घरमै बसीबसी व्यावसायिक हिसाब मिलाउन जन्मिएको ‘टिग’ (भिडियो)

A+ A A-

हरेक व्यवसायमा हिसाबकिताब सबैभन्दा महत्वपूर्ण पाटो हो । तर, धेरै व्यवसायीका लागि सबैभन्दा टाउको दुखाइ हुने भनेकै हिसाबकिताबमा हो । कतिपयको हिसाब राख्ने पट्यारलाग्दो पुरानो ढड्डा प्रणाली यथावत छ भने केही दिग्दारलाग्दा ‘डिजिटल एप’हरू पनि छन् ।

व्यवसायी प्रार्थना शाखः यस्ता डिजिटल एपमा पनि लेखाका डेबिड, क्रेडिटजस्ता हिसाबकिताब राख्न धेरै व्यवसायीलाई असहज हुने गरेको बताउँछिन् । उनलाई पनि झन्झटिलो नभएको होइन । त्यही भएर व्यावसायिक हिसाबकिताबलाई चुस्त दुरुस्त राख्न सहज हुने कुनै प्रविधि विकासतिर उनी सोचिरहेकी थिइन् ।

नेपाल युवा उद्यमी मञ्च काठमाडौंकी उपाध्यक्षसमेत रहेकी उनी र उनको समूहले ‘टिग’ को विकास गर्‍यो । यो व्यावसायिक हिसाबकिताब राख्ने व्यवस्थित अनलाइन प्रणाली हो ।

टिगमार्फत व्यवसायीले आफ्नो व्यवसायको कर प्रतिवेदनसमेत बुझाउन सकिने प्राथना बताउँछिन् । टिगको विकासमा चार्टर्ड एकाउन्टेन्ट, व्यवस्थापन र इन्जिनियर समूहका विद्यार्थीको पनि योगदान छ ।

प्रार्थनाका अनुसार कोरोना महामारीले विश्वलाई आक्रान्त बनाउँदा मानिसहरू घरभित्रै थुनिएका बेला घरबाटै व्यवसाय होस् वा कार्यालयका कामकाज गर्नुपर्ने थियो । तर, लेखाको कामकाजका लागि भने कार्यालय नै पुग्नुपर्ने बाध्यता थियो । यो समस्या प्रार्थनाको मात्रै होइन, धेरै व्यवसायीको थियो । त्यसपछि समस्या समाधानका विकल्पबारे घोत्लिन थालिन् । अनि, जन्मियो ‘टिग’ ।

साना तथा मझौला व्यवसायीहरू टिगका लक्षित ग्राहकहरू रहेको प्रार्थना बताउँछिन् ।

टिगले आफूूसँग आबद्ध भएका ग्राहकसँग वार्षिक २० हजार शुल्क लिन्छ । टिगसँग डेढ वर्षको अन्तरालमा करिब छ सय कम्पनीले सदस्यता लिइसकेका छन् । व्यक्तिगत रूपमा तीन हजार मानिसले सक्रिय रूपमा टिग चलाइरहेको प्रार्थना बताउँछिन् ।

उसो त सुरुवाती दिनमा ग्राहकहरूले टिगलाई ‘स्टार्टअप’ भएकै विश्वासै गरेनन्, जसले प्रार्थनाको समूहलाई चिन्तित बनायो ।

‘स्टार्टअप व्यवसायका रूपमा टिग हामीले सुरु गर्नुअघि बजारमा लामो अध्ययन गर्‍यौँ । व्यवसायीका अपेक्षाहरू केलायौँ । त्यहीअनुसार टिग विस्तार गर्‍यौँ । अहिले ग्राहकले दिएको साथले सबैभन्दा उत्साह र ऊर्जा मिल्छ’, प्रार्थना भन्छिन् ।

आगामी दिनमा टिगलाई अझै परिस्कृत गर्दै अधिक व्यवसायीमाझ पुर्‍याउन र डिजिटल नेपालको परिकल्पनालाई पूर्णता दिन टिगको माध्यमले आफू र आफ्नो समूहले सक्दो प्रयास गर्ने शिलापत्रलाई बताइन् ।

प्रकाशित मिति: मंगलबार, चैत २१, २०७९ ०६:२१