भागवण्डाअघि नै विश्वासको मत लिने जम्मकट्टेलको प्रयासमा कांग्रेसले लगायो ब्रेक

भागवण्डाअघि नै विश्वासको मत लिने जम्मकट्टेलको प्रयासमा कांग्रेसले लगायो ब्रेक

A+ A A-

बागमती प्रदेशका मुख्यमन्त्री शालिकराम जम्मकट्टेल वर्तमान सत्ता गठबन्धनको शीर्ष तहमा सबै प्रदेशको नेतृत्व भागवण्डा लाग्नुअघि नै विश्वासको मत लिने तयारीमा थिए । तर, जम्मकट्टेलको यो योजनामा कांग्रेसले ब्रेक लगाइएदिएको छ ।

त्यसो त जम्मकट्टेलले कांग्रेससँग छलफल नै नगरी विश्वासको मत लिने मिति तय गरेका थिए । जम्मकट्टेलले एकल रूपमा विश्वासको मत लिने तयारी गरेपछि कांग्रेस तर्कियो । कांग्रेससँगको यही छिनाझप्टीका कारण जम्मकट्टेलले आज लिने भनिएको विश्वासको मत नलिने भएका छन् ।

सुरुमा कांग्रेसले प्रदेशका गठबन्धन दलसँग सरकारका सम्बन्धमा सहमति नभएसम्म विश्वासको मत नदिने अडान लिएको थियो । तर, जम्मकट्टेल भने परिवर्तित अवस्थामा कांग्रेसले आफूलाई विश्वासको मत दिने निष्कर्षसहित आज विश्वासको मत लिने तयारीमा थिए । तर, पार्टीको केन्द्रीय नेतृत्वसँग 'छलफल' गर्न काठमाडौं गएका कांग्रेसका सांसदहरू हेटौँडा नफर्किएपछि जम्मकट्टेल पछि हट्न बाध्य भएका हुन् । आज ३ बजेसम्म कांग्रेस सांसदहरू हेटौँडा नआएपछि जम्कट्टेलले विश्वासको मत लिने मिति सारेका हुन् ।

कांग्रेसले जम्मकट्टेललाई विश्वासको मत दिने निर्णय त गरेको छ, तर उक्त निर्णय भने आजै कार्यान्वयन हुने स्थिति छैन । किनभने कतिपय कांग्रेस सांसदहरू काठमाडौंमा छन् । त्यसो भए जम्मकट्टेलले कहिले लिन्छन् त विश्वासको मत ?

माओवादी केन्द्रका एक सांसदका अनुसार १० चैतमा विश्वासको मत लिन प्रदेशसभा बैठक बोलाउने तयारी भएको छ । ‘आज बैठक नबस्ने भइसक्यो । अब १० बते बैठक बोलाउने तयारी छ । प्रदेशसभा सचिवालयबाट सूचना आउँदैछ,’ उनले भने । ती सांसद पनि विश्वासको मत दिने मिति सरेपछि औपचारिक कार्यक्रममा सहभागी हुन हिँडिसकेका छन् ।

कांग्रेसले बागमतीको मुख्यमन्त्रीमा आफ्नो स्वाभाविक दाबी रहेको बताउँदै आएको छ । कांग्रेसले जम्कट्टेल अघिल्लो गठबन्धनबाट मुख्यमन्त्री बनेको र सत्ता समीकरणमा परिवर्तन आएपछि नयाँ सिराबाट अगाडि बढ्नुपर्ने बताइरहेको छ । देशका सात प्रदेशको भागवण्डा अझै लागिसकेको छैन । तर, जम्कट्टेले भागवण्डा अगाडि नै विश्वासको मत लिएर सरकारको आयु लम्ब्याउने रणनीति बनाएको कांग्रेस सांसदहरूको दाबी छ ।

विश्वासको मत दिए पनि सरकारमा सहभागिताको विषयमा सहमति हुनुपर्ने कांग्रेसको प्रस्तावलाई जम्कट्टेलले बेवास्ता गरेपछि कांग्रेसका सांसदहरू बुधबार हेटौँडा आएनन् ।

प्रदेश सरकार अब नयाँ सिराबाट अगाडि बढ्ने कांग्रेस मुख्य सचेतक कुन्दनराज काफ्ले बताउँछन् । मुख्यमन्त्री जम्कट्टेल भने २ बजेसम्म पत्रकारहरूसँग कुरा गर्दै कांग्रेसका सांसदहरूले आज साँझसम्म भए पनि हेटौँडा आएर विश्वासको मत दिने बताइरहेका थिए ।

संवैधानिक व्यवस्थाअनुसार जम्कट्टेलले १३ चैतभित्र विश्वासको मत लिइसक्नुपर्नेछ । कांग्रेसले छलफल नै नगरी विश्वासको मत राखेको प्रति सरकारको आयु लम्ब्याउने रणनीतिको रूपमा कांग्रेसले हेरेको छ ।

‘विश्वासको मत लिएपछि मुख्यमन्त्रीमै रहिरहने उहाँको रणनीति हो । भागवण्डामा पनि विश्वासको मत पाएपछि सरकार नछोड्ने माओवादी केन्द्रको अडान हुन्छ,' कांग्रेस बागमतीका एक शीर्ष नेता भन्छन्, 'हामी गठबन्धनको निर्णयअनुसार अगाडि बढ्नुपर्छ भनिरहेका छौँ, त्यसमाथि हामीसँग छलफल पनि गरिएन ।’

बागमती प्रदेशमा कांग्रेस ३७ सिटसहित सबैभन्दा ठूलो दल रहेकाले मुख्यमन्त्रीमा स्वाभाविक दाबी रहेको संसदीय दलको नेता बहादुर सिंह लामा बताउँछन् ।

‘हामी सबैभन्दा ठूलो दल हो । निर्वाचनपछि बन्ने सरकारमा पनि हाम्रो मुख्यमन्त्री दाबी स्वाभाविक थियो । अब पनि दाबी हाम्रै हुन्छ,’ लामाले भने ।

यद्यपि, गठबन्धनको निर्णयअनुसार कांग्रेस अगाडि बढ्ने बताउँछन् लामा । लामाको भनाइमा गठबन्धनको प्रदेश भागवण्डाको टुंगो नलाग्दासम्म विश्वासको मत दिन नसक्ने आशय व्यक्त भएको बुझिन्छ । तर, विश्वासको मत दिए पनि कांग्रेससँग जम्कट्टेलले लिखित सहमति गर्नुपर्ने उनको अडान छ ।

बागमतीमा कांग्रेसको मतबिना जम्कट्टेललाई विश्वासको मत पाउन मुस्किल छ । उनलाई सरकार गठनका बेला समर्थन गरेका नेकपा एमाले र राप्रपाले सहयोग गर्ने अवस्था छैन । त्यसमाथि गठबन्धनकै नेकपा एस पनि कांग्रेसको पक्षमा छ । कांग्रेसले अड्को थापेपछि मुख्यमन्त्री जम्मकट्टेल थप अप्ठेरोमा परेका हुन् ।

‘सरकारका सम्बन्धमा कुनै सहमति नभएसम्म विश्वासको मत दिन सकिँदैन भनेको हो । हामीले गठबन्धनको मर्मअनुसार मुख्यमन्त्रीज्यूलाई विश्वासको मत दिन्छौँ । तर, सहमति हुनुपर्छ,’ कांग्रेस मुख्य सचेतक काफ्ले भन्छन् ।

यद्यपि, नेपाली कांग्रेस प्रदेश कार्यसम्पादन समितिको मंगलबार काठमाडौंमा बसेको बैठक र बुधबार मध्याह्न १२ बजे काठमाडौंमै बसेको संसदीय दलको बैठकले मुख्यमन्त्री जम्मकट्टेललाई विश्वासको मत दिने निर्णय भने गरिसकेको छ ।

यसअघि २५ पुसमा नेकपा एमाले, माओवादी र राप्रपाको गठबन्धनबाट जम्मकट्टेल मुख्यमन्त्रीमा नियुक्त भएका थिए । सरकार गठन हुँदाको राप्रपाले भने सरकारलाई दिएको समर्थन १३ फागुनमै फिर्ता लिइसकेको छ । ३ माघमा प्रदेशसभाका दुईतिहाईभन्दा बढी सांसदको विश्वासको मत पाएका जम्मकट्टेलले मुख्यमन्त्री नियुक्त भएको ६५ दिनमा नै दोस्रोपटक बुधबार विश्वासको मत लिन लागेका थिए ।

बागमती प्रदेशसभामा कुल सातवटा दलको प्रतिनिधित्व छ । प्रदेशसभामा कांग्रेसको ३७, एमालेको २७, माओवादीको २१, राप्रपाको १३, एकीकृत समाजवादीसँग ७, नेमकिपासँग ३ र हाम्रो नेपाली पार्टीसँग २ मत छ । ११० सदस्यीय प्रदेशसभामा सरकार गठनका लागि ५६ सांसद् आवश्यक हुन्छ । नयाँ सत्ता समीकरणमा कांग्रेस, माओवादी र एकीकृत समाजवादी एक भएसँगै सरकार गठनमा बहुमत पुग्छ ।

प्रकाशित मिति: बुधबार, चैत ८, २०७९ १६:२२