युट्युबरको बजारमा काजु बदनाम (ब्लग)

A+ A A-

पिर, चिन्ता लिएर गम्भीर कुरा गर्न हामीसँग सग्ला-सग्ला ६ बार छँदैछन् । आउनुस्, आजकाे एक बार रोचक कुरा गरौँ ।

मान्छे बदनाम हुने कुरा त यो पापी संसारमा नौलो भएन । भारतकी मुन्नीले आफू बदनाम भएँ भनिरहँदा मानिसहरू रक्सीको गिलास हातमा लिएर नाचेका थिए । नेपालमै खुमानन्द गाैतमले प्रेमिकाका कारण आफू बदनाम भएको भनेर गीतै लेखेका छन् । प्रेमिका फर्केर आइनन् । मान्छे, मान्छेकै कारणले बदनाम हुनु अब सामान्य भइसक्यो । बरा, खानेकुराको के दोष ! त्यसले समेत बदनामीको टीका लाउनुपरेको छ ।

स्वास्थ्यलाई लाभैलाभ दिने गुनिलो खानेकुरा काजुलाई हाम्रा युट्युबरले ‘कन्डम’ भन्दा मुन्तिर लगेर छोडिदिए । फेरि कन्डमलाई कम आँकेको चाहिँ होइन है !

अहिले मलाई बानेश्वरबाट चाबहिल पुग्न २० मिनेट लाग्छ । संसारमा कन्डमको आविष्कार हुँदैनथ्यो भने यही दूरीकाे यात्रा गर्न मलाई दुई घण्टा लाग्न सक्थ्यो । त्यसैले यसको फाइदामाथि मेरो कुनै शंका र प्रश्न छैन । तर जति फाइदा भए पनि किन्न त लाज लाग्छ नै, खासगरी अविवाहितले आफैँलाई नढाँटी भन्नुहोस्- हो कि होइन ? बजारमा हिँड्दाहिँड्दै किनेर खान सकिने काजुलाई त्यही दाँजोमा लगे भन्न खाेजेकाे मात्र हाे ।

शेयरबजारजस्तो हुन्थ्यो भने दुई साताभित्र काजुको बदनामीले ‘सर्किट ब्रेक’ हानिसक्थ्यो । मेरै कतिपय साथीहरू भन्न थालेका छन्, पसलमा काजु किन्न जानसमेत लाज लाग्न थाल्यो यार ! मेरा ढँटुवा साथीले जे भने पनि तथ्याङ्कले चाहिँ काजुकाे बिक्री बढेकै देखाउँछ । मतलब केटाकेटीले काजु किन्न छाडेका छैनन् । फरक के भने, पहिला खुलमखुल्ला किन्न सकिने काजु किन्नुअघि यताउती मान्छे हेर्नुपरेको छ । मानौँ, काजु खाएपछि हामीले बिगारै गर्न लागेका छौँ । नत्र एकैछिनलाई यो लेख पढ्न रोकिनुस्, अनि छेउको कसैलाई काजुबारे केही सोध्नुस् त ! हाउभाउ र प्रतिक्रिया मैले दाबी गरेजस्तो आएन भने के निश्चित हुनुस् भने, सबै मान्छे युट्युबका त्यस्ता काइते भिडियो हेरेर बस्ने फुर्सदमा हुँदैनन् ।

अस्ति बिहीबार पसलमा गएर एक पुरिया काजु मागेको, पसले बाबैले मुसुमुसु हाँस्दै शिरदेखि पाउसम्म हेरे । अचेल कन्डम किन्न जाँदा पनि मेडिकलवालाले त्यसरी हेर्दैनन् यार ! अनि रिस उठ्दैन त ? याे मेराे मात्र चिन्ता हाे र ?

ल हेर्नुस् त चिन्तकहरू कति छन्..

काजु काण्डको जननी अर्को एक काण्ड नै रहेछ, जसमा जोडिन्छन् रोचक टीभी प्रस्तोता ऋषि धमला । अनि उनीसँग जोडिन आइपुग्छिन् स्वघोषित अभियन्ता शर्मिला वाइबा । धमला र शर्मिलाबीचको कुरा के हो, युट्युबर नै जानून् । तर, यसबीचमा छिराएर काजुलाई बदनाम गरेको कुरा मलाई हजम नभएको हो । र, मजस्तै धेरैलाई पक्कै हजम नभएको हुनुपर्छ ।

याे पनि..

बालेन धाेवीखाेलामा पसे

एक दिन युट्युबले एक भिडियो सिफारिस गर्‍यो, जसको थम्बनेलमा धमला, बाइबा, युट्युबर सन्तोष देउजालाई देखाइएको छ । बाइबाले आफ्नो मोबाइलमा केही देखाएकी छन् तर स्क्रिनलाई ब्लर गरिएको छ । थम्बनेल टेक्स्ट छ, ऋषि धमला कार्यालयबाटै पक्राउ, खै के जाति चाटेको आरोप (खै के जाति भन्नाले यहाँ मलाई भन्न उचित लागेन) ।

होइन के के आरोपमा समाउन थालेछ पुलिसले भनेर भिडियो खोलेँ । त्यहाँ न धमला थिए, न देउजा । बाइवासँग मात्र एक युट्युबरले अन्तर्वार्ता लिइरहेका छन् । उनी धमलासँग आफ्नो सम्बन्धबारे बोलिरहेकी छन् । युट्युबरले सोध्छन्, 'काजु खानुहुन्थ्यो उहाँले ?'

बाइवाले भन्छिन्, 'अँ' ।

शीर्षक तल-

काजु खाएर धमलाले दिनकै... के जाति... ! खासमा यहीँबाट जन्मिएको रहेछ काजु काण्ड ।

खाने धमला, बदनाम हुनेचाहिँ काजु ? यो त भिडियो हाल्ने युट्युबर, गाली खाने पत्रकार जस्तो भएन र ? केही साथीहरूले ट्विटरमा यस्ताे पनि लेख्न भ्याइसकेछन्: काजुका कारण धमला बलवान् तर धमलाका कारण काजु बदनाम ।

कुरा यतिमै राेकिएकाे भए यस्ताे ताेरी ब्लग किन लेखेर बस्थेँ र म । कुरा यतिमै राेकिँदैन क्या । एक जनाले गीतै बनाइसकेछन्ः

पावर दियो बदाम र काजुले
काम बिगारे धमला दाजुले ।

बजारमा गीतै आइसकेपछि ब्लग आउनु कुन ठूलो कुरा हो । अरु त अरु समाजशास्त्री मेडम निर्मला ढकालले पनि चिन्ता जाहेर गर्नुभएको छ, हेर्नुस्:

काजु किन्न पनि अब त ड्रग्स किनेझैँ लुकेर माग्नुपर्ने अवस्था आइपर्‍यो !

— Nirmala Dhakal (@Nirmaladhakal44) March 20, 2023

धेरैका लागि काजु त्यही हिमालयन रिजर्भजस्तो भएको छ, स्वाद र असर टेस्ट गर्न मन त छ तर कसैले केही साेच्लान् कि भन्ने हिचकिचाहट पनि छ । यहाँ पनि सच्याइहालेँ, यस्तो सबैलाई हुन्छ भन्नेचाहिँ हुँदैन ।

काजु त गुणकारी खानेकुरा हो । यो महिला–पुरुष जोकसैले मजाले खान सक्छन् । यसका फाइदाहरू के-के छन् यहाँ क्लिक गरी पढ्न सक्नुहुन्छ ।

याे पढ्नुस् त...

हरेक दिन काजु खानुका चार फाइदा

यसअघि युट्युबरको बजारमा 'अभियन्ता' भन्ने शब्दले बदनामीको ताज पहिरिइसकेको छ । पहिला अभियन्ता हुन होडबाजी गर्नेहरूलाई अहिले अभियन्ता भन्यो भने कुटूँलाझैँ गर्छन् । त्यसबेलाका केही अभियन्ताले त परिचय नै फेरिसकेका छन्, कोही माननीय भइसके, कोही टीभीमा कार्यक्रम चलाउन पुगिसके, कोही नेता भइसके, काेही विदेश जाँदा ठगिएकाहरूका लागि उद्धारकर्ता रे । अचेल युट्युबका हेडलाइनबाट अभियन्ता भन्ने शब्द करिब गायब भइसकेको छ ।

त्यसपछि राजनीतिक विश्लेषक भन्ने शब्दकाे पनि चीरहरण भयाे । युट्युबरले बनाएका राजनीतिक विश्लेषकले बुढाबुढीको झगडादेखि कथित् अघोरी बाबाको अभिव्यक्ति अनि भाले हराएकाे घटनासम्मकाे नालीबेली निकाल्थे । यस्तै विश्लेषणका कारण कतिपयलाई भोटाहिटीको साइबर ब्युरोले केही दिन निस्तो र बासी भात पनि खुवाएको थियो । अचेल राजनीतिक विश्लेषक भएर युट्युबमा देखिनेको संख्या कमै छ ।

म के सच्याइहाल्छु भने, नेपालमा भएभरका युट्युबर सबै यस्तै तोरी पाराका छैनन् । केही युट्युबरले त मूलधारकै मिडियालाई उछिनेर कन्टेन्टहरू पस्किरहेका छन् । उनीहरूप्रति उच्च सम्मान छ । तर, केही युट्युबरले आफूलाई पत्रकार भन्दै बनाइरहेका भ्रामक भिडियो देखेर वास्तविक पत्रकार त सर्मले भुतुक्क हुन्छ भने आचारसंहिताभित्र रहेर काम गरिरहेका वास्तविक युट्युबरलाई कति रिस उठ्दो हो, यो कुरा उनीहरूलाई जति कसलाई थाहा होला र !

जाँदाजाँदै धमला सरलाई प्रश्न- युट्युबमा चरित्रहत्या गर्ने युट्युबरलाई रुँदै मिडियामा आउने बनाउन तपाईंले किन ढिला गर्नुभएकाे ? भोटोहिटीलाई यसाे खबर गरिदिए त पुगिहाल्थ्याे हाेला ! चरित्रहत्यासँगै फोनमा कुरा गरेकाे अडियोसमेत एकपछि अर्को गर्दै युट्युबमा अपलोड भइरहेको देख्न सकिन्छ ।

अब एक लाइन काजुतिरै फर्काैं, आफ्नो पैसा हालेर, आफ्नो स्वास्थ्यका लागि काजु होस् कि कन्डम, ढुक्कले किनौँ । तर के भने, काजुबाट प्राप्त बलको दुरुपयोग नगरौँ ।

खैर, यो सबै जलवायु परिवर्तनकै असर हो ।

प्रकाशित मिति: शनिबार, चैत ११, २०७९ ०७:१९