नेपालमै सुरु हुँदैछ पाइलट स्कुल, यी हुन् विद्यार्थीले बुझ्नैपर्ने कुरा (भिडियो)

संस्कृति, पर्यटन तथा नागरिक उड्डयन मन्त्रालयले हवाई उडान प्रशिक्षण अर्थात् ‘फ्लाइङ स्कुल’ सञ्चालनको अनुमति दिएसँगै नेपालमा पाइलट स्कुल सञ्चालन हुने भएको छ ।

मन्त्रालयले कार्यविधि नै संशोधन गरेर शुभम् एभिएसन प्रालि र चन्द्रसूर्य एभिएसन प्रालिलाई इजाजत दिएको हो । सोमबार मन्त्रालयबाट फ्लाइङ स्कुल सञ्चालन अनुमतिपत्र पाएका शुभम् एभिएसनका सञ्चालक पाइलट जनक अधिकारीले लामो प्रयासपछि अनुमति पाएको भन्दै सरकारलाई धन्यवाद दिए ।

अधिकारी १३ वर्षदेखि नेपालको उड्डयन क्षेत्रमा संलग्न छन् । उड्डयन क्षेत्रका सकारात्मक र नकारात्मक दुवै पाटाबारे उनी जानकार छन् । उनले शिलापत्रसँग भनेका छन्, ‘सम्पूर्ण रुपले हामी सक्षम रहँदारहँदै पनि देशको उड्डयन क्षेत्रबाट ठूलो पैसा विदेशिइरहेको छ । जबकि, हामी जनशक्ति र व्यवस्थापकीय रूपमा सबै जुटाउन सक्छौँ । अनि, यति धेरै पैसा किन बाहिर पठाउने ? यही सोचले २०७७ देखि नै सरकारसँग अनुमतिको प्रक्रिया अघि बढाएँ ।’

नेपालमै हवाई उडान प्रशिक्षण दिँदा हवाई सुरक्षाको स्तरसमेत माथि उठ्ने उनको बुझाइ छ । शुभम् एभिएसनले गीता एभिएसनका नामबाट स्कुल सञ्चालन गर्ने तयारी गरिरहेको छ ।

अन्तर्राष्ट्रिय मापदण्डको प्रशिक्षण संस्थाका लागि आवेदन दिएको शुभम्‌ले मन्त्रालयबाट इजाजत पाएसँगै यो प्रक्रिया नागरिक उड्डयन प्राधिकरणले अघि बढाउँछ । प्राधिकरणले अडिट र पूर्वाधार तयार गरेपछि अनुमति प्रदान गर्छ ।

अधिकारीका अनुसार यसपछि मात्रै प्रशिक्षणका लागि जहाज ल्याउन अनुमति पाउनेछ । जहाज ल्याएर त्यसको परीक्षण गरेपछि हवाई उडान प्रशिक्षण स्कुल सुरु गरिनेछ । पाइलट जनक भन्छन्, ‘यसका लागि करिब ६ महिना लाग्छ । हामीले युरोप स्ट्यान्डर्डको जहाज जर्मनीबाट मगाएर परीक्षणसमेत गरेर बुकिङ गरेका छौँ ।’

उनले नेपालमै हवाई उडान प्रशिक्षण सञ्चालन भएको अवस्थामा विश्वका जुनसुकै देशको आकाशमा जहाज उडाउन सक्ने जनशक्ति तयार हुने पनि बताए । हाल हवाई उडान प्रशिक्षणका लागि वार्षिक सयभन्दा बढी विद्यार्थी विदेश पठाइरहेको गीता एभिएसनले विदेशीलाई पनि नेपालमा हवाई उडान प्रशिक्षण लिने पूर्वाधारको तयारी गरिरहेको छ ।

पाइलट पढ्ने विद्यार्थीले बुझ्नैपर्ने यी कुरा