सरकारमा कांग्रेस : पूर्णबहादुर खड्काले चाहे उनकै नेतृत्वमा

A+ A A-

६ चैतमा प्रधानमन्त्री पुष्पकमल दाहाल प्रचण्डले संसदमा विश्वासको मत लिँदैछन् । विश्वासकाे मत लिएपछि प्रचण्डले मन्त्रिमण्डल पुन:गठन गर्ने तयारी गरिरहेका बेला ठूलो दल नेपाली कांग्रेसले सरकारमा सहभागी हुने औपचारिक निर्णय आइतबार गर्दैछ ।

एमालेले सरकारमा रहँदा सम्हालेका ८ मन्त्रालयमा १ मन्त्रालय थप हुने आस राखेको कांग्रेसमा कसको नेतृत्वमा सरकारमा सहभागी हुने भन्ने टुंगो छैन । कसलाई सरकारमा पठाउने भन्ने विषय सभापति शेरबहादुर देउवाको तजबिजीमा निर्भर पर्नेछ ।

पूर्व उपसभापति प्रकाशमान सिंह र विमलेन्द्र निधि र बहालवाला उपसभापति पूर्णबहादुर खड्काको नेतृत्वमा सरकारमा जाने विषय कांग्रेसभित्र चर्चामा छ । उनीहरू तीनै जनाको जवाफ भने, ‘पार्टीले निर्णय गर्छ । अहिले भन्ने बेला भएको छैन हतारो हुन्छ,’ भन्ने छ ।

तर कांग्रेसका एक पदाधिकारी भने उपसभापति खड्काले चाहेको हदसम्म अर्को व्यक्तिले सरकारमा नेतृत्व गर्ने सम्भावना नरहेको बताउँछन् । खड्का पुस १० को गठबन्धन भत्काउन जिम्मा दिएर देउवाकाे किचन क्याबिनेटबाट खटाइएका नेता हुन् ।

‘पूर्ण दाइले चाहानुभएको खण्डमा अरुले नेतृत्व गर्ने सम्भावना छैन,’ ती पदाधिकारीले शिलापत्रसँग भने, ‘भावी सभापतिको रुपमा तयारी गर्न पनि उहाँलाई पहिलो दुई वर्ष सरकारमा रहेर काम गर्दा फाइदा पुग्छ ।’

सभापित देउवा आफू नेतृत्वको सरकारमा मन्त्री भएकाहरूलाई अहिले माैका दिने पक्षमा छैनन् । कांग्रेसबाट मन्त्री बनाउन प्रत्यक्ष निर्वाचित अनुहार प्राथमिकतामा छ । त्यसो हुँदा देउवा सरकारमा मन्त्री भएका ज्ञानेन्द्रबहादुर कार्की, डा. नारायण खड्का, दिलेन्द्र बडू स्वतः दाैडबाट बाहिरिने छन् ।

उपसभापति धनराज गुरुङ, सहमहामन्त्रीहरू जीवन परियार, बद्री पाण्डे, किशोरसिंह राठोर मन्त्री बन्ने दौडमा छन् । गुरुङ, परियार र पाण्डे इतर समूहका नेता हुन् । राठौर संस्थापन समूहका हुन् ।

प्रवक्ता प्रकाशरण महतसहित वीरबहादुर बलायर, एनपी साउद र रमेश लेखकमध्ये एक नेताले अवसर पाउने बुझाई संस्थापन पक्षमा छ ।

लेखक दलको प्रमुख सचेतक भए पनि मन्त्री बन्ने दौडमा रहेका छन् । उनी पनि पुस १० को गठबन्धन भत्काउन उपसभापति खड्कासँगै खटिएका थिए ।

रामहरि खतिवडा, मोहन बस्नेत तथा शंकर भण्डारी पनि मन्त्री बन्ने दौडमा छन् । देउवा पत्नी सांसद आरजु राणा देउवा पनि मन्त्रीकाे दाैडमा छिन् । उनको रुचि परराष्ट्र मन्त्रालयमा रहेको बताइन्छ । तेह्रथुमबाट प्रत्यक्ष चुनाव जितेकी एक मात्र महिला सांसद सिता गुरुङ संस्थापन पक्षबाट मन्त्री बन्ने लगभग निश्चित रहेको कांग्रेस नेताहरू बताउँछन् । महिला सांसदहरू इश्वरी न्यौपाने, अम्बिका बस्नेत पनि मन्त्री बन्ने लाइनमा छन् ।

मधेश क्षेत्रबाट दिनेश यादव, राष्ट्रियसभा सदस्य जितेन्द्र देव तथा देवप्रसाद तिम्सिना मन्त्रका आकांक्षी छन् । कांग्रेसमा इतर समूहबाट सरिता प्रसाईं, रामनाथ अधिकारी, सञ्जय गौतम, हृदयराम थानी, दिपक गिरी मन्त्री बन्ने दौडमा छन् ।

साे समूहबाट रामकृष्ण यादव, तेजुलाल चौधरी, डिगबहादुर लिम्बु ,प्रतिमा गौतम, लिला बोखिम मन्त्रीको आकांक्षी छन् । संसदीय दलको चुनावमा इतर समूहमा देखिएका सांसद प्रदीप पौडेल अहिले सिटौला समूहबाटै सक्रिय छन् । केन्द्रमा प्रभाव कमजोर भएका सिटौलाको कोटाबाट पौडेल मन्त्री बन्न सक्छन् ।

प्रकाशित मिति: शनिबार, चैत ४, २०७९ १७:४४