विकेट लिए ।

एकपछि अर्को विकेट गुमाएको नेपालले कतारका बलरविरुद्ध खुलेर खेल्न सकेन । नेपालका कुनै पनि ब्याटरले उच्च रन बनाउन नसक्दा कतारले सामान्य चुनौती पाएको हो । १.२ ओभरमा तीन रन बनाउँदा पहिलो विकेटको रुपमा कुशल भुर्तेललाई गुमाएको नेपालले ९ रन हुँदा दोस्रो विकेटको रुपमा भीम सार्कीलाई गुमाएको थियो । त्यस्तै, ५७ रन हुँदा तेस्रो विकेट गुमाएको नेपालले ६२ रन हुँदा चार र ६९ रन हुँदा पाँच विकेट गुमाएको थियो । त्यसपछि छैटौँ विकेट नेपालले ८४ रनमा गुमाएको थियो । १०२ मा सातौँ र १०५ रन हुँदा आठौँ विकेट गुमाएको नेपालले १११ रन हुँदा नवौँ विकेट गुमायो । तर, १०औँ विकेटका लागि सन्दीप र ललितनारायण राजवंशीले ४६ रनको साझेदारी गर्दै टिमलाई उकास्ने प्रयास गरे ।

समूह ‘ए’ बाट नेपाल विजेता बन्दै सेमिफाइनलमा पुग्दा ओमान उपविजेता बनेर सेमिफाइनलमा पुगेको छ ।

प्रकाशित मिति: बिहीबार, वैशाख १४, २०८० १५:१०