गहिरिँदै मुख्यमन्त्री जम्मकट्टेलको संकट : कांग्रेसका सांसद काठमाडाैंबाट फर्केनन्

गहिरिँदै मुख्यमन्त्री जम्मकट्टेलको संकट : कांग्रेसका सांसद काठमाडाैंबाट फर्केनन्

A+ A A-

आज बुधवार विश्वासको मत लिँदै गरेका बागमती प्रदेशका मुख्यमन्त्री शालिकराम जम्मकट्टेलसँग नेपाली कांग्रेसको विवाद बढ्दै गएको छ । विश्वासको मत लिन सत्ता गठबन्धनको प्रमुख दल नेपाली कांग्रेससँग कुनै औपचारिक छलफल नगरेको भन्दै कांग्रेस असन्तुष्ट बनेको हो । नेकपा माओवादी केन्द्र र कांग्रेसबीचको विवाद गठबन्धनका शीर्ष नेतृत्वसम्म पुगिसकेको छ ।

सोमबार र मंगलबार कांग्रेस सभापति शेरबहादुर देउवासँग कांग्रेस बागमती प्रदेश संसदीय दलका नेताहरूले विश्वासको मत र सरकारमा सहभागी हुने विषय लिएर छलफल गरेका छन् । देउवासँग मंगलबार छलफल गरेपछि कांग्रेसका सांसदहरू काठमाडौंमै रोकिएका छन् । मुख्यमन्त्री जम्मकट्टेलले आज बुधवार विश्वासको मत लिने तय यसअघि नै भए पनि कांग्रेसका सांसदहरू मंगलबार साँझसम्म हेटौँडा नआएका हुन् ।

कांग्रेस बागमती प्रदेश संसदीय दलको बैठक ११ बजे काठमाडौंस्थित चप्पलकारखानामा राखिएको छ । हेटौँडास्थित प्रदेशसभामा ३ बजे विश्वासको मत लिने कार्यसूची तय भइसकेको छ । संसदीय दलको बैठक सकेर सांसदहरू ३ बजे विश्वासको मत दिन हेटौँडा पुग्ने सम्भावना कमै छ । जसकारण बुधबार नै जम्मकट्टेलले विश्वासको मत पाउनेमा शंका छ ।

विश्वासको मत लिनुअघि गठबन्धनको प्रमुख दलसँग कुनै छलफल नै नगरेको भन्दै कांग्रेस रुष्ट बनेको हो । कांग्रेस बागमती प्रदेशका मुख्य सचेतक कुन्दनराज काफ्लेले ११ बजे संसदीय दलको बैठक राखिएको र थप निर्णय हुने बताए ।

‘सरकारका सम्बन्धमा कुनै सहमति नभएसम्म विश्वासको मत दिन सकिँदैन भनेको हो । हामीले गठबन्धनको मर्मअनुसार मुख्यमन्त्रीज्यूलाई विश्वासको मत दिन्छौँ । तर, सहमति हुनुपर्छ,’ काफ्लेले भने । पार्टी सभापति देउवाले प्रदेशमा आन्तरिक विषय छलफलबाट टुंग्याउन निर्देशन दिएको उनले बताए । ‘सभापतिज्यूले आन्तरिक विषय छलफलबाट टुंग्याउनु भन्नुभएको छ । बाँकी गठबन्धनको निर्णयअनुसार अगाडि बढ्नुपर्छ भन्नु भएकोले आज संसदीय दलको बैठकबाट निर्णय गर्छौं’, काफ्लेले भने ।

‘समय सीमाभित्र विश्वासको मत दिन भ्याए भ्याइन्छ, नत्र पर्सी दिउला’, उनले थपे । मुख्यमन्त्रीसँग सरकार गठनको विषयमा सहमति नभएसम्म कुरा अगाडि नबढ्ने उनको भनाइ छ । कांग्रेसले बागमती प्रदेशमा आफ्नो मुख्यमन्त्रीमा स्वभाविक दाबी रहेको र गठबन्धनको भागवण्डाअनुसार अगाडि बढ्नुपर्नेमा माओवादीलाई सहमति गराउन खोजेको बुझिन्छ । तर, मुख्यमन्त्री जम्मकट्टेल भने विश्वासको मत पाएपछि छलफल गर्ने मस्थितिमा छन् ।

बागमती प्रदेशमा नयाँ सिराबाट कुरा अगाडि बढ्ने काफ्लेको भनाइ छ । विश्वासको मत लिनुअघि गठबन्धनमा कुनै छलफल नै नगरेको भन्दै मुख्यमन्त्री जम्मकट्टेलसँग गठबन्धनका दुई प्रमुख दल नेपाली कांग्रेस र नेकपा (एकीकृत समाजवादी) असन्तुष्ट बनेका हुन् । यद्यपि, नेपाली कांग्रेस प्रदेश कार्यसम्पादन समितिको मंगलबार काठमाडौंमा बसेको बैठकले मुख्यमन्त्री जम्मकट्टेललाई विश्वासको मत दिने निर्णय भने गरिसकेको छ । तर, उक्त निर्णय आज नै दिने वा नदिने भन्ने सम्बन्धमा लागू नहुने पार्टी प्रदेश महामन्त्री राजु श्रेष्ठ बताउँछन् ।

‘विश्वासको मत दिने र सरकारमा सहभागी हुने पार्टीले निर्णय गरे पनि बुधबार नै नदिन पनि सकिन्छ । बाँकी कुरा छलफलबाट टुंगिएला’, श्रेष्ठले भने । यसअघि २५ पुसमा नेकपा एमाले, माओवादी र राप्रपाको गठबन्धनबाट जम्मकट्टेल मुख्यमन्त्रीमा नियुक्त भएका थिए । सरकार गठन हुँदाको राप्रपाले भने सरकारलाई दिएको समर्थन १३ फागुनमै फिर्ता लिइसकेको छ । एमाले भने मंगलबारसम्म सरकारमै सहभागी छ । राप्रपाले सरकारलाई दिएको समर्थन फिर्ता लिएसँगै संवैधानिक व्यवस्थाअनुसार मुख्यमन्त्री जम्मकट्टेलले १३ चैतभित्र विश्वासको मत लिइसक्नुपर्नेछ ।

तर, कांग्रेस र नेकपा एसले विश्वासको मत लिने मिति सार्नुपर्ने अडान लिएका छन् । सरकारका सम्बन्धमा आवश्यक सहमति गरेपछि ११ वा १२ गते विश्वासको मत दिन सकिने कांग्रेस र नेकपा एसले स्पष्ट बताइसकेका छन् । सहमति बेगर विश्वासको मत नदिने सन्देश लिएर पार्टी बागमती प्रदेश संसदीय दलका नेता बहादुरसिंह लामा, उपनेता रामकृष्ण चित्रकारलगायतले पार्टी सभापति देउवालाई सोमबार बिहान पनि भेटेका हुन् ।

यसअघि प्रदेशसभाका दुईतिहाइभन्दा बढी सांसदको विश्वासको मत पाएका जम्मकट्टेलले मुख्यमन्त्री नियुक्त भएको ६५ दिनमा नै दोस्रोपटक विश्वासको मत लिन लागेका हुन् । जम्मकट्टेललाई मुख्यमन्त्रीमा राप्रपासहित ५ दलका ७० जना सांसदहरूको समर्थन थियो । उनलाई नेमकिपाका तीनजना सांसदबाहेक एक सय पाँचजना सांसदले ३ माघमा विश्वासको मत दिएका थिए ।

बागमती प्रदेशसभामा कुल सातवटा दलको प्रतिनिधित्व छ । प्रदेशसभामा कांग्रेसको ३७, एमालेको २७, माओवादीको २१, राप्रपाको १३, एकीकृत समाजवादीसँग ७, नेमकिपासँग ३ र हाम्रो नेपाली पार्टीसँग २ मत छ । १ सय १० सदस्यीय प्रदेशसभामा सरकार गठनका लागि ५६ सांसद भए पुग्छ । नयाँ सत्ता समीकरणमा कांग्रेस, माओवादी र एकीकृत समाजवादी एक भएसँगै सरकार गठनमा बहुमत पुग्छ ।

प्रकाशित मिति: बुधबार, चैत ८, २०७९ ०६:४८