‘गुम्फन’मा युवाका कुरा

A+ A A-

एलिना दुःखी हुनुपर्ने कारण छैन । मोटोपनबाहेक उनको समस्या छैन । एक्लो भएकै कारण उनलाई असर गरिरहेको हुन्छ । अनि साथिको पासवर्ड प्रयोग गरेर अनलाईन गार्डेनमा पुग्छिन् ।

गार्डेनमा एलिना र डार्क फ्लोको भेट हुन्छ । डार्कले एलिनालाई राम्रोसँग बुझ्छ । डार्क पनि एलिना जस्तै निराश हुन्छ । साइबर संसारमा अहिलेको पुस्ता हराएका छन् । आफ्नो व्यक्तिगत जीवन्, आफन्तसँगको सम्बन्ध र मानवीयता गुमाउदै गएको अहिलेको पुस्तामा आधारित नाटक हो ‘गुम्फन’ । शिल्पी नाटकघर बतिसपुतलीमा मञ्चन भइरहेको छ ।

‘पछिल्लो समय जति पनि नाटक मञ्चन भएका छन् ती राजनीतिक विषयबस्तुमा आधारित छन्’ गुम्फनका निर्देशक दिलिप रानाभाट भन्छन्, ‘युवाहरुको कथा व्यथामा आधारित नाटक कमै मञ्चन भए । युवालाई टार्गेट गरेर ल्याएको हो, नाटक गुम्फन ।’

‘अहिलेका युवा समस्यासँग रियल लाइफमा फेस गर्दैनन् । फेस टु फेस बोल्दनन् । इन्टरनेट, सामाजिक सञ्जाल, भर्चुअल दुनियाँबाट मात्र फेस गर्छन् । यसले व्यक्तिगत जीवन, समाज र परिवारमा पारेको प्रभाव नाटकमा देखाउन खोजिएको छ ।’ निर्देशक रानाभाट भन्छन् ।

एलिसा सालोको फिनिस नाटक ‘रयादेस्सवारा’ बाट प्रभावित यस नाटकलाई नेली केइनानेन र लिया अब्सेसको अंग्रेजी अनुवाद ‘फलिङ’ बाट जिवेश रायमाझीद्वारा नेपालीमा अनुवाद गरिएको हो । यसलाई नेपाली परिवेश र अहिलेको सामाजिक परिस्थितिसँग जोड्न खोजिएको छ ।

नाटकमा अद्ववेत अकेला, अभिषेक गैरे, इष्टु कार्की, आयुष्ना गिरी, संगिता थापा, एचके अधिकारी, गुगल लामा, मदन सुवेदी, प्रमोद खड्का, पिबिएस रिदमलगायतको अभिनय छ ।

नाटक थियटर भिलेजको प्रस्तुति हो । लाजिम्पाटमा रहेको थियटर भिलेज भत्किएपछि शिल्पी नाटकघरमा गुम्फन प्रस्तुत गरिएको हो । गुम्फन २९ भदौसम्म मञ्चन हुनेछ ।