अस्ट्रेलियामा यस वर्ष ५० लाख कंगारु मारिँदै, किन मारिन्छन् यो जीव ? (भिडियाे)

कंगारु त्यस्तो दुर्लभ जनावर हो, जुन अस्ट्रेलिया र पपुवा न्युगिनीमा मात्र पाइन्छ ।

पपुवा न्युगिनीमा ट्रि कंगारु पाइन्छ, जसको संख्या मात्र ३ सयदेखि ५ सयको हाराहारीमा छ । उता अस्ट्रेलियामा भने कंगारुको संख्या ३ करोड ६५ लाख रहेको अस्ट्रेलियाको सरकारी तथ्यांकले देखाएको छ ।

कंगारुको संख्या गणना गर्नु निकै गाह्रो काम हो । अस्ट्रेलियाका ६ राज्यले हेलिकोप्टरमार्फत कंगारुको गणना गर्ने सीएनएनले जनाएको छ ।

अस्ट्रेलियाले हरेक वर्ष लाखौँ कंगारु मार्नका लागि कोटा पनि तय गर्छ भन्दा तपाईंलाई अचम्म लाग्छ, तर त्यो सत्य हो । यस वर्ष मात्र अस्ट्रेलियाका न्यु साउथ वेल्स, क्वीन्सल्यान्ड, भिक्टोरिया, साउथ अस्ट्रेलिया र वेस्टर्न अस्ट्रेलियामा ५० लाख कंगारु मारिने कोटा तय भएको सीएनएनले जनाएको छ ।

गार्डियनका अनुसार यस वर्ष भिक्टोरिया राज्यमा २ लाख ३६ हजार ३५० कंगारु मारिँदैछन् । गत वर्षभन्दा यस राज्यमा २७ प्रतिशत बढी कंगारु मार्न अनुमति दिइएको हो । यस देशमा जग्गा धनीहरूलाई कंगारु मार्ने लाइसेन्स नै प्रदान गरिन्छ ।

अस्ट्रेलियाको कंगारु उद्योग संघका अनुसार कंगारुको मासु र छाला बेचेरै अस्ट्रेलियाले वर्षको १ सय ३३ मिलियन अमेरिकी डलर आर्जन गर्छ । कंगारु मार्नुलाई अधिकारवादी संस्थाले विश्वभर विरोध पनि जनाएका छन् ।

यद्यपि अस्ट्रेलियाको सरकारले भने कंगारुको संख्या अत्यधिक भएकाले त्यसलाई मार्नुबाहेक उपाय नभएको बताउँछ ।

कंगारु धेरै हुँदा यसले मानिसलाई आक्रमण गर्ने, बालीनाली नष्ट गर्ने गर्दछन् । यसले जमिन नै कब्जा गरेर बस्ने र अन्य जनावरहरूलाई पनि मार्ने हुनाले संख्या नियन्त्रण गर्न मार्नुपरेको जनावरविज्ञहरू नै बताउँछन् ।

खडेरीको समयमा कंगारु आफैँलाई भोकमरीबाट जोगाउन पनि नियमित रूपमा कंगारु मार्न आवश्यक भएको उनीहरू बताउँछन् ।

अस्ट्रेलियाको क्वीन्सल्यान्डको मारुम भन्ने ठाउँ यतिबेला कंगारुको कब्जामै गएको छ । त्यहाँ २२० घर छन् तर कंगारुको संख्या बढी भएकाले त्यहाँ उक्त जनावरले मानिसहरूलाई आजित बनाएका छन् ।

कंगारु खाना खोस्न किचनसम्मै आउने गरेका छन् । यदि मानिसहरू कंगारुको प्रतिकारमा उत्रिए कंगारुले मानिसहरूलाई कुट्ने गरेको पनि बताइएको छ । सीएनएन र एजेन्सीको सहयोगमा

प्रकाशित मिति: सोमबार, चैत १३, २०७९ १४:५०