ब्रेकिङ न्यूज (भिडियाेसहित)

A+ A A-

१

राष्ट्रपतिको बगैँचामा आज एकाबिहानै एउटा कालो गुलाफ फक्रेको जानकारी प्राप्त भएको छ । मालीका अनुसार, आफ्नो बगैँचामा कालो गुलाफ फक्रेकोमा राष्ट्रपतिले घनघोर चिन्ता प्रकट गरेका छन् ।

मालीले थप यसो भनेका छन्ः बगैँचामा मर्निङ–वाक गर्ने क्रममा राष्ट्रपतिज्यूले उक्त कालो गुलाफ देख्नुभएको हो । एकाबिहानै कालो गुलाफ देखेर उहाँको अनुहार पनि एकाएक कालो भएको कुरा एकदमै साँचो हो ।

राष्ट्रपतिको कार्यालयद्वारा जारी प्रेस वक्तव्यमा उक्त कालो गुलाफमा कालो कानुन, कालो बजार, कालो शासन इत्यादिको प्रतिकात्मक अर्थ निहित भएको प्रवल आशंका व्यक्त गरिएको छ ।

यद्यपि राष्ट्रपतिको राजकीय सवारीद्वारा पीडित एवं प्रताडित सर्वसाधारणले भने कालो गुलाफलाई राष्ट्रपतिको कालो मन तथा कालो नियतसित तुलना गर्दै सामाजिक सञ्जालमा आक्रोश व्यक्त गरेका छन् ।

हिजो रिसल्लासहित राष्ट्रपतिको राजकीय सवारीका कारण राजधानीको ट्राफिक अकल्पनीय रूपले तहसनहस भएको थियो । जसका कारण उपचारार्थ अस्पताल लैजाँदै गर्दा सडक जाममा फसेर एउटी बालिकाको ट्याक्सीभित्रै अकाल मृत्यु भएको थियो । दिवंगत बालिकाकी शोकाकुल आमा देशमाया देसारले राष्ट्रपतिको कालो गुलाफबारे यसो भनेकी छन्ः

राष्ट्रपतिको बगैँचामा मेरी छोरीको आत्मा कालो गुलाफ बनेर फक्रेकी हो । राष्ट्रपतिलाई यो दुखिया देशमायाको श्राप लागेको हो ।

२

पूर्वराजा ज्ञानेन्द्र शाहले आफ्नो फेसबुकको प्रोफाइल पिक्चर बदलेका छन् । बदलिएको नयाँ प्रोफाइल पिक्चरमा उनी मुडुलो टाउकोमा देखिएका छन् । सामाजिक सञ्जालहरूमा उक्त मुडुलो टाउको एकाएक भाइरल भएको छ । टिकटक, इन्स्टाग्राम र ट्विटरमा छ्यापछ्याप्ती छाएको छ ।

पूर्वराजाको प्रोफाइल पिक्चर बदल्ने प्रसंगलाई छिमेकी राष्ट्रका विदेशमन्त्रीले ‘अर्थपूर्ण कदम’को संज्ञा दिएका छन् । विदेशी मन्त्रीको अभिव्यक्तिप्रति स्वदेशी मन्त्रीहरूले आपत्ति प्रकट गरेका छन् ।

पूर्वराजाको मुडुलो टाउकोले मौजुदा दलहरूमा एक प्रकारको राजनीतिक तरंग ल्याइदिएको छ । शाही मुडुलो टाउकोले नेताहरूलाई मनोवैज्ञानिक रूपले हतोत्साहित बनाइदिएको छ ।

विभिन्न साम्यवादी तथा समाजवादी दलका प्रवक्ताहरूले ‘मुडुलो टाउको प्रकरण’लाई समाजमा चलिआएको –बर्खी बार्ने चलन– सित दाँज्दै संयुक्त विज्ञप्ति जारी गरेका छन् ।

विज्ञप्तिमा भनिएको छः आफ्नो मुडुलो टाउको सार्वजनिक गरेर पूर्वराजाले घनघोर षड्यन्त्र रचेका छन् । केश मुण्डन गरेर उनले संघीय लोकतान्त्रिक गणतन्त्रको बर्खी बार्ने दुस्साहस गरेका छन् । यो दुस्साहसिक षड्यन्त्र संविधानको बर्खिलाप छ ।

३

गत मध्यरात झम्सिखेलको एउटा सुनसान क्याफेमा प्रधानमन्त्री पुष्पकमल दाहाल र सशस्त्र द्वन्द्वकालमा माओवादी दलका सर्वाेच्च कमान्डर प्रचण्डबीच भेटवार्ता भएको छ ।

डेढ दशक लामो अन्तरालपश्चात् यी दुईको पुनर्मिलन भएको हो ।

निजहरूलाई कफी सर्भ गर्ने वेट्रेसका अनुसार प्रचण्ड र पुष्पकमल दाहालबीच अपूरणीय कन्ट्रास्ट देखिन्थ्यो । व्यक्तित्वमा आकाश–जमिनको फरक झल्कन्थ्यो । जस्तो कि प्रचण्डको मुहारमा दाह्री र जुँगा घाँसझैँ जथाभावी उम्रिएका थिए भने पुष्पकमल दाहालको अनुहार क्लिन सेभ्ड थियो, आफ्टर सेभको बास्ना मगमगाइरहेको थियो ।

प्रचण्डले छापामार पोशाकमा गम्छा भिरेका थिए भने पुष्पकमल दाहाल भादगाउँले टोपीलगायत दौरा सुरुवाल र टाई–कोटमा सजिएका थिए ।

वेट्रेसले मकन भनेकी थिइन्ः छापामार ड्रेसवाला प्रचण्ड भर्सेस दौरा सुरुवालवाला पुष्पकमल दाहाललाई एउटै फ्रेममा देख्नु मेरा निम्ति गज्जबको अनुभूति थियो । विक्रम संवत् २०६३ सालपछि पहिलोपटक दुई जनाको भेट भएको थियो । यद्यपि दुवै जना एकअर्काप्रति उदासीन देखिए । न न्यानो अंकमाल, न कुनै आत्मीयता ! मलाई लाग्यो, उनीहरूबीचको सम्बन्ध मैले सर्भ गरेको कफीझैँ सेलाइसकेको छ ।

प्रचण्ड र पुष्पकमल दाहालको ऐतिहासिक भेटघाटबारे क्याफेकी वेट्रेसले मकन विस्तारमा यसो भनिन्ः अधिकांश समय उनीहरू मौन रहे । ‘मौनम् शरणम् गच्छामी’को भावमुद्रामा केवल एकअर्कालाई टुलुटुलु हेरी बसे । लामो सन्नाटापश्चात् प्रचण्ड, द सुप्रिम कमान्डरले भने, ‘पुष्पकमलज्यू, यतिका वर्षपछि मलाई देख्दा तपाईंलाई आफ्नो अतीतको याद आएन ?' त्यसको जवाफमा पुष्पकमल दाहाल, द प्राइम मिनिस्टरले भने, ‘प्रचण्डजी, अतीत त पतित हुन्छ । अतीतको यादमा बाँच्ने मान्छे निःसन्देह पतित हुन्छ ।'

पुष्पकमल दाहालको जवाफ सुनेर प्रचण्ड स्तब्ध, उदास भए । लाजले आफ्नो शिर निहुर्‍याए । उनको काँधमा झोला झुण्डिएकै थियो । झोलाबाट उनले हँसिया र हथौडा निकाले र टेबलमा राखे । खिया लागेका हँसिया र हथौडा देखेर पुष्पकमल दाहालले नाक खुम्च्याए । प्रचण्डले झोलाबाट एउटा टिफिन बक्स पनि निकाले र पुष्पकमल दाहालतर्फ बढाए ।

टिफिन बक्समा के थियो ?

वेट्रेसले भनिन्ः खिर थियो । प्रचण्डले पुष्पकमल दाहाललाई खिर ल्याइदिएका रहेछन् । खिर दिएपछि उनी उदास मन लिएर क्याफेबाट बाहिरिए । पुष्पकमल दाहाल भने आफ्नो मनप्रिय परिकार खाऊँ कि नखाऊँ भन्ने दोधारमा खिया लागेर जर्जर भइसकेका हँसिया र हथौडातिर पालैपालो नजर डुलाउँदै अनि शून्यमा टोलाउँदै क्याफेको कर्नर टेबलमा एक्लै धुमधुम्ती बसिरहे ।

४

एउटा हातले तरबार समातेकी, अर्काे हातले तराजु उचालेकी अनि आफ्नो आँखामा युगौँदेखि कालो पट्टी बाँधेकी न्यायकी देवीले न्यायमूर्तिहरूसित सशस्त्र विद्रोह गरेको समाचार प्राप्त भएको छ ।

सूत्रका अनुसार ‘न्यायालयमा मौलाउँदो अनियमितता र भ्रष्टाचार’ शीर्षकमा बहस– अन्तर्क्रिया गर्न देशभरका न्यायमूर्तिहरू राष्ट्रिय सभागृहको प्रेक्षालयमा भेला भएका थिए । मञ्चको एउटा कुनामा न्यायकी देवीको मूर्ति स्थापना गरिएको थियो । प्रेक्षालय खचाखच भरिएको थियो ।

एक प्रत्यक्षदर्शीले मकन चुहाएको गुप्त सूचनाअनुसार, न्यायालयको शुद्धीकरण एवम् अदालतमा बिचौलिया तथा दलालहरूको रजगजबारे न्यायमूर्तिहरूमाझ गरमागरम बहस भइरहेको थियो । यस्तैमा अकस्मात् –आउट अफ द ब्लु– न्यायकी देवीले सिंहनाद गर्दै आफूले उचालिरहेको तराजु भुईंमा बजारेकी थिइन्, आँखाको कालो पट्टी खोलेर मिल्काइदिएकी थिइन्, र तरबार नचाउँदै न्यायमूर्तिहरूउपर जाइलागेकी थिइन् ।

‘न्यायको आँखामा कालो पट्टी बाँध्ने अनि तिमी न्यायमूर्तिहरूले खुल्लमखुल्ला अनियमितता र भ्रष्टाचार गर्ने ? बिचौलिया र दलालहरूसित अनैतिक साँठगाँठ गर्ने ?' भन्दै न्यायकी देवीले न्यामूर्तिहरूको सातो लिइन्, झाँको झारिन् ।

प्रेक्षालयमा भागदौड मच्चियो । भाग्ने क्रममा कतिपय न्यायमूर्तिको चिउँडो र कुर्कुच्चाको हड्डी भाँचियो । प्रहरी बलले न्यायकी देवीलाई हस्तक्षेप गर्दै हातमा हतकडी लगाइदिएपछि स्थिति सामान्य भयो । यो हिजो अपराह्नको घटना हो ।

आज न्यायकी देवीलाई हनुमान ढोकाको प्रहरी हिरासतमा राखिएको छ । उनका हातहरूमा पुनः तराजु र तरबार थमाइएको छ । आँखामा कालो पट्टी लगाइएको छ । चौकीका प्रहरी निरीक्षकले मकन टेलिफोनमा भनेका छन् : अब जतिसक्दो चाँडो न्यायकी देवीलाई अदालतमा मुद्दा चलाइनेछ । न्यायकी देवीलाई अन्ततः कठघरामा उभ्याइनेछ ।

हेर्नुहाेस् भिडियाे :

प्रकाशित मिति: शुक्रबार, वैशाख १, २०८० ०७:५८