मिटरब्याजपीडितमाथि लाठीचार्ज, पीडित भन्छन्- प्रहरीले दमन गर्‍यो (फोटो/भिडियो)

मिटरब्याजपीडितमाथि लाठीचार्ज, पीडित भन्छन्- प्रहरीले दमन गर्‍यो (फोटो/भिडियो)

A+ A A-

सरकारले न्याय देला भन्ने आशले मधेशदेखि आए पनि सोमबार काठमाडौंको शान्ति बाटीकामा प्रहरीले आफूहरूमाथि दम गरेको 'मिटरब्याज पीडित'हरूले गुनासो गरेका छन् ।

सोमबार प्रहरी र प्रदर्शनकारीबीच झडप भएको थियो । त्यस क्रममा एक जना महिला आन्दोलनकारीको टाउकोमा गम्भीर चोट लाग्यो । अन्य केही आन्दोलनकारी घाइते भए । उनीहरूको वीर अस्पतालमा उपचार भइरहेको छ ।

मिटरब्याज पीडित पुनम महतोले शिलापत्रलाई बताएअनुसार शान्ति बाटीकाबाट शान्तिपूर्ण प्रदर्शन गर्दै सिंहदरबार पुगेर घेराउ गर्ने पूर्वनिर्धारित कार्यक्रम थियो । तर, बिहानैदेखि उनीहरू बसेका टेन्टबाहिरै प्रहरी आएका थिए । ‘हाम्रो आन्दोलनलाई दमन गर्ने योजनाले उनीहरू आएका हुनसक्छन् भन्ने लागेको थियो । हो रहेछ,’ महतोले भनिन् ।

उसो त काठमाडौंका प्रमुख जिल्ला अधिकारी घनश्याम उपाध्यायले शान्तिबाटीकामै आएर आइतबार झण्डामा लाठी प्रयोग भएको पाइएको र त्यसरी प्रदर्शन गर्न नपाइने भनेको आन्दोलनकारीको भनाइ छ ।

यद्यपि, सोमबार बिहान करिब ११ बजेतिर प्रदर्शनकारीहरू पूर्वनिर्धारित कार्यक्रमअनुसार सिंहदरबार घेर्न जाने भनेर शान्तिबाटीकाभित्रको गेटबाट बाहिर निस्किन खोजे । उनीहरूलाई प्रहरीले रोके । त्यहीबेला एक महिलाको मुखमा प्रहरीले लाठी चार्ज गरेको उनीहरूको भनाइ छ । त्यसपछि स्थिति तनावग्रस्त भयो ।

प्रहरीले भने प्रदर्शनकारीहरूले इँटा प्रहार गरेपछि बल प्रयोग गर्नुपरेको जनाएको छ । तर, ठूलो संख्यामा रहेका प्रहरीले आफूहरूमाथि अन्धाधुन्दा लाठी चार्ज गरेको आन्दोलनकारीको भनाइ छ ।

झडपकै क्रममा शिलापत्रका फोटो पत्रकार सुशील श्रेष्ठमाथि पनि प्रहरीले लाठी प्रहार गरेको छ । केहीबेरमै प्रहरीले अश्रुग्याँस र पानीको फोहोरा प्रयोग गरेर प्रदर्शनलाई नियन्त्रणमा लियो ।

प्रदर्शनकारीको आरोप छ, 'हाम्रो टेन्टमा आएर प्रहरीले महिलामाथि हातपात गरे । हाम्रो ओढ्ने ओछ्याउने भिजाइदिए ।’

उनीहरू चैतको तेस्रो साता काठमाडौं आएका हुन् । उनीहरूभन्दा अघि आएका मिटरब्याज पीडितहरूसँग सरकारले पाँच बुँदे सहमति गरेको छ । उक्त सहमति कार्यान्वयनको चरणमा छ ।

तर, उक्त सहमतिले आन्दोलन कमजोर भएको भन्दै उनीहरू प्रदर्शन गर्न काठमाडौं आएका हुन् । यसबीचमा उनीहरूसँग सरकारी वार्ता टोलीले पटकपटक वार्ता गरेको छ । सरकारी वार्ता टोलीले माग सम्बोधन गर्न नचाहेको भन्दै उनीहरूले वार्ता भंग भएको बताएका छन् ।

यसपछि फेरि शान्तिपूर्ण प्रदर्शन गर्दै आएका आफूहरूमाथि झण्डामा लाठी प्रयोग गरेको भन्दै प्रहरीले सोमबार बल प्रयोग गरेको उनीहरूको आरोप छ । ‘राजधानी आएपछि न्याय पाउने आश थियो । तर, यहाँ त पीडामाथि पीडा मात्र थप्नेबाहेक केही भएन,' महतोले भनिन्, 'सरकारले हाम्रो आवाज सुनेन । न्याय पाउने आश बाँकी रहेन ।’

प्रकाशित मिति: सोमबार, वैशाख ४, २०८० १८:३४