बोक्सीका कारण बुबा र हलगोरु मरेको अन्धविश्वासले गएको थियो गंगारामको ज्यान, हत्यारा दुबईबाट पक्राउ

बोक्सीका कारण बुबा र हलगोरु मरेको अन्धविश्वासले गएको थियो गंगारामको ज्यान, हत्यारा दुबईबाट पक्राउ

A+ A A-

कपिलवस्तु भृकुटी नगरपालिका– ७ का विष्णुप्रसाद थारूको २०६९ सालमा मृत्यु भयो । विष्णुप्रसादको मृत्युलाई उनका छोरा २३ वर्षीय शिवशरण चौधरीले स्वाभाविक मानेका थिएनन् । कसैले हत्या गरेकोजस्तो नदेखिए पनि बोक्सीका कारण आफ्नो बुबाको ज्यान गएको अन्धविश्वास उनमा थियो ।

बुबाको हत्याको करिब ७ वर्षपछि २०७६ असारमा खेत जोत्ने क्रममा चौधरीका गोरुसमेत मरे । शिवशरणलाई हलगोरुसमेत बोक्सीकै कारण मरेको हुन सक्ने अन्धविश्वास जाग्यो । त्यति मात्रै होइन, हलगोरु मरेको केही दिनपछि स्वयम् उनको खुट्टासमेत दुख्न थाल्यो ।

खुट्टा पनि बोक्सीकै कारण दुख्न थालेको भन्दै उनी कपिलवस्तुको बुद्धभूमि नगरपालिका– ४ का ६६ वर्षीय गंगाराम थारूको शरण पुगे । उनी झारफुक गर्ने काम गर्थे । गंगारामले झारफुक गरेपछि भने उनको खुट्टा दुख्न रोकियो ।

शिवशरणलाई बुबाको मृत्यु हुनुदेखि गोरु मर्नु र आफ्नाे खुट्टा दुख्नुको पछाडि गंगाराम थारू बोक्सी भएकाे कारण हो भन्ने लाग्यो । त्यसैको बदलामा शिवशरणले गंगारामको हत्या गर्ने योजना बुने ।

त्यसका लागि उनले ६ जना युवाको सहयोग लिए । उनीहरूकै योजनाअनुसार गंगाराम थारूको ७ साउन २०७६ हत्या भयो । शिवशरणसहितको समूहले धारिलो हतियारले उनको शरीरका विभिन्न भागमा प्रहार गरेर हत्या गरेकाे थियाे ।

प्रहरीको अनुसन्धानले हत्याको योजनाकार शिवशरण रहेको देखाउँदा उनकाे खोजी तीव्र पारिएको थियो । घटनामा संलग्न अन्य विष्णुप्रसाद चौधरी, इन्द्रा थारू, लीलाराम थारू, विक्रम थारू र रामसेवक थारूलाई भने प्रहरीले पक्राउ गरिसकेको थियो । जसमध्ये विष्णुप्रसाद चौधरी, इन्द्रा थारू, लीलाराम थारू भने धरौटीमा छुटेका थिए ।

विक्रम थारू र रामसेवक थारू भने पुर्पक्षका लागि यसअघि नै जेल चलान भएका छन् । योजनाकार शिवशरण भने प्रहरीलाई छक्याउँदै भाग्न सफल भएका थिए । प्रहरीको अनुसन्धानबाट शिवशरण २०२१ अक्टोबरमै भिजिट भिसामा दुबई पुगेको खुल्यो ।

भिजिट भिसामा दुबई पुगेका शिवशरणलाई २ चैतमा प्रहरीको अन्तर्राष्ट्रिय संगठन इन्टरपोलमार्फत पक्राउ गरेर नेपाल ल्याइएको छ ।

६ महिनापछि नेपाल

भिजिट भिसामा दुबई पुगेका शिवशरणलाई पक्राउ गर्न नेसनल सेन्ट्रल ब्युरो (एनसीबी) काठमाडौंले रेड नोटिस जारी गर्न अन्तर्राष्ट्रिय संगठन इन्टरपोललाई पत्राचार गर्‍यो ।

एनसीबीको अनुरोधमा इन्टरपोल महासचिवालयबाट १४ भदौ २०७९ मा उनीविरुद्ध रेड नोटिस जारी भयो । दुबई प्रहरीले रेड नोटिस जारी भएको एक सातापछि २१ भदौमै शिवशरणलाई पक्राउ गर्‍यो । त्यसयता उनलाई दुबईकै जेलमा राखिएको थियो ।

तर, पक्राउ परेका शिवशरणलाई दुबई प्रहरीले नेपाल प्रहरीलाई सपुर्दगी गर्न चाहेन । दुबई प्रहरीले शिवशरणलाई नेपाल फर्काउन नेपाल प्रहरीकै प्रतिनिधिको माग राखेको थियो । तर, प्रहरी दुबई जान ढिलाइ गर्दा उनी दुबईकै जेलमा बस्न बाध्य भएका थिए । २ चैतमा भने काठमाडौंबाट प्रहरी निरीक्षकसहित दुई जनाको टोलीले दुबई पुगेर नेपाल ल्याएको हो ।

शिवशरणलाई काठमाडौं ल्याउनासाथ कपिलवस्तु प्रहरीलाई बुझाइएकोमा आइतबार कपिलवस्तु जिल्ला अदालतले पुर्पक्षका लागि कारागार पठाउने आदेश गरेको छ ।

शिवशरणजस्तै विभिन्न जघन्य अराधमा संलग्न रही फरार रहेका ३८ जनाविरुद्ध एनसीबी काठमाडौंको अनुरोधमा इन्टरपोलको सचिवालयले रेड नोटिस जारी गरेको प्रहरी प्रवक्ता डीआईजी पोषराज पोखरेलले जानकारी दिए ।

आर्थिक कारण नेपालबाहिर पक्राउ परेको अभियुक्तलाई नेपाल ल्याउन केही समय लाग्ने गरेको उनको भनाइ छ । रेड नोटिसमा अधिकांश हत्या घटनाका आरोपितहरू छन् ।

प्रकाशित मिति: सोमबार, चैत ६, २०७९ १८:५९