बार्सिलोनाका पूर्व प्रशिक्षक एनरिकेकी छोरीको ९ वर्षमा मृत्यु

A+ A A-

बार्सिलोना र स्पेनका पूर्वम्यानेजर लुइस एनरिकेकी ९ वर्षीया छोरी सानाको मृत्यु भएको छ । पाँच महिनादेखि हड्डीको क्यान्सरसँग जुधिरहेकी सानाको मृत्युको खबर एनरिकेले ट्विटरमार्फत सार्वजनिक गरेका थिए ।

पाँच महिना अघि सानालाई क्यान्सर भएको पत्ता लागेपछि छोरीको हेरचाह गर्न एनरिकेले स्पेनको प्रशिक्षकबाट राजीनामा दिएर घरमै बसेका थिए । तर, एनरिकेको त्याग छोरीलाई बचाउन पर्याप्त भएन ।

‘५ महिना ओस्टेओसार्कामा (हड्डीको क्यान्सर) सँग निरन्तर जुधेकी हाम्री छोरी सानाको ९ वर्षको उमेरमा आज दिउँसो निधन भएको छ । सो समयमा दिनुभएको न्यानो साथ र अपार सहानुभूति दिनुहुने सबैलाई धन्यवाद तथा आधार ।’, एनरिकेले ट्विटमा लेखेका छन् ।

उनले थप लेखेका छन्, ‘सेन्ट जोन डे पाउ र सेन्ट पाउ हस्पिटलका सबै डाक्टर, नर्स तथा स्टाफहरुले उपचारमा देखाउनु भएको तात्पर्यता तथा समर्पणका लागि हार्दिक धन्यवाद । सेन्ट जोन डे पाउको पेलिएटिभ केयर टिमलाई विशेष धन्यवाद ।’

‘साना, हामी तिमीलाई हाम्रो जीवनका हरेक दिन सम्झिरहने छौं । भविष्यमा कुनै दिन हाम्रो भेट हुनेछ भन्नेमा आशावादी छौं । तिमी हाम्रो परिवारको तारा हौ र रहिरहेनछौ । तिम्रो आत्माले शान्ति पाओस् ।’

बार्सिलोनाका अध्यक्ष जोसेप बार्टोमेउले क्लबको तर्फबाट समवेदना दिएका छन् । एनरिकेले खेलाडी र म्यानेजर गरी बार्सामा ११ वर्ष बिताउँदा २ पटक ला लिगा च्याम्पियन बनाएका बिताएका थिए ।

बार्टोमेउले ट्विट गर्दै लेखेका छन्, ‘लुइस एनरिके, उनकी पत्नी र सम्पूर्ण परिवारलाई यो दुःखको घडिमा धैर्यधारण गर्ने हौसला मिलोस् । हामी सबै तपाईहरुको साथमा छौं ।’

स्पेनिस फुटबल फेडेरेसनले पनि सानाको मृत्युमा शोक व्यक्त गरेको छ । एनरिके र उनको सम्पूर्ण परिवारप्रति सहानुभूति प्रकट गर्दै फेडेरेसनले दुःखको यो घडीमा धैर्यधारण गर्न सुझाव दिएको छ ।

प्रकाशित मिति: शुक्रबार, भदौ १३, २०७६ २१:४४