राष्ट्रपतिमा दोहोरिन चाहेका ८० वर्षे बाइडेनलाई अमेरिकीकाे सुझाव- उमेरदारलाई मौका दिएर तपाईं आराम गर्नुहोस्

राष्ट्रपतिमा दोहोरिन चाहेका ८० वर्षे बाइडेनलाई अमेरिकीकाे सुझाव- उमेरदारलाई मौका दिएर तपाईं आराम गर्नुहोस्

A+ A A-

भनिन्छ, समय कसैका लागि रोकिनेवाला छैन ।

अमेरिकी राष्ट्रपति ८० वर्षे जो बाइडेनलाई यो कुरा दुःखको कारण बन्न सक्छ । नभए, उनले मतदातालाई आफ्नो उमेर कुनै मुद्दा नै होइन भनेर भरोसा दिलाउनुपर्नेछ, जुन सजिलो छैन ।

गत मंगलबार बाइडेनले आफू थप चार वर्ष ह्वाइट हाउसमा रहने चाहना व्यक्त गरे । तर, एबीसी न्युजको एक पोलबाट के थाहा भएको छ भने, अमेरिकीहरू ज्येष्ठ बाइडेनको कुरा सुनेर सन्तुष्ट छैनन् ।

सर्भेका अनुसार, ७० प्रतिशत अमेरिकी र ५१ प्रतिशत डेमोक्रेट्स बाइडेनले फेरि चुनाव लड्न नहुने मत राख्छन् । उमेरका कारण उनी फेरि राष्ट्रपति बन्ने दौडमा लाग्न नहुने उनीहरूको भनाइ छ ।

अमेरिकी इतिहासमा बाइडेन सबैभन्दा ज्येष्ठ राष्ट्रपति हुन् । उनले फेरि चुनाव जिते भने आफ्नो दोस्रो कार्यकालको सुरुवाती समयमै उनी ८२ वर्षका हुनेछन् । कार्यकाल सकिँदासम्म उनको उमेर हुनेछ ८६ वर्ष ।

कमला ह्यारिसको सहारा ?

८२ वर्षको कुनै व्यक्तिको औसत बाँकी उमेर ६.७७ वर्ष हुने अमेरिकी सरकारको आकडाले देखाउँछ । यो उमेरका कुनै व्यक्तिबारे आठ प्रतिशत आशंका आउँदो १२ महिनामा उसको मृत्यु हुन सक्ने हुन्छ ।

जुन भिडियोमा बाइडेनले ‘व्यक्तिगत स्वतन्त्रता’को कुरा गर्दै रिपब्लिकन विरोधीबाट खतराका बारेमा बोले । त्यसमा उनको उमेरबारे चर्चा थिएन । यति मात्र होइन, भडियोमा प्रयोग गरिएको फुटेजमा उनी जगिङ गर्दै संगीतको आनन्द लिइरहेका देखिन्छन् ।

यो भिडियोमा उपराष्ट्रपति कमला ह्यारिसलाई पनि प्राथमिकताका साथ देखाइएको छ । बाइडेनले काम गर्न नसक्ने अवस्थामा कमला ह्यारिसले राष्ट्रपतिको जिम्मेवारी सम्हालनुपर्ने हुन्छ ।

५८ वर्षकी ह्यारिसको उपस्थितिले उनीहरूको अभियानमा थोरै जीवन्तता र ऊर्जा ल्याउन सक्ने विश्वास बाइडेनको टिमलाई छ । र, सोच्नुपर्ने कुरा के पनि छ भने, सन् २०१२ मा बाराक ओबामाले राष्ट्रपतिमा दोस्रोपल्ट दाबेदारी पेस गर्दा उनको भिडियोमा तत्कालीन उपराष्ट्रपति बाइडेन थिएनन् ।

उमेरसँग जोडिएको प्रश्नको जवाफ छ ?

सेन्टर फर द पोलिटिकल फ्युचरका निर्देशक एवं डेमोक्र्याट्स अल गोर र जोन केरीका अभियान सल्लाहकार भइसकेका वरिष्ठ राजनीतिक सल्लाहकार बब श्रुम उक्त भिडियो पर्याप्त नरहेको बताउँछन् ।

उनी भन्छन्, ‘तपाईं जोडदार अभियान चलाएर उमेरसँग जोडिएका प्रश्नको जवाफ दिनुहुन्छ । तपाईं यसबारे कुरा गर्दै यसको जवाफ दिनुहुन्न ।’

बाइडेनले कुनै गम्भीर गल्ती गरेमा वा अभियानका क्रममा लरखराएमा भने उमेरको मुद्दाले समस्या ल्याउने श्रुम बताउँछन् । बाइडेनको कमजोरी पर्खेर बसेका रिपब्लिकनका लागि यस्ता कमजोरी बलियो हतियार हुने श्रुमको भनाइ छ । ‘यस्तो अवस्थामा उनीहरूले बाइडेनविरुद्ध बलियो मुद्दा भेट्टाउँछन्, अनि राष्ट्रपति पदका लागि उनी फिट नभएको प्रचार गर्नेछन्’, श्रुम भन्छन् ।

गत वर्ष रिपब्लिकन पार्टीका ५४ प्रतिनिधिले तल्लो सदनमा एक पत्र लेखेर बाइडेनको अवस्थामा ‘चिन्ता’ व्यक्त गर्दै भनेका थिए, ‘बाइडेनले डिमेन्सिया परीक्षण गर्न आवश्यक छ ।’

उक्त पत्रमा राष्ट्रपति बाइडेनका विभिन्न गल्ती औँल्याइएको थियो । ‘अहिलेका गल्तीहरू आफैँमा फरक–फरक कुरा होइनन्, यो एक ठूलै गिरावटको हिस्सा हो । यसले बाइडेनको लगातार गिर्दो अवस्थालाई देखाउँछ’, पत्रमा लेखिएको थियो ।

पूर्वराष्ट्रपति डोनाल्ड ट्रम्पले पनि पटक–पटक यस्तो ‘चिन्ता’ जाहेर गरिसकेका छन् । उनी रिपब्लिकन पार्टीका तर्फबाट सन् २०२४ मा उम्मेदवार बन्ने प्रमुख दाबेदार हुन् । गत वर्ष मध्यावधि चुनावका क्रममा ट्रम्पले बाइडेन धरमराएको एक भिडियो बारम्बार देखाएका थिए । ट्रम्पले ऐरिजोनास्थित र्‍यालीमा भनेका थिए, ‘जो बाइडेन प्रस्टसँग बोल्न सक्दैनन् । उनी ठीक ढङ्गले सोच्न सक्दैनन् ।’

ट्रम्पको पनि उमेर कम छैन

सन् २०१२ मा बाराक ओबामा दोस्रोपल्ट उम्मेदवार हुँदा चुनावी अभियानमा खटेकी जिम मेसिनाका अनुसार डेमोक्र्याटहरूले यो मुद्दामा ट्रम्पलाई पनि देखाउन सक्छन् । किनकि बाइडेनभन्दा ट्रम्प चार वर्ष मात्र कान्छा हुन् ।

‘भोटरहरू भन्छन्– दुवै जना बुढो भइसके,’ मेसिना भन्छिन्, ‘अब भन्नुहोस्, कसले जनजीवन उत्कृष्ट बनाउन सक्छन् ?’

बाइडेनको उमेरबारे चार वर्षअघि पनि प्रश्न नउठेको होइन । यद्यपि, कोभिडका कारण प्रत्यासीहरूले यो कुरा प्रत्यक्ष भोटरसम्म प्रचार गर्न सकेनन् । अन्ततः उमेर ठूलो मुद्दा बनेन र बाइडेनको जित वा ट्रम्पको हारमा यसको भूमिका शून्य रह्यो ।

राष्ट्रपति हुनुको फाइदा

बाइडेनलाई चुनावी अभियानमा आफू राष्ट्रपति हुनुको फाइदा मिल्नेछ । उनको यात्रा एयरफोर्स वानबाट हुनेछ । राजनीतिक कार्यक्रम चुस्त तरिकाले तय गरिनेछ । उनलाई व्यावसायिक अभियन्तासँगै राष्ट्रपतिको सुरक्षाका रूपमा मद्दत मिल्नेछ ।

यो एक अलग प्रकारको अनुभव हो । उनका प्रतिद्वन्द्वीले न्यून ह्याम्पसायर र अयोभाको बरफमा अभियान चलाउनु छ । सामान्यतः यहाँको बजेट कम हुन्छ भने प्रतिस्पर्धा निकै तगडा ।

आफ्ना विरोधीको तुलनामा बाइडेनले सरल र उच्चतम सुविधा पाउनेछन् । एबीसीको पोलमा बाइडेनका लागि आशाको थोरै किरण छ । त्यसअनुसार यदि बाइडेन फेरि चुनाव लड्छन् भने ८८ प्रतिशत डेमोक्र्याटले आफ्ना प्रत्यासीलाई साथ दिने सम्भावना छ ।

श्रुम भन्छन्, ‘बाइडेनको हौसला बलियो छ । उनलाई २०२० मा कमजोर आँकिएको थियो । मानिसहरूले उनलाई साना चुनावमा समेत हराइदिएका थिए । पछि उनले ऐतिहासिक जित हासिल गरे ।’

प्रकाशित मिति: शनिबार, वैशाख १६, २०८० ०७:१२