राम्रो कमाइ हुने भन्दै श्रीमान्‌-श्रीमती मिलेर युवतीहरूलाई दिल्ली पुर्‍याउँथे, अनि लगाउँथे यौनधन्दामा

राम्रो कमाइ हुने भन्दै श्रीमान्‌-श्रीमती मिलेर युवतीहरूलाई दिल्ली पुर्‍याउँथे, अनि लगाउँथे यौनधन्दामा

A+ A A-

धादिङ धुनबेँसीकी १९ वर्षीया पूजा तामाङ (नाम परिवर्तन) बालाजु माछापोखरीस्थित एक नाइट क्लबमा काम गर्थिन् । सामान्य लेखपढ गर्न सक्ने उनी नाइट क्लबमा काम गर्ने भएकाले राम्री भएर हिँड्ने गर्थिन् ।

फागुन पहिलो साता भने उनको भेट धादिङ धुनबेँसी- २ का २५ वर्षीय भुवन तामाङसँग भेट भयो । आफ्नै छिमेकी गाउँका भुवनसँगको भेटले पूजा हर्षित थिइन् । पूजा र भुवनको भेटघाट बाक्लिँदै गयो । भुवनले पूजालाई भारतको दिल्लीमा होटल, रेस्टुरेन्ट र फेन्सीमा काम गर्दा नेपालमा भन्दा राम्रो पैसा कमाउन सकिने आश्वासन दिए । पूजा भुवनको कुरामा राजी भइन् ।

भुवन मात्रै होइन, उनकी श्रीमती सुष्मा मग्रातीसँग समेत पूजाको कुराकानी हुन थाल्यो । भुवन र सुष्मा दुवैले दिल्लीमा राम्रो कमाइ हुने आश्वासन दिएपछि पूजा दिल्ली जान तयार भइन् । भुवनले पूजा मात्रै होइन, माछापोखरीकै विभिन्न डान्सबार र रेस्टुरेन्टमा काम गर्ने अन्य युवतीहरूलाई समेत दिल्लीमा राम्रो पैसा कमाइ हुने भनेर प्रलोभनमा पारिसकेका थिए ।

भुवनको सम्पर्कमा पुगेका युवतीहरू सबै उनीसँग दिल्ली जान तयार भए । फागुन महिनामा मात्रै पूजासहित ९ जना युवतीलाई दिल्ली पुर्‍याउन भुवन सफल भए । उनीहरूलाई भुवनले काठमाडौंबाट नेपालगञ्जको जमुनाह नाकाहुँदै दिल्ली पुर्‍याएका थिए ।

दिल्ली पुर्‍याएपछि बन्धक बनाएर लगाए यौनधन्दामा

भुवनको प्रलोभनमा परेर राम्रो कमाइ हुने आसमा युवतीहरू दिल्ली पुगे । तर, दिल्ली पुगेपछि भने उनीहरूले सोचेभन्दा फरक परिस्थितिको सामना गर्नुपर्‍यो ।

होटल, रेस्टुरेन्ट र फेन्सी पसलमा आकर्षक तलब हुन्छ भनेर दिल्ली पुर्‍याएपछि भने उनीहरू सबैलाई एउटै फ्ल्याटमा राखेर बाहिर जानसमेत प्रतिबन्ध लगाइयो । उनीहरू बसेको कोठाको निगरानी गर्न सीसी क्यामेरा जडान गरियो । कोठामा बसेको केही समयपछि नै अपरिचित पुरुषहरूको आवतजावत बाक्लिन थाल्यो ।

त्यसरी आउने पुरुषहरू भुवनले कोठामा राखेका युवतीहरूको फोटो ह्वाट्सएपमार्फत पठाएर यौनधन्दाका लागि बोलाइएकाहरू हुन्थे । भुवनले उनीहरूलाई फ्ल्याटमा राखेर यौनधन्दामा लगाएका थिए । कतिपय युवतीलाई भने ट्याक्सीमा राखेर होटलदेखि घरसम्मै यौनधन्दाका लागि पठाएका थिए ।

यसरी गरियो उद्धार

दिल्लीमा नेपाली युवतीलाई बन्धक बनाएर यौनधन्दामा लगाइएको सूचना प्रहरीको मानव बेचबिखन नियन्त्रण ब्युरोलाई आयो । त्यही सूचनाका आधारमा अनुसन्धान थालेको ब्युरो पीडित युवतीहरूलाई दिल्ली किसनगढस्थित पञ्जावी ढावाको एक घरबाट उद्धार गरेर नेपाल ल्याउन सफल भएको हो ।

उद्धार गरेर नेपाल फर्काइएका युवतीहरूकै उजुरीका आधारमा ब्युरोको टोलीले भुवन तामाङ, उनकी श्रीमती सुष्मा मग्राती र मकवानपुर भीमफेदी- ९ का २० वर्षीय सम्झना तामाङ उर्फ सेन्जी तामाङलाई समेत पक्राउ गरिएको ब्युरोका एसपी कृष्ण पंगेनीले जानकारी दिए ।

पक्राउ परेकाहरूबाट भुवनकै योजनामा उनीहरूलाई नेपालगञ्जहुँदै दिल्ली पुर्‍याइएको खुलेको छ । उनीहरूले अन्य युवतीलाई समेत भारत पुर्‍याएर यौनधन्दामा लगाएको आशंका ब्युरोको छ । पक्राउ परेकामाथि प्रहरीले सात दिनको म्याद थप गरेर अनुन्धान थालेको ब्युरोले जनाएको छ । नौ जना युवतीलाई भारतस्थित नेपाली दूतावास, नेपालस्थित शक्ति समूह र भारतीय प्रहरीको सहयोगमा नेपाल फर्काइएको हो ।

प्रकाशित मिति: मंगलबार, चैत १४, २०७९ १५:१९