खेलाडीहरुको ६ करोड लगानीमा ‘स्पोर्ट्स क्यासल’ सञ्चालन

A+ A A-

युवा खेलाडीहरुको संयुक्त लगानीमा पोखरामा ‘स्पोर्टस क्यासल’ सञ्चालनमा आएको छ । नेपाली फुटबल टिमका पूर्व राष्ट्रिय खेलाडी इश्वर गुरुङसहितका खेलाडीहरुले संयुक्त रुपमा ६ करोड लगानी गरेर पोखराको गणेशटोलमा स्पोटर्स क्यासल सुरु गरेका हुन् ।

गण्डकी प्रदेशका आर्थिक मामिला तथा योजनामन्त्री किरण गुरुङले शनिबार क्यासलको उद्घाटन गरेका छन् । उद्घाटनका क्रममा बोल्दै मन्त्री गुरुङले खेलले मनोरञ्जन पनि दिने भएकाले शारिरिकमात्र होइन मानसिक रूपमा स्वस्थ्य रहन पनि महत्वपूर्ण हुने बताए ।

‘आवश्यक कानुन बनाउने, निजी क्षेत्रका लागि लगानीमैत्री वातावरण बनाउने काम सरकारको हो,’ उनले भने, ‘पोखरामा पूर्व खेलाडीलगायतका युवाको लगानीमा अन्तर्राष्ट्रिय मापदण्डको फुटसल सञ्चालन हुनु प्रेरक खुसीको कुरा हो ।’

मन्त्री गुरुङले प्रदेशको आर्थिक समृद्धिको लागि सरकार निजी क्षेत्रसंग सहकार्य गर्न तयार रहेको पनि बताए । गण्डकी प्रदेशका सांसद विन्दुकुमार थापाले यस्ता खेल गतिविधिमा गरिने लगानीले समाजमा हुने विकृतिलाई निरुत्साहित पार्न सहयोग पुग्ने बताए ।

सञ्चालक ईश्वर गुरुङले पोखरामा रहेका अन्य जिम, फुटसल तथा फिजिकल सेन्टरहरूको तुलनामा स्पोर्टस् क्यासल अन्तर्राष्ट्रिय मापदण्ड अनुसारको भएकाले खेलुकदको केन्द्र हुने विश्वास व्यक्त गरे । ‘ पोखरा खेलकुद सिटी हो भन्ने चिनाउनका लागि फुटसल सञ्चालनमा ल्याएका हौँ । त्यसैले स्पोर्ट्स क्यासल अन्तर्राष्ट्रिय मापदण्डअनुसार निर्माण गरेका छौँ ।’ सञ्चालक इश्वर गुरुङले भने ।

क्यासलमा पूर्वराष्ट्रिय फुटबल खेलाडी ईश्वर गुरुङसँगै अनमोल पालिखे, विजया गुरुङ, राष्ट्रिय फुटसल प्रशिक्षक विष्णु गुरुङ, विशाल श्रेष्ठ, दीलिप कार्की, पवन गुरुङको संयुक्त लगानी रहेको छ ।

प्रकाशित मिति: आइतबार, भदौ १५, २०७६ ०५:०४