यसरी सुरु भएको थियो नेपालकै पहिलो अनलाइन शिक्षण संस्था ओट्टिस (भिडियो)

A+ A A-

१९ वर्षअघि प्रदीप सिग्देललाई व्यवसाय गर्ने रहर जाग्यो । त्यसबेला उनी कक्षा १२ मा पढ्दै थिए । १० हजार लगानी गरेर कम्प्युटर इन्स्टिच्युट खोले । लगानी डुब्यो ।

यसपछि उनको सोच बदलियो । चार्टर्ड अकाउन्टेन्ट हुने रहर भयो । पढ्न थाले । तर, प्रदीप एक/दुईपटक होइन, सातपटकसम्म फेल भए । बल्लतल्ल चार्टर्ड अकाउन्टेन्टको अध्ययन पूरा गरे ।

त्यसबेला उनले सिकेको पाठ हो- पढाइले मात्र होइन, मिहिनेत र लगनशीलताले सफलता मिल्ने रहेछ । पहिले व्यवसायमा असफल भए पनि व्यवसाय गर्ने उनको हुटहुटी मरिसकेको थिएन ।

त्यस्तै, बैंकको जागिरे बन्ने सपना बोकेर सुवास पौडेल चार्टर्ड अकाउन्टेन्ट बनेका थिए । उनले बैंकको जागिर खाए पनि । तर, एक वर्षमै बैंकको जागिरबाट वाक्कदिक्क भए ।

बैंकको जागिरे हुँदा पनि उनी शिक्षण पेसाबाट अलग थिएनन् । विद्यार्थीहरू आफ्नो शिक्षण सिकाइ क्रियाकलापप्रति खुसी हुने गरेको सुखद अनुभव छ पौडेलसँग । ‘सर ! तपाईंले पढाउनुभएको बुझिने मात्रै होइन, नबिर्सिने गरी बुझ्छौँ,’ विद्यार्थीहरूको यो भनाइ सुवासले बिर्सिएका छैनन् ।

तर, उनको जागिरे मानसिकता बदलियो । बैंकको जागिर छाडेर उद्यमशील बन्ने हुटहुटी उनमा जाग्यो । त्यही हुटहुटीका कारण उनले जागिर छाडेका हुन् ।

अर्का चार्टर्ड एकाउन्टेन्ट ऋषिराम चालिसेको कथा पनि प्रदीप र सुवाससँग मिल्दोजुल्दो छ । शिक्षण पेसामा जोडिएर उद्यमी बनेर केही नयाँ गर्ने हुटहुटी ऋषिराममा पनि थियो ।

अनि लगभग समान सोच र उस्तैउस्तै भोगाइ भएका यी तीन युवा मिलेर शिक्षा क्षेत्रमै केही नयाँ काम गर्ने योजना बनाए । पैसा पनि कमाइ हुने अनि समाजका लागि पनि केही योगदान दिन सकिने सोच बोकेका यी तीन युवाले ‘कर्पोरेट सेक्टर’सँग जोडिएर शैक्षिक प्रशिक्षण दिनेलगायत उद्यम गरे । तर, त्यसबाट अपेक्षाकृत सफलता मिलेन, न त कमाइ नै भयो ।

देशको शैक्षिक प्रणालीलाई अन्तर्राष्ट्रियस्तरमा सफल भएको दूर शिक्षा प्रणालीमा रुपान्तरण गर्ने उनीहरूको सोच मरिसकेको थिएन । यही सिलसिलामा सन् २०१९ मा ओट्टिस स्थापना भयो । यो नेपालकै पहिलो अनलाइन पद्धतिको शिक्षणमा आधारित शिक्षण संस्था रहेको उनीहरूको दाबी छ । एपका माध्यमबाट विद्यार्थीलाई अध्ययन गराउने संस्था हो ओट्टिस ।

ओट्टिसको सुरुवाती दिनमा उनीहरूलाई शिक्षक र विद्यार्थी दुवैको विश्वास जित्न सकेनन् । अर्कातर्फ ओट्टिस सुरु भएको छ महिनामै कोरोना महामारीको प्रकोप देखियो । उनीहरूका लागि कोराना अवसर र चुनौतीका रूपमा देखापर्‍यो । एकातर्फ कोरोनाका कारण समस्या थपिएको थियो भने अर्कातर्फ नेपालका सबै शैक्षिक संस्थाका लागि अनलाइन शिक्षा एक मात्र विकल्पका रूपमा देखापर्‍यो ।

त्यसपछि ओट्टिस सफलताको यात्रातर्फ अघि बढ्यो । सुवास, प्रदीप र ऋषिलाई मात्र होइन, हजारौँ विद्यार्थी र समाजले असक्षम भनेर परिचित गरिदिएका शारीरिक अशक्त विद्यार्थीलाई समेत नसोचेको सफलता दिलायो ।

‘व्यवसायमा सामाजिक प्रभावको कुरा सधैँ गर्नुपर्छ । जो मान्छे शारीरिक रूपमा अशक्त छ, उसलाई सहयोग गर्नु हाम्रो सामाजिक उत्तरदायित्व हो,' प्रदीप भन्छन्, 'त्यो मर्मका साथ हामीले पहिलो दिनदेखि नै काम गरिरहेका छौँ । हामीले परिवर्तन गर्न खोजेको उनीहरूको जीवन हो ।'

प्रतिस्पर्धात्मक परीक्षा पास गरेर सरकारको निजामती सेवामा अथवा सुरक्षा सेवामा, कृषि तथा इन्जिनियरिङतिर जागिर खान प्रयास गर्ने विद्यार्थीका निम्ति हाल ओट्टिस राम्रो माध्यम भएको चालिसेको दाबी छ ।

ओट्टिसले हाल ६० जनालाई रोजगारी दिएको छ । यसरी देशका दुर्गम क्षेत्र र नेपालबाहिरका करिब ८० हजार विद्यार्थी ओट्टिससँग जोडिएका छन् ।

प्रकाशित मिति: शुक्रबार, चैत २४, २०७९ १९:१८