संकटमा बागमतीका मुख्यमन्त्री जम्मकट्टेल, कांग्रेस र नेकपा एसले खोजे सहमति

A+ A A-

बागमती प्रदेशका मुख्यमन्त्री शालिकराम जम्मकट्टेलले ८ चैतमा विश्वासको मत लिँदैछन् । उनले यसअघि नै विश्वासको मत लिने प्रयोजनका लागि प्रदेशसभा सचिवालयलाई जानकारी गराइसकेका छन् ।

२५ पुसमा एमाले र राप्रपाको समर्थनमा मुख्यमन्त्री नियुक्त भएका जम्मकट्टेलले १३ फागुनमा राप्रपाले समर्थन फिर्ता लिएपछि संवैधानिक व्यवस्थाअनुसार दोस्रो पटक विश्वासको मत लिन लागेका हुन् । तर, विश्वासको मत लिने तयारीमा जुटेका उनीमाथि वर्तमान सत्ता गठबन्धनका दलहरू नै असन्तुष्ट बनेका छन् ।

नेकपा माओवादी केन्द्र संसदीय दलका नेता जम्मकट्टेलले विश्वासको मत लिने सम्बन्धमा सत्ता गठबन्धनका दुई प्रमुख घटक नेपाली कांग्रेस र नेकपा एकीकृत समाजवादीसँग कुनै छलफल नगरेको जनाइएको छ । जसकारण कांग्रेस र नेकपा एस जम्मकट्टेलसँग रुष्ट बनेका छन् । विश्वासको मत लिनु ४८ घण्टासम्म मुख्यमन्त्री र दुई दलसँग सम्बन्धमा चिसोपना आउनुले जम्मकट्टेललाई संकट निम्तिन सक्ने देखिएको छ ।

जम्मकट्टेलले गठबन्धनका दुई प्रमुख दलसँग कुनै छलफल नै नगरी विश्वासको मत लिन खोजेको, सरकार गठनको प्रक्रिया र सहभागिताका सम्बन्धमा कुनै चासो नदेखाएको भन्दै कांग्रेस र नेकपा एस बागमती प्रदेशसभाका नेतृत्वले पार्टी शीर्ष तहसँग छलफल चलाएका छन् ।

सोमबार बिहान कांग्रेस बागमती प्रदेश संसदीय दलका नेता बहादुरसिंह लामा, उपनेता रामकृष्ण चित्रकारलगायतका नेताहरू पार्टी सभापति शेरबहादुर देउवा भेट्न बूढानीलकण्ठ पुगेका थिए । भेटमा सभापति देउवालाई मुख्यमन्त्री जम्मकट्टेलले विश्वासको मत लिनुअघि छलफल नगरे र कुनै सहमति नजनाएको अवस्थामा विश्वासको मत नै नदिने चेतावनी दिएको स्रोतले शिलापत्रलाई जानकारी दिएको छ ।

‘हामीसँग कुनै छलफल नभएकै हो । विश्वासको मत लिनुअघि सरकारमा सहभागी हुने, कसरी सहभागी हुने भनेर प्रदेशसभाको सबैभन्दा ठूलो दल कांग्रेससँग कुरा हुनुपर्दैन । विश्वासको मत दिएपछि के कुरा हुन्छ ?’, देउवासँगको भेटमा रहेका एक नेताले भने, ‘सहमति नगरे विश्वासको मत दिन्नौँ भनेको हो ।’

कांग्रेस बागमती प्रदेश संसदीय दलका नेता लामाले भने देउवा भेट्न गएको तर भेट भने हुन नसकेको बताए । उनले विश्वासको मत लिने विषयमा मुख्यमन्त्रीसँग कुरा भएको तर प्रसंगले कुरा हुन पुगेको बताए । ‘मैले बजेटको विषयमा कुरा गर्न फोन गरेको थिएँ, उहाँले त्यही मौकामा विश्वासको मत ८ चैतमा लिनुपर्छ भन्नु भएको थियो । मैले छलफल र दलभित्र कुरा नभई निर्णय दिन नसक्ने र आफ्नै हिसाबले नराख्नु भनेको हुँ । पछि त ८ चैतमा विश्वासको मत लिने भनेर सुनेँ,’ लामाले भने ।

विश्वासको मत लिनुअघि विविध विषयमा छलफल गर्नुपर्ने र निर्णयमा पुग्नु पर्ने विषयलाई जम्मकट्टेलले नजरअन्दाज गरेको उनको भनाइ थियो । नेकपा एसका एक प्रदेशसभा सदस्यले भने मुख्यमन्त्री जम्मकट्टेलले विश्वासको मत लिनु अगाबै राजनीतिक सहमति गर्नुपर्ने बताए । ‘मुख्यमन्त्रीज्यू विश्वासको मत लिन असफल हुनुभयो भने के हुन्छ ? सहमति नभएसम्म विश्वासको मत दिँदैनौँ । कमसेकम गठबन्धनका दलसँग पनि छलफल गर्नुपर्छ नी । हाम्रो पार्टीसँग कुनै छलफल नै भएको छैन,’ ती सांसदले भने । उनले कांग्रेससँग निरन्तर छलफल भइरहेको र एउटै एजेण्डामा अडिक रहेको पनि शिलापत्रलाई जानकारी दिए ।

कांग्रेस र नेकपा एसले आ-आफ्ना पार्टी नेतृत्वसँगको छलफलमा मुख्यमन्त्री जम्मकट्टेलले विश्वासको मत लिने मिति सार्नुपर्ने र त्यसबीचमा सरकारमा सहभागिताको विषयलाई सहमति गर्नुपर्ने बटमलाइन बनाएका छन् । जम्मकट्टेलले १३ फागुनभित्र विश्वासको मत लिइसक्नुपर्नेछ । कांग्रेसले भने १२ चैतमा विश्वासको मत लिने मिति तय गर्नुपर्ने बटमलाइन बनाएको छ । ‘विश्वासको मत लिने मिति सर्नुपर्छ । त्यसबीचमा भागवण्डाको विषय पनि छन्, सहमति हुनुपर्छ,’ कांग्रेस नेता लामाले भने ।

मुख्यमन्त्री जम्मकट्टेलका राजनीतिक सल्लाहकार डीपी ढकालले गठबन्धनका दलहरूसँग विश्वासको मत लिने विषयमा छलफल भएको बताए । ‘मुख्यमन्त्रीज्यूले छलफल गरेरै विश्वासको मत लिने मिति तय गर्नु भएको हो । ३० दिनभित्र विश्वासको मत लिइसक्नु पर्ने भएकाले हतार पनि छ,’ उनले भने ।

प्रकाशित मिति: सोमबार, चैत ६, २०७९ १८:२२