काेराेना अब फ्लुको रुपमा रहिरहने सम्भावना

A+ A A-

लामो समयसम्म शून्यमा झरेको कोरोना भाइरसको संक्रमण पछिल्ला केही दिन यता बढ्न थालेको छ । स्वास्थ्य तथा जनसंख्या मन्त्रालयले सार्वजनिक गरेको तथ्याङ्क हेर्ने हो भने पनि संक्रमितको ग्राफ उकालो लाग्दै गएको छ ।

त्यसो त कोरोना भाइरसको सबैभन्दा धेरै उपचार हुँदै आइरहेको काठमाडाैंकाे टेकुस्थित शुक्रराज ट्रपिकल तथा सरुवा रोग अस्पतामा ६ दिन अगाडि कोरोना भाइरसका बिरामी शून्य थिए । तर, अस्पतालमा अहिले दुई जना बिरामी उपचाररत रहेको अस्पतालकी निर्देशक डा. मनिषा रावलले बताउँछिन् ।

उनले भनिन्, ‘पुस महिनामा एक दुई जना बिरामी भर्ना भएका थिए । त्यहाँदेखि ६ दिन अगाडिसम्म कोरोनाको कुनै पनि बिरामी भएका थिएनन् ।’

अस्पतालमा ६ दिन अगाडि तीन जना बिरामी भर्ना भए पनि एक जना भने डिस्चार्ज भइसकेको उनले बताइन् । डा. रावलले भनिन्, ‘बिरामीमा सिभेरिटी छैन । एक जना डिस्चार्ज भइसक्नु भएको छ । दुई जनाको उपचार भइरहेको छ । त्यसमध्ये पनि एक जना भोलिसम्ममा डिस्चार्ज हुनुहुन्छ होला ।’

Dengu teku (6)1663218917.jpg

उनका अनुसार यो वर्ष कोरोना भाइरसका बिरामी ह्वात्तै बढे पनि संक्रमणकै कारण मृत्यु हुने सम्भावना निकै कम छ । अधिकांश मानिसहरूले कोरोना भाइरसविरुद्धको खोप लगाएका कारण बिरामीमा जटिलता न्यून मात्रा देखिन सक्ने उनी बताउँछिन् । अस्पतालमा भर्ना भएका बिरामी ज्वरो, रुघाखोकी जस्ता लक्षण देखिएर अस्पताल पुगेको थिए ।

त्यस्तै दुई दिन अगाडि कोभिड बिरामीको संख्या शून्यमा रहेको वीर अस्पतालमा हाल दुई जनाको उपचार भइरहेको छ । कोरोना संक्रमणको ग्राफ उकालो लागेसँगै बिरामी अस्पतालमा भर्ना हुन थालेको अस्पतालका निर्देशक डा. सन्तोष पौडेलले बताए ।

उनले भने, ‘अस्तिसम्म हामी कहाँ एक जना बिरामी थिएनन् । हिजो मात्र दुई जना भर्ना भएका छन् । यो संख्या अझै बढ्दै जाने देखिन्छ ।’ डा. पौडेलका अनुसार अस्पतालका उपचाररत दुवै जनाको अवस्था समान्य रहेको छ ।

कोरोना भाइरस व्यापक रुपमा फैलिएको दोस्रो लहरमा सबैभन्दा धेरै बिरामीको उपचार गर्ने टेकु अस्पतालपछि दोस्रो नम्बरमा थियो- त्रिवि शिक्षण अस्पताल महाराजगञ्ज । जहाँ केही दिन यता कोभिडका बिरामी भर्ना हुन थालेका छन् । अस्पतालमा अहिले दुई जना आईसीयूमा र एक जना वाडमा गरी तीन जना उपचाररत रहेको अस्पतालका सूचना अधिकारी बैकुण्ठप्रसाद थपलियाले बताए ।

...

उपत्यकाका विभिन्न अस्पतालमा भर्ना हुन थालेका बिरामीकाे संख्या हेर्ने हो भने कोरोना भाइरसको संक्रमणदर अझै बढ्ने देखिन्छ । तर, नेपालमा देखिएको कुन भेरियन्ट हो भन्ने अहिलेसम्म पत्ता लागेको छैन ।

सन् २०२२ को अन्त्यतिर भारतमा भाइरसकाे नयाँ भेरियन्ट देखिएको थियो । त्यसयता भारतमा कोरोना भाइरसको नयाँ–नयाँ भेरियन्टका देखिँदै आएका छन् । र, भेरियन्टसँगै बिरामीको संख्या पनि बढ्दै गएको छ । भारतमा पछिल्लो समय ओमिक्रोनका एक्स बी बी.१.१६ सब भेरियन्ट देखा परेको छ । नयाँ भेरियन्टका बिरामीको संख्या बढ्दै गए पनि संक्रमणकै कारण मृत्युदर भने निकै कम देखिएको छ ।

यस्तै भारतमा संक्रमण बढ्दै जाँदा नेपालमा पनि संक्रमण बढ्दै जाने विगतको अनुभवले पनि देखाउँछ । तर, अहिले नेपालमा के कारणले संक्रमण बढिरहेको हो, यो अहिलेसम्म प्रष्ट भने छैन । दैनिक संक्रमितको संख्या बढ्दै गर्दा सुरुवाती चरण जस्तो भयावह अवस्था नहुन सक्ने बताउँछन्, सरुवारोग विशेषज्ञ डा. शेरबहादुर पुन ।

उनले भने, ‘भारतमा देखिएको नयाँ भेरियन्टमा मोडालिटी रेट त्यस्तो देखिएको छैन । र, भाइरस म्युटेसन हुँदा संक्रमणदर धेरै भए पनि मृत्यु कम हुने विभिन्न अध्ययनहरूले देखाएका छन् ।’

त्यस्तै संक्रामक रोग विशेषज्ञ डा. अनुप सुवेदीका अनुसार पुरानो भाइरसभन्दा म्युटेसनपछिको नयाँ भेरियन्ट चाँडो फैलिने प्रकृतिका हुन्छन् ।

उनी भन्छन्, ‘महामारीको डाइनाम्क्सि नै त्यस्तै हुन्छ । सुरुको भन्दा पछि उत्पत्ति हुने भाइसरमा पुरानोभन्दा छिटो र बढी फैलिने क्षमता हुन्छ । यसको प्यार्टन नै यस्ते हुन्छ । तर, मृत्यु गराउने सम्भावना भने कम हुने गर्छ ।’

अहिले बिरामीहरू जाडो हुने, जीउँ दुख्ने, खोकी लाग्ने, नाकबाट पानी बग्ने, टाउको दुख्ने लगायतका लक्षण लिएर अस्पताल पुग्ने गरेको छन् । प्रायः जसो नयाँ भेरियन्टका लक्षणहरू फ्लुसँग मिलदाजुल्दा हुने गर्छन् ।

अब कोरोना भाइरस फ्लुकै रुपमा रहिरहन सक्ने सम्भावना देख्छन्, जनस्वास्थ्यविद् डा. केदार बराल ।

उनी भन्छन्, ‘अहिलेसम्मको स्थिति हेर्दा नयाँ लहर ल्याउने जस्तो देखिँदैन । अब यो फ्लुको रुपमा रहिरहने सम्भाना धेरै देखिन्छ ।’

उनका अनुसार कुनै पनि भाइरसको म्युटेसन धेरै भएपछि त्यसले नयाँ लहर ल्याउने सम्भावना निकै कम हुन्छ । ‘नयाँ लहर आउनका लागि फेरि नयाँ भाइरसको उत्पति हुनुपर्छ । अन्यथा संक्रमण भए पनि भाइरस कमजोर हुँदै जान्छ । र, गम्भीरता निम्त्याउने सम्भावना कम हुन्छ’, उनी थप्छन् ।

covid third lahar suru (10)1628683738.jpg

नेपालमा कोरोना भाइरस संक्रमण कसरी फैलियो भन्ने ठ्याक्कै भन्न नसक्ने अवस्था रहेको स्वास्थ्य तथा जनसंख्या मन्त्रालयका सहप्रवक्ता डा. समिर कुमार अधिकारी बताउँछन् ।

उनी भन्नछन्, ‘ठ्याककै यही कारण देखियो भन्न सक्ने अवस्था छैन । भारतमा संक्रमण फैलिरहेको छ । खुला सिमानाका कारण पनि नेपालमा फैलिएको हुन सक्छ ।’

अर्को भनेको कोभिड सकिएको भन्दै मानिसहरूले जनस्वास्थ्यका मापदण्डको पालना गर्न छोडेका कारण फैलिएको हुन सकने अनुमान मन्त्रालयले गरेको डा. अधिकारीले बताए ।

प्रकाशित मिति: सोमबार, चैत २०, २०७९ १७:४१