देउवा निवास धुम्बाराहीमा मन्त्रीका आकांक्षीको भिड, ‘अर्कोपटकको भर छैन, अहिल्यै हुनुपर्‍यो’ भन्ने धेरै

देउवा निवास धुम्बाराहीमा मन्त्रीका आकांक्षीको भिड, ‘अर्कोपटकको भर छैन, अहिल्यै हुनुपर्‍यो’ भन्ने धेरै

A+ A A-

१० पुसकाे गठबन्धन भत्किएपछि भावी प्रधानमन्त्रीका रूपमा हेरिएका नेपाली कांग्रेसका सभापति शेरबहादुर देउवाकाे धुम्बाराहीस्थित निवासमा मंगलबार सांसदहरूकाे भिडभाड थियाे । उनीहरूमध्ये अधिकांश मन्त्रीकाे लबिईङका लागि बिहानैदेखि पुगेका थिए ।

सत्ता गठबन्धनका शीर्ष नेताहरूले मन्त्रिपरिषद्‌को विस्तार प्रधानमन्त्रीले विश्वासको मत लिएपछि हुने बताउँदै आएका थिए । ६ फागुनमा प्रधानमन्त्री पुष्पकमल दाहाल प्रचण्डले दाेस्राेपटक संसदबाट विश्वासको मत लिए । त्यसलगत्तै कांग्रेससहित गठबन्धनमा रहेका १० दलमा भागबण्डा र मन्त्री छान्ने चटाराे सुरू भएकाे हाे ।

देउवा निवास धुम्बाराहीमा ७ चैतदेखि मन्त्रीका आकांक्षीदेखि प्रदेश सरकारमा भागबण्डा मिलाउन अनुरोध गर्ने, मन्त्रालयमा भनसुन गरिदिन आग्रह गर्नेसम्मको भिड लाग्न थालेकाे छ ।

धुम्बाराही नियमित जाने एक नेताका अनुसार, बिहान ८ बजेदेखि मध्याह्न १२ बजेसम्म देउवाले भोटघाटका लागि समय छुट्याएका छन् । मंगलबार चप्पल कारखाना चोकदेखि देउवा निवासबाट २०० मिटरभित्रसम्म सवारीको जाम थियो ।

१० पुसको गठबन्धन भत्किएर पुरानो चुनावी गठबन्धनमा नयाँ दल थप भएपछि बनेको गठबन्धनमा कांग्रेस सभापति देउवा निवास ‘पावर सेन्टर’ बनेको छ । तीन महिनामा पावर सेन्टरको रूपमा पुनर्स्थापना गर्न कांग्रेसका नेताहरूले पापड बेल्नुपरेको थियो ।

देउवा निवासमा संस्थापन पक्षका नेताहरू मन्त्री बन्न दाबी पेस गर्न पुग्ने नै भए । इतर समूहका नेताहरू पनि मन्त्रीका लागि धाइरहेका छन् ।

कांग्रेस संस्थापनबाट सहमहामन्त्री किशोरसिंह राठौर, प्रवक्ता प्रकाशशरण महत, वीरबहादुर बलायर, एनपी साउद, रमेश लेखक, रामहरि खतिवडा, मोहन बस्नेत, शंकर भण्डारी, दिनेश यादव, जितेन्द्र देव, मोहन आचार्य, आरजु राणा, सीता गुरुङलगायतका सांसदहरू मन्त्री बन्न आकांक्षी छन् ।

१० पुसको गठबन्धन भत्काउन महत्त्वपूर्ण भूमिका निभाएका उपसभापति पूर्णबहादुर खड्का सरकार विस्तार, भागबण्डा र मन्त्री छनोटमा खटिएका छन् । उनले मंगलबार बिहान प्रधानमन्त्री प्रचण्ड गोरखा जानुअघि बालुवाटारमा एक घण्टा छलफल गरे । बालुवाटारबाट उनी सिधै धुम्बाराही पुगेका थिए ।

धुम्बाराहीमा उनले बागमती प्रदेशका कांग्रेस पदाधिकारी तथा सांसदहरूलाई मुख्यमन्त्री शालिकराम जम्मकट्टेललाई विश्वासकाे मत दिन निर्देशन दिएका थिए । बागमती प्रदेश सरकारलाई लिएर प्रधानमन्त्री प्रचण्ड कांग्रेससँग रिसाएका छन् । बुधबार बागमती प्रदेशका मुख्यमन्त्री जम्मकट्टेलले विश्वासको मत लिँदैछन् ।

केन्द्रीय सहमतिअनुसार, प्याकेजमै 'डिल' गर्नुपर्ने कांग्रेसको अडान छ । जम्मकट्टेल भने आफूलाई मुख्यमन्त्री छाडेर विश्वासको मत दिनुपर्ने अडानमा थिए । माओवादीले एकतर्फी रूपमा विश्वासको मत लिने निर्णय गरेपछि कांग्रेस असन्तुष्ट थियो । सो असन्तुष्टिपछि प्रचण्डले ‘अनकन्फर्ट फिल’ गरेका हुन् ।

माओवादीले केन्द्रीय भागबण्डा अनुसार छाड्नुपर्ने भए मात्र छाड्ने बताउँदा कांग्रेसले अहिले नै छाड्नुपर्ने वा विश्वासको मत अलि पछि लिनुपर्ने अडान लिएपछि बेमेल देखियो । यद्यपि, कांग्रेसले बागमती सरकारलाई विश्वासको मत दिने निर्णय गरिसकेकाे छ ।

मंगलबार धुम्बाराहीमा बागमती प्रदेशका कांग्रेस संसदीय दलका नेता बहादुरसिंह लामा, प्रमुख सचेतक कुन्दनराज काफ्लेलगायतका सांसदहरूको टोली पुगेको थियो । ‘प्रदेशमा विश्वासको मत लिने विषय छ । त्यहाँ सरकार पुनर्गठनको विषय छ । समसामयिक विषयमा कुरा गर्न आएका हौँ,’ लामाले शिलापत्रसँग भने ।

ज्ञानेन्द्र कार्की, एनपी साउन, मोहन बस्नेत, वीरबहादुर बलायर, डा. प्रकाशशरण महत, दीपक गिरी, राजेन्द्र बजगाईं, बालकृष्ण खाँण, योगेश गौचन थकालीलगायतका नेताहरू मंगलबार धुम्बाराही पुगेका थिए । उनीहरू आफ्नो प्रदेशमा प्रदेश सरकार विस्तार र सहभागिता, केन्द्रमा मन्त्रीको लाबिइङका लागि धुम्बाराही पुगेका हुन् ।

तीनपटक सरकार परिवर्तन हुने भएकाले मन्त्रीको पालो आउने बुझेका नेताहरू यसैपटक मन्त्री बन्न पाउनुपर्ने अडान लिएर देउवा निवास पुग्ने गरेका छन् । ‘शेरबहादुर दाइले भनेको सबै मानेको छु । पदाधिकारी लड्न सक्थेँ, केन्द्रीय सदस्य पनि भइनँ । मैले महाधिवेशन प्रतिनिधिसँग समेत भेट्न पाइनँ,’ पूर्वमन्त्रीसमेत रहेका एक नेताले भने, ‘योपटक त्योपटक थाहा छैन कति भनेको मानेर बस्ने ? म केन्द्रीय सदस्य हुँदा त्यो ... (एक मन्त्रीका आकांक्षी) कहाँ थियो । भनेको मानेर बस्दा म कहाँ छु अहिले ?’

कांग्रेसको हातमा सत्ता ल्याउन खटिएका अर्का नेता पनि उनको कुरामा सही थापिरहेका थिए । ‘अर्कोपटकको भर छैन, अहिले हुनुपर्‍यो,’ ती नेताले भने ।

सभापति देउवाले जिल्लाको वस्तुस्थिति र रिपोर्ट बुझ्न बोलाएको सांसद योगेश गौचन थकालीले शिलापत्रलाई बताए । आफू मन्त्रीको आकांक्षी नभएको उनको भनाइ छ । ‘जिल्ला सभापतिसँग जिल्लाको वस्तुस्थिति र समसामयिक विषयमा कुरा गर्न बोलाउनुभएको हो । सरकारको विषयमा छलफल गर्न होइन,’ उनले भने । कांग्रेस मुस्ताङ जिल्ला सभापति रोमी गौचन थकाली उनका बुबा हुन् ।

बागमती प्रदेशसभाका सांसद काफ्लेले संघ र प्रदेशमा मन्त्री बनाउँदा युवाहरूलाई समेट्नुपर्ने बताए । ‘संघ होस् कि प्रदेश, युवाहरूले मौका पाउनुपर्छ । अनुभव भएका र कार्यसम्पादनमा अब्बल देखिएकालाई मिलाएर रिजल्ट दिने टिमलाई पार्टीले सरकारमा पठाउनुपर्छ,’ उनले भने ।

केन्द्रीय सदस्य तथा नेविसंघ पूर्वअध्यक्ष राजीव ढुंगाना पनि देउवा निवास पुगेका थिए । ‘मन्त्री बनाउँदा पार्टीले युवाहरूलाई स्थान देओस् भन्ने चाहना हो । सभापति ज्यूसँग सो कुरा राखौँ भनेर आएको,’ उनले भने ।

भेट्न जानेहरू एकल वा सामूहिक रूपमा देउवासँग भेट्छन् । मन्त्रीको आकांक्षा छाडेर पछि अन्य पदमा बार्गेनिङ गर्नेहरू पनि धुम्बाराही पुग्ने गरेका छन् । ‘जम्मा आठ वटा मन्त्रालय पाउने हो । संस्थापन, इतर, सिटौला, शीतल निवासलाई पनि भाग पुर्‍याउनुपर्छ, गाह्रो छ,’ धुम्बाराही पुगेका एक नेताले भने ।

मन्त्रीका आकांक्षीलाई भने देउवाले सकारात्मक जवाफ दिने गरेका छन् । ‘सत्ता गठबन्धनमा भाग हुँदा कांग्रेसका भागमा कति पर्छ, त्यसमा भूगोल मिलाएर पार्टीबाट सहमतिमा हुने उहाँले भन्नुभयो,’ देउवासँग भेटेपछि सांसद रामहरि खतिवडाले शिलापत्रसँग भने ।

तर, सरकार विस्तारका बारेमा कुरा नभएको उपसभापति पूर्णबहादुर खड्काले बताए । धुम्बाराहीमा भिड बढेको देखियो । प्रधानमन्त्रीले विश्वासको मत लिएपछि सरकार विस्तारको कुरा गर्ने भन्नुहुन्थ्यो, कुरा के भइरहेको छ भन्ने शिलापत्रको प्रश्नमा उपसभापति खड्काले भने, ‘छैन, अहिले सरकारका बारेमा कुरा भएको छैन ।’

देउवा सचिवालय भने कांग्रेस सरकारमा गएपछि सभापति निवासमा चहलपहल बढ्नु स्वाभाविक रहेको बताउँछ । ‘सरकार विस्तार, मन्त्रीका कुरा हुन्छन् । समसामयिक घटनाक्रमबारे कुरा हुन्छन् । स्वाभाविक हो नि,’ देउवाका स्वकीय सचिव भानु देउवाले भने, 'आज (मंगलबार) मात्र होइन, सधैँजसो भेटघाट चलिरहन्छ ।’

प्रकाशित मिति: मंगलबार, चैत ७, २०७९ २०:०७