पहुँचका भरमा प्रहरी अधिकृतले लिन्छन् आकर्षक पोस्टिङ: डीएसपी बमदेखि एसएसपी भट्टराईसम्म

पहुँचका भरमा प्रहरी अधिकृतले लिन्छन् आकर्षक पोस्टिङ: डीएसपी बमदेखि एसएसपी भट्टराईसम्म

A+ A A-

मधेश प्रदेश प्रहरी प्रमुखको निमित्त प्रमुख हुने गरी गृह मन्त्रालयले गत बिहीबार प्रहरी वरिष्ठ उपरीक्षक (एसएसपी) जनक भट्टराईको काज सरुवा गर्‍यो । प्रदेश प्रहरी प्रमुख प्रहरी नायब महानिरीक्षक (डीआईजी) रहने व्यवस्था छ ।

तर, हाल प्रहरीमा १३ जना डीआईजीको दरबन्दी रिक्त हुँदा डीआईजी प्रमुख रहने कार्यालयमा एसएसपीले कमान्ड सम्हाल्दै आएका छन् । मधेश प्रदेशबाहेक कोशी प्रदेश र सुदूरपश्चिम प्रदेशमा समेत हाल एसएसपी प्रमुख छन् । कोशीमा राजेशनाथ बाँस्तोला र सुदूरपश्चिम प्रदेशमा एसएसपी भरतबहादुर बोहराले कमान्ड सम्हाल्दै आएका छन् ।

तर, मधेश प्रदेश निमित्त प्रमुख पाएका भट्टराई यस्ता भाग्यमानी एसएसपीमा हुन्, जसले इन्चार्ज-टु-इन्चार्जको जिम्मेवारी पाउनेमा ह्याट्रिक गरेका छन् । प्रहरीमा सामान्यतः इन्चार्ज-टु-इन्चार्ज सरुवा दिइँदैन ।

तर, उनले शक्तिकेन्द्रको आडमा एसएसपी बढुवा भएदेखि नै इन्चार्ज पाउन थाले । डीआईजी बढुवा नहुँदै डीआईजी प्रमुख रहने प्रदेश प्रमुखसमेत हुन भ्याए । प्रहरी प्रधान कार्यालयले सुरुमा मधेश प्रदेश प्रमुखमा डीआईजी किरण रााणाको काज सरुवाको तयारी गरेको थियो । तर, अन्तिममा गृह मन्त्रालयले एसएसपी भट्टराईलाई पठायो ।

यसअघि २०७७ मा भट्टराईले उपत्यका ट्राफिक प्रहरी कार्यालय रामशाहपथमा १४ महिना कमान्ड सम्हालेका थिए । ट्राफिक कार्यालयबाट एसएसपी भट्टराई अर्को इन्चार्जकै रूपमा संघीय इकाई प्रहरी कार्यालय भैरहवा पुगे ।

भैरहवाको इन्चार्ज भएको झण्डै ६ महिनामा फेरि उनलाई उपत्यका अपराध अनुसन्धान कार्यालयको जिम्मा दिइयो । एसपी हुँदासमेत भट्टराईले दाङ, महोत्तरी र बर्दियाको कमान्ड सम्हालेका थिए । तुलनात्मक रूपमा आफ्ना ब्याचीहरूमा कमजोर कार्यक्षमता भएका भट्टराईले शक्तिकेन्द्रको आडमा महत्त्वपूर्ण जिम्मा पाउँदै आएका छन् । विराटनगरका भट्टराईले कांग्रेस नेताकै दबाबका कारण पटक-पटक आकर्षक पोस्टिङ पाउँदै आएका छन् ।

इन्चार्जको जिम्मेवारी एक जनाले मात्रै पाउँदा अन्य प्रहरीको मनोबल कमजोर हुने प्रहरी अधिकारीहरू नै बताउँछन् । प्रहरी प्रवक्ता डीआईजी पोषराज पोखरेलले भने डीआईजी रिक्त हुँदा एसएसपीलाई निमित्त पठाइएको बताए ।

‘डीआईजीको दरबन्दी भए पनि खाली हुँदा एसएसपीलाई निमित्त दिइएको हो । भट्टराई सिनियर एसएसपी नै भएका कारण मधेश प्रमुखका रूपमा जानुभएको हो,’ पोखरेलले भने । प्रहरीमा शक्तिको दुरुपयोग गर्दै आकर्षक मानिएका कार्यालय पुग्ने भट्टराई एक्ला मात्रै होइनन्, यस्तो प्रवृत्ति प्रहरी संगठनभित्र व्याप्त छ । दुई हप्ताअघि मात्रै एउटै घटनामा बालाजु वृत्तका प्रमुख डीएसपी रविन विष्टमाथि कारबाही हुँदा लैनचौर प्रहरी वृत्त प्रमुख गणेश बममाथि भने कुनै कारबाही भएन ।

१ फागुनमा बालाजु माछापोखरी क्षेत्रमा प्रहरी र यातायात मजदुरबीच झडप हुँदा प्रहरीको भवनमाथि नै आगजनी भएको थियो । ट्राफिक नियमको विरोध गर्दै यातायात मजदुरहरूले अवरुद्ध पारेको सडक प्रहरीले हस्तक्षेप गरेर खोल्न खोज्दा मजदुर आक्रोशित भएका थिए ।

आन्दोलनरत मजदुरहरूले बालाजु प्रहरी वृत्तका प्रमुख डीएसपी विष्ट सवार बा २ झ १४४ नम्बरको स्कार्पियोसहित दुईवटा गाडीमा आगजनी नै गरे । सोही घटनामा प्रहरीको कमजोर कमान्ड रहेको निष्कर्षपछि डीएसपी विष्टको जिम्मेवारी नै खोसिएको थियो ।

त्योबाहेक विष्टलाई थप कारबाही स्वरुप एक वर्षसम्मको बढुवा रोक्का गरियो । तर, सोही घटनामा बालाजु प्रहरीलाई थप मद्दत गर्न पुुगेको लैनचौर प्रहरी प्रमुख डीएसपी गणेश बम घटनास्थलबाट भागेर फर्किएका थिए । सो घटनामा बमलाई भने प्रहरी प्रधान कार्यालयले सामान्य नसिहतको मात्रै कारबाही गर्‍यो । कमजोर कमान्ड हुँदासमेत उनको जिम्मेवारीमा कुनै हेरफेर भएन । हालसम्म पनि उनी वृत्त प्रमुख छन् । शान्ति सुरक्षाको हिसाबले संवेदनशील मानिएको पर्यटकीय क्षेत्र ठमेलको जिम्मा कमजोर कमान्ड क्षमता रहेका बमले गर्दै आएका छन् ।

यसअघि बम जिल्ला प्रहरी कार्यालय बझाङको प्रमुख रहँदासमेत कमजोर कमान्ड क्षमताकै कारण विवादमा आएका थिए । तर, उनी पनि एसएसपी भट्टराईजस्तै आकर्षक पोस्टिङ पाउँदै आएका छन् । प्रहरी निरीक्षक हुँदा उनी आफ्नो ब्याचको सबैभन्दा इन्चार्ज पाउनेमा दरिएका थिए ।

प्रहरी निरीक्षक हुँदा बलले कैलालीको अत्तरिया, कञ्चनपुरको त्रिभुवन बस्ती र दाङको एक इलाका प्रहरी कार्यालयमा प्रमुखको जिम्मेवारी पाएका थिए ।

प्रकाशित मिति: बुधबार, चैत २२, २०७९ १६:१०