सामाजिक सुरक्षा कोषमा आबद्ध हुँदा विदेशमा रहेका श्रमिकलाई चार फाइदा (भिडियो)

सामाजिक सुरक्षा कोषमा आबद्ध हुँदा विदेशमा रहेका श्रमिकलाई चार फाइदा (भिडियो)

A+ A A-

वैदेशिक रोजगारीमा गएका श्रमिकहरूका लागि सामाजिक सुरक्षा कोषले दुर्घटना, असक्तता, आश्रित परिवार र वृद्धावस्था गरी चार प्रकारका सामाजिक सुरक्षा योजना ल्याएको छ ।

एक वर्षमा दुर्घटना परेर अस्पतालमा भर्ना भई उपचार गर्नुपरे कोषले एक लाखसम्मको भुक्तानी गर्ने सामाजिक सुरक्षा कोषका कार्यकारी निर्देशक कपिलमणि ज्ञवालीले बताए । उनका अनुसार दुर्घटनामा परेर असक्त भए जीवनभर काम गर्न नसक्ने अवस्थामा न्यूनतम मासिक पारिश्रमिक ९ हजार ३८५ रुपैयाँको ६० प्रतिशतले हुन आउने ५ हजार ६३१ रकम कोषले दिनेछ । यसलाई कोषले असक्ततावृत्ति भनेको छ ।

कोषले ल्याएको आश्रित परिवार योजनाअन्तर्गत कुनै कारणले मृत्यु भए मृतकको हकवालाले न्यूनतम मासिक पारिश्रमिकको ६० प्रतिशत रकम आजीवन र मृतकका सन्ततिले त्यति नै बराबरको छात्रावृत्ति पाउने जनाएको छ । यो योजनाका आधारमा सन्तति २१ वर्ष नपुग्दासम्म छात्रावृत्ति रकम प्राप्त हुन्छ ।

त्यस्तै, वृद्धावस्था सुरक्षा योजनाअन्तर्गत भने आयआर्जन गर्ने बेलामा कमाएको पैसाबाट निश्चित रकम कोषमा सञ्चित हुन्छ । योजनाअनुसार सञ्चित भएको रकमबाट ६० वर्षपछि कोषले जम्मा भएको रकम र त्यसले कमाएको रकम जोडेर १६० ले भाग गर्दा हुन आउने रकमलाई हरेक महिना बाँचुञ्जेल पेन्सन उपलब्ध गराउँछ ।

वैदेशिक रोजगारीमा जानेको हकमा फर्केर आएपछि यहाँ कार्यान्वयनमा आएको औपचारिक क्षेत्रको सामाजिक सुरक्षा, स्वरोजगारको सामाजिक सुरक्षा भन्ने योजनाहरू कार्यान्वयनमा हुन्छन् । वैदेशिक रोजगारबाट फर्केर आएपछि पनि योजना परिर्वतन गर्न सकिन्छ ।

वैदेशिक रोजगारबाट फर्केर औपचारिक क्षेत्रमा काम गरेको खण्डमा त्यही सामाजिक सुरक्षा कोषको नम्बर र रकम ट्रान्सफर गर्न सकिन्छ । तीन वर्षसम्म कुनै पनि दाबी नपरेको खण्डमा २० प्रतिशत प्रिमियममा छुटको व्यवस्था रहेको र जो विदेशमा श्रम गरिरहेकाहरूको सुरक्षाका निम्ति योगदानमा आधारित सामाजिक सुरक्षा वैदेशिक रोजगारका लागि कार्यान्यनमा आएको ज्ञवलीले बताए ।

यसले वैदेशिक रोजगारमा रहेकाहरूको दुर्घटना, असक्तता, आश्रित परिवारलाई पनि सहयोग गर्ने र उसले पठाएको कमाई औपचारिक माध्यमबाट आयो भने राष्ट्रिय अर्थतन्त्रमा पनि गणना हुने भएकाले यी सबै कुरामा सहजीकरण हुने गरी यो योजना कार्यान्यनमा ल्याइएको ज्ञवालीको भनाइ छ ।

यसयोजना अन्तर्गत मासिक २ हजार दुई रुपैयाँ जम्मा गर्नुपर्ने हुन्छ । त्यसलाई दुई भागमा लगाइएको छ । एउटा ७ सय दुई रुपैयाँ र १३ सय रुपैयाँ । मासिक ७ सय दुई रुपैयाँ दुर्घटना, असक्तता र आश्रित परिवार सुरक्षा योजनालाई कभर गर्छ । मासिक १३ सय अन्तर्गत वृद्धावस्था सुरक्षा योजना हो ।

विदेशमा कमाएको पैसा सामाजिक सुरक्षा कोष जम्मा गर्न चाहनेले अधिकतम २८ हजार १ सय ५० रुपैयाँसम्म मासिक रूपमा जम्मा गर्न सक्छन् । यसरी जम्मा गरेको रकम बैंकमा जम्मा गरेको जस्तै भएको र सो रकमको ब्याज कोषले उपलब्ध गराउने ज्ञवाली बताउँछन् ।

विदेशमा रहेकाहरूले सामाजिक सुरक्षा कोषको वेभसाइड लग इन गरेर सहजै यस योजनामा सहभागी हुने व्यवस्था मिलाइएको उनले बताए । भुक्तानीका निम्ति भने विभिन्न मोबाइल एप तथा रेमिट कम्पनीलगायत माध्यमबाट सहजै गर्न सकिने उनको भनाइ छ ।

थप जिज्ञासा रहेकाहरूलाई कोषले कल सेन्टरसमेत सञ्चालनमा ल्याएको र त्यहाँ सम्पर्क गरेर जिज्ञासा राख्न सकिने ज्ञवलीले जानकारी दिए ।

प्रकाशित मिति: शुक्रबार, चैत १०, २०७९ १८:१६