वैदेशिक रोजगारीमा गएकाहरूले ‘टेलिमेडिसिन’बाट के-के सुविधा पाउँछन् ? (भिडियो)

वैदेशिक रोजगारीमा गएकाहरूले ‘टेलिमेडिसिन’बाट के-के सुविधा पाउँछन् ? (भिडियो)

A+ A A-

अनलाइनबाटै बिरामीले चिकित्सकसँग परार्मश गर्न सक्ने प्रणाली हो- ‘टेलिमेडिसिन’ । वैदेशिक रोजगारीका लागि विभिन्न देश पुगेका नेपालीलाई लक्षित गरेर वैदेशिक रोजगार बोर्डले टेलिमेडिसिन सेवा सुरू गरेको छ ।

वैदेशिक रोजगार बोर्डका प्रवक्ता राजन पौडेलले विदेशमा रहेका श्रमिक नेपालीहरूलाई स्वास्थ्य परामर्श दिन थालिएको जानकारी दिए । वैदेशिक रोजगारीमा रहेका नेपालीहरूमा नसर्ने रोगको संक्रमण देखिएको तथा कार्यस्थलमै विभिन्न कारणले ज्यान गुमाउने गरेकाले टेलिमेडिसिनमार्फत स्वास्थ्य सेवा दिन थालिएको उनको भनाइ छ ।

‘२०६६ सालपछि वैदेशिक रोजगार बोर्डले वैदेशिक रोजगारीमा रहेका नेपालीहरूको तथ्याङ्क राख्न सुरू गर्‍यौँ । त्यसयता हालसम्म १२ हजार ५ सय नेपाली श्रमिकले कार्यस्थलमै विभिन्न कारणले ज्यान गुमाए,' पौडेल भन्छन्, 'त्यसमध्ये करिब ७० प्रतिशत नेपाली नसर्ने रोगबाट संक्रमित भएको देखियो ।’

वैदेशिक रोजगारीमा गएका नेपालीमा नसर्ने रोगको प्रकोप बढिरहेको उल्लेख गर्दै त्यसलाई कसरी न्यूनीकरण गर्न सकिन्छ ? यसबारे परामर्श दिन टेलिमेडिसिन उपयोगी ठानिएको पौडेल बताउँछन् ।

विदेशमा रहेका नेपालीहरूको हृदयघात, क्यान्सर, मिर्गौला, उच्च रक्तचाप र त्यसबाहेक सवारी दुर्घटनाका कारण मृत्यु हुने गरेको छ । ‘दुर्घटनालाई हेर्दा कुनै श्रमिकको जब मानसिक अवस्था कमजोर हुन्छ । त्यसपछि उनीहरूमध्ये अधिकांश दुर्घटना पर्ने गरेको देखिन्छ,’ पौडेल भन्छन् ।

उनीहरूको मानसिक अवस्था स्वस्थ राख्न, नसर्ने रोगबारे थाहा दिन र अन्य स्वास्थ्यसम्बन्धी जानकारी दिन बोर्डले टेलिमेडिसिनमार्फत परामर्श सेवा दिन सुरू गरेको हो ।

प्रवक्ता पौडेलका अनुसार वीर अस्पतालका विशेषज्ञ चिकित्सकबाट स्वास्थ्य परामर्श लिन चाहने नेपाली श्रमिकले ९८५१३४५७०१ र ९८५१३४५७०२ नम्बर र यिनै नम्बरमा रहेको भाइबर, ह्वाट्सएप, इमो वा अन्य सामाजिक सञ्जालबाट फोन गरेर परामर्श लिन सक्नेछन् ।

‘उहाँहरूलाई हामी आवश्यक औषधि लेखेर सामाजिक सञ्जालबाटै प्रेस्क्रिप्सन पठाउँछौँ’, पौडेलले शिलापत्रसँग भने, ‘त्यसअनुसार उहाँहरूले नेपाली औषधि पसलमा गएर किनेर खान सक्नुहुन्छ ।’