एसीसी प्रिमियर कपः च्याम्पियन बन्दै पाकिस्तान र भारतसँग खेल्ने नेपालको लक्ष्य (भिडियो)

एसीसी प्रिमियर कपः च्याम्पियन बन्दै पाकिस्तान र भारतसँग खेल्ने नेपालको लक्ष्य (भिडियो)

A+ A A-

एसीसी प्रिमियर कप क्रिकेट भोलि (मंगलबार) बाट काठमाडौंमा सुरु हुँदैछ । आयोजक नेपालसँगै १० राष्ट्र रहेको यो प्रतियोगिताको विजेताले एसिया कप खेल्न पाउनेछ । यसै वर्ष हुने एसिया कपमा छनोट भएको टिमले भारत र आयोजक पाकिस्तानसँग खेल्नेछ ।

टेस्ट राष्ट्र भारत र पाकिस्तानसँग खेल्ने लक्ष्यसहित एसीसी प्रिमियर कपको उद्घाटन खेलमा मंगलबार मलेसियासँग नेपालले प्रतिस्पर्धा गर्दैछ । भारत र पाकिस्तानसँग एसिया कपमा खेल्न नेपालले ठूलो उपलब्धि हात पार्नुपर्ने हुन्छ । एसीसी प्रिमियर कपको प्रमुख उपाधि दाबेदार नेपालसँगै ओमान, यूएई र हङकङ हुन् । यी तीनै राष्ट्र नेपाललाई हराउन सक्ने क्षमता राख्छन् । यसकारण पनि नेपालका लागि ठूलो चुनौती छ ।

१० टिम रहेको प्रतियोगिता दुई समूहमा विभाजन गरिएको छ । समूह ‘ए’ मा नेपालसँगै, ओमान, कतार, मलेसिया र साउदी अरब रहेका छन् । समूह ‘बी’ यूएई, हङकङ, कुवेत, सिंगापुर र बहराइन रहेका छन् । खेल त्रिवि क्रिकेट मैदान र मूलपानी क्रिकेट मैदानमा हुनेछ ।

यस्तो छ खेल तालिका

खेल तालिकाअनुसार नेपालले आफ्नो पहिलो खेल मलेसियासँग वैशाख ५ गते मलेसियासँग खेल्नेछ । यो खेल त्रिवि क्रिकेट मैदानमा हुनेछ । यही दिन हङकङ र सिंगापुरले मूलपानी क्रिकेट मैदामा प्रतिस्पर्धा गर्नेछ । वैशाख ६ गते त्रिवि क्रिकेट मैदानमा यूएई र कुवेतले प्रतिस्पर्धा गर्दा मूलपानी मैदानमा ओमान र कतारले खेल्नेछ । वैशाख ७ गते त्रिवि क्रिकेट मैदानमा सिंगापुर र बहराइनले प्रतिस्पर्धा गर्नेछ । यता, मूलपानी क्रिकेट मैदानमा मलेसिया र साउदी अरबले प्रतिस्पर्धा गर्नेछ ।

८ गते त्रिवि मैदानमा नेपालले आफ्नो दोस्रो खेल ओमानसँग प्रतिस्पर्धा गर्नेछ । त्यस्तै, मूलपानी क्रिकेट मैदानमा यूएईले हङकङसँग खेल्नेछ । ९ गते कतार र साउदी अरबबीचको खेल त्रिवि क्रिकेट मैदानमा हुनेछ । यही दिन मूलपानी क्रिकेट मैदानमा कुवेतले बहराइनसँग खेल्नेछ ।

१० गते त्रिवि क्रिकेट मैदानमा यूएईले सिंगापुरसँग खेल्दा मूलपानी क्रिकेट मैदानमा ओमान र मलेसियाबीच प्रतिस्पर्धा हुनेछ । ११ गते आयोजक नेपालले साउदी अरबसँग मूलपानी क्रिकेट मैदानमा खेल्दा यही दिन त्रिवि क्रिकेट मैदानमा हङकङले बहराइनविरुद्ध खेल्नेछ ।

१२ गते कुवेतले सिंगापुरसँग त्रिवि क्रिकेट मैदानमा खेल्दा मूलपानी क्रिकेट मैदानमा कतार र मलेसियाबीच प्रतिस्पर्धा हुनेछ । १३ गते ओमानले साउदी अरबसँग त्रिवि क्रिकेट मैदानमा प्रतिस्पर्धा गर्दा यता, मूलपानी क्रिकेट मैदानमा भने यूएई र बहराइनबीच खेल हुनेछ । समूह चरणको अन्तिम खेलमा नेपालले १४ गते कतारसँग त्रिवि क्रिकेट मैदानमा खेल्नेछ । यही दिन हङकङ र कुवेतबीच मूलपानी क्रिकेट मैदानमा प्रतिस्पर्धा हुनेछ ।

समूह ‘ए’ र ‘बी’ का शीर्ष दुई टिम सेमिफाइनलमा पुग्नेछन् । सेमिफाइनल खेल वैशाख १६ गते शनिबार हुनेछ । तेस्रो स्थानका लागि १७ गते हुनेछ । फाइनल खेल वैशाख १८ गते सोमबार हुनेछ ।

कस्तो छ नेपाली टिम ?

नेपाल राष्ट्रिय क्रिकेट टिम यतिबेला उच्च मनोबलमा छ । प्रत्येक खेलाडीमा जित्छौँ भन्ने आत्मविश्वास छ । पछिल्लो समयमा नेपालले पाएको उपलब्धि नै टिमको एकताबाट मिलेको सफलता हो ।

आईसीसी क्रिकेट विश्वकप लिग-२ मा उत्कृष्ट प्रदर्शन गर्दै १२ खेलमध्ये ११ खेल जित निकालेको नेपाली क्रिकेट टिम रोकिने अवस्थामा छैन । सफलताको खुड्किलो चुम्न हिँडेको नेपाली क्रिकेट टिम भारत र पाकिस्तानसँग खेलेरै लक्ष्य पूरा गर्ने संकल्पमा छ ।

रोहितकुमार पौडेलको कप्तानीमा रहेको नेपाली टिममा कुशल भुर्तेल, आसिफ शेख, ज्ञानेन्द्र मल्ल, कुशल मल्ल, सोमपाल कामी, आरिफ शेख, दीपेन्द्रसिंह ऐरी, गुल्सन झा, करण केसी, सन्दिप लामिछाने, भीम सार्की, प्रतिश जिसी र ललित नारायण राजवंशी छन् । रिजर्भमा अर्जुन साउद, सन्दीप जोरा, सूर्य तामाङ र किशोर महतो रहेका छन् ।

नेपाली खेलाडीमा नयाँ जोश छ । नेपाली क्रिकेटलाई एउटा उचाइमा लैजाने उस्तै तागत पनि । हरेक खेलाडीमा खेल जिताउने खुबी छ । यही खुबीले भरिएका छन् प्रत्येक खेलाडीमा । यसअघि कप्तान रोहितकुमार पौडेलले नेपाली टिम सन्तुलित भएको भन्दै हरेक खेलाडीमा खेल जिताउने सक्ने क्षमता भएको बताएका थिए । उनले भनेका थिए, ‘हामीले राम्रो गर्दै आइरहेका छौँ । हरेक खेलाडी फरक-फरक खेलमा चम्किएका छन् ।’

मलेसियाविरुद्ध नेपालका कुशल भुर्तेल र आसिफ शेखले ओपनिङ ब्याटिङ गर्नेछन् । त्यस्तै, ज्ञानेन्द्र मल्ल प्लेइङ इलाभेनमा नपरेको खण्डमा तेस्रो नम्बरमा ब्याटिङ गर्न कुशल मल्ल आउने छन् । तर, ज्ञानेन्द्र टिममा परे उनले नै तेस्रो नम्बरमा ब्याटिङ गर्नेछन् । त्यसपछि मिडिल अर्डरमा कप्तान रोहित, भीम, आरिफ, दीपेन्द्रले नेपालको पाली धान्ने छन् । गुल्सन, करण, सोमपाल र सन्दीपले फिनिसिङको भूमिका खेल्ने छन् ।

बलिङ पनि नेपालको उतिकै बलियो पक्ष हो । तीव्र गतिका बलर सोमपाल कामी, करण केसी र गुल्सन झा छन् । त्यसो त प्रतिश जिसी पनि नेपालका उदीयमान तीव्र गतिका बलर हुन् । सन्दिप लामिछाने र ललितनारायण राजवंशीको जोडी विपक्षी खेलाडीका लागि टाउको दुखाइ बन्नेछन् । दीपेन्द्रसिंह, कुशल मल्ल र आरिफको अलराउण्डर प्रदर्शन पनि विपक्षी टिम खतरनाक बन्न सक्छ ।

मलेसियाविरुद्ध पछिल्ला पाँच खेल

मलेसिया नेपालका लागि सहज प्रतिस्पर्धी हो । पछिल्ला पाँच खेलको नतिजाले पनि त्यही देखाउँछ । तर, क्रिकेट हो जे पनि हुन सक्छ । कमजोर टिमले बलियो विश्वविजेता टिमलाई हराएका धेरै उदाहरण छन् । एसोसिएट राष्ट्रले नै टेस्ट राष्ट्रलाई हराएको इतिहास पनि छ ।

त्यसैले मलेसियालाई कमजोर मान्नु पर्ने अवस्था भने छैन । क्रिकेटमा एक बलमा पनि नतिजा उल्टिन सक्छ । पछिल्लो पाँच खेलमा मलेसियाविरुद्ध नेपालले सबै खेलमा जित निकालेको छ । मलेसिया र नेपाल ५० ओभरको खेलमा पछिल्लो पटक चार वर्षअघि सन् २०१८ मा भेट भएको थियो । एसिया कप छनोटमै नेपालले मलेसियासँग त्यो बेला प्रतिस्पर्धा गरेको थियो । जुन खेलमा नेपाल १९ रनले विजयी भएको थियो ।

२०१४ मा आईसीसी विश्व क्रिकेट लिग डिभिजन-३ मा नेपालले मलेसियालाई डीएल मेथडमा ३६ रनले पराजित गरेको थियो । २०१४ मै भएको एसियन क्रिकेट काउन्सिल प्रिमियर लिगमा मलेसियालाई पाँच विकेटले हराएको थियो ।

२०१२ मा आईसीसी विश्व क्रिकेट लिग डिभिजन चारमा मलेसियालाई नेपालले १० विकेटले पराजित गरेको थियो । २०१२ मै एसियन क्रिकेट काउन्सिल ट्रफी इलाइटको सेमिफाइनलमा नेपालले मलेसियालाई २१ रनले हराएको थियो ।

भिडियो:

प्रकाशित मिति: सोमबार, वैशाख ४, २०८० १४:०८