एसईईपछिका तीन महिनामा के गर्ने ? (भिडियो)

A+ A A-

माद्यमिक शिक्षा परीक्षा (एसईई) को नतिजा पर्खाइमा ४ लाख ८५ हजार ३९६ जना परीक्षार्थी छन् ।

नतिजा सार्वजनिक हुन भने करिब तीन महिना लाग्छ । यस अवधिमा उनीहरू शैक्षिक संस्थाभन्दा बाहिर हुन्छन् । अर्थात् उनीहरू झण्डै १३ वर्षपछिको सबैभन्दा लामो विदामा छन् ।

कतिपय अभिभावकलाई यस अवधिमा परीक्षा दिएका आफ्ना छोराछोरी त्यत्तिकै बस्दा कतै बिग्रिन्छन् कि भन्ने लाग्न पनि सक्छ । र, यस अवधिको उपयोग कसरी गराउने ? चिन्ता पनि हुन सक्छ । अभिभावकले उनीहरूलाई कसरी निर्देश गर्ने ? महत्वपूर्ण सवाल यो पनि हो ।

यही विषयमा २५ वर्षदेखि सक्रिय प्रगतिशील शिक्षा विज्ञ सुवास न्यौपानेसँग हामीले उल्लेखित प्रश्नहरूको जवाफ लिएका छौँ ।

०००

अन्वेषण समय

प्रगतिशील शिक्षा विज्ञ न्यौपानेका अनुसार यो तीन महिना विद्यार्थीका लागि अन्वेषण गर्ने सबैभन्दा ठूूलो अवसर हो । अन्वेषण गर्न सकिने अनेक पाटा छन् ।

यस अवधिमा देशको भौगोलिक, सांस्कृतिकलगायत अनेकन विविधताबारे विद्यार्थीहरूले अन्वेषण गर्न सक्छन् ।
न्यौपाने भन्छन्, ‘विद्यार्थीका लागि यो बेला त यहाँको माटोलाई चिन्ने अवसर पनि हो ।’

बहुजातीय देश भएकाले विभिन्न जातजाति र उनीहरूका संस्कृतिबारे पनि यस अवधिमा विद्यार्थीले अन्वेषण गर्न सक्छन् । यस्ता प्राज्ञिकतासँग जोडिएको क्षेत्रमा अन्वेषण गरिए विद्यार्थीहरूको बौद्धिताको दायरा झन फराकिलो हुन्छ। न्यौपाने थप भन्छन्– यही अवधिमा खेलकुदमा चाहना भएकाहरूले कुनै न कुनै किसिमको प्रशिक्षण लिन सक्छन् । चित्रकलामा रुचि भएकाले त्यही विद्यामा र संगीत क्षेत्रमा रमाउनेले सोहीसम्बन्धी प्रशिक्षण लिन सक्छन् ।

त्यसबाहेक घुमफिर गर्न रुचाउनेले देशका विभिन्न धार्मिक, सांस्कृतिक तथा पर्यटकीय दृष्टिले महत्त्वपूर्ण क्षेत्रको घुमफिर गरेर देशको भौगोलिक विविधताबारे बुझ्न र अध्ययन गर्न सक्छन् ।

तर, यसमा अभिभावकको भूमिका महत्त्वपूर्ण हुन्छ । रुचिअनुसारका क्षेत्रमा आफ्ना छोराछोरीलाई अगाडि बढ्न सहयोग गरे उनीहरूले धेरै कुरा सिक्न सक्ने न्यौपाने बताउँछन् ।

उनलाई अभिभावकले एसईई पछिको खाली समयमा जबर्जस्ती ‘ब्रिज’ कोर्स गर्न लगाउनुचाहिँ बेकार लाग्छ ।

उनका अनुसार हरेक बच्चा जन्मजात प्रतिभावान हुन्छन् । तर, प्रतिभा भने फरक हुन्छ । त्यसकारण जे प्रतिभा छ, त्यहीअनुसार अगाडि बढ्न अभिभावकले सहयोग गरे विद्यार्थी अब्बल बन्छ ।

अनलाइन सिकाइ

अनलाइनबाट धेरै विषयमा एसईईपछिका तीन महिनामा विद्यार्थीहरूले जानकारी लिन सक्छन् । रुचिको विषयमा अध्ययन गर्न सक्छन् । अभिभावकले भने यही गर्नुपर्छ भनेर दबाब दिन नहुने न्यौपानेको सुझाव छ ।

उनका थप सुझाव:

विद्यार्थीले +२ अध्ययन गर्न विज्ञापनको पछि कुुद्नुभन्दा आफ्नो क्षमता के हो ? खुट्याउनुपर्छ ।

ऐच्छिक विषयको निक्र्योल गर्नुुपर्छ ।

+२ छनोट गर्दा त्यहाँ उतिर्ण हुने विद्यार्थी संख्या थाहा पाउनुपर्छ ।

के–कस्ता शंकाय छन् ? जानकारी लिनुपर्छ ।

कलेजले प्रदान गर्ने सुविधाहरू थाहा पाउनुपर्छ ।

कलेज सञ्चालकहरूले शिक्षा कति बुझेका छन् ? त्यहाँ कस्ता सञ्चालकहरू छन् ?

प्रकाशित मिति: बिहीबार, चैत ३०, २०७९ १५:१८