पढ्दै खाने ठाउँ बेलायतमा देखे, नेपालमा खोले (भिडियो)

A+ A A-

मानसिक स्वास्थ्यमा एमएससी गर्न बेलायत पुग्दा स्याङ्जाका जगन्नाथ लामिछानेले त्यहाँ पुस्तकालयसहितको रेष्टुरेन्ट देखे । उनका लागि यो विल्कुलै नौलो र अनौठो भयो । यस्तो व्यवसायबाट उनी प्रभावित भए ।

उनले त्यहाँ रुचिअनुसारका पुस्तक पढ्दै अनेक खालका खानाका परिकारको स्वाद पनि लिए । श्रीमती विदुशी ढुङ्गेल अमेरिकामै जन्मे हुर्केकी हुन् । जगन्नाथका अनुसार विदुशीको त पढ्दै मनपर्ने परिकार खान सकिने क्याफे या रेष्टुरेन्ट खोल्नु बाल्यकालदेखिकै चाहना पनि थियो ।

उनीहरू सन् २०१५ मा नेपाल फर्किए । काठमाडौंको महाराजगञ्जमा स्थापना गरे- बोधि बुक्स एण्ड बेक्स । नेपालमा यो पूरै नौलो खालको व्यवसाय हो । जहाँ बसेर आनन्दले पढ्दै आफूले चाहेको परिकार खान पाइन्छ । र, जगन्नाथले सुरुदेखि नै बोधि बुक्स एण्ड बेक्स मा आउने ग्राहकहरूले अन्य ठाउँमा भन्दा फरक अनुभव गर्न पाउन्, आतिथ्यता र खानामा पनि नकारात्मक छाप नपरोस् भन्ने कुरामा जोड दिए ।

यतिसम्म कि दिनभरि बस्न चाहनेलाई घरकैजस्तो वातावरण सिर्जना गर्न प्रयास गरे । ललितपुरको झम्सीखेलमा साथीको बन्द रहेको एउटा स्टेशनरीबाट किताबहरू किनेर रेष्टुरेन्टमा राखे । उनलाई सुरुमा खाने परिकारमा बेकरी र कफीले पुग्छ भन्ने लागेको थियो ।

ग्राहकको प्रतिक्रिया अझै थप्नुपर्ने भन्ने आयो । यसबाट उनी निकै उत्साहित भए । केही परिकार थप्दै लगे । अर्कातिर नेपालमै पहिलो पढ्दै खान मिल्ने ठाउँ भएकाले धेरैले अनौठो माने पनि । जगन्नाथलाई अहिले पनि सम्झना छ- कोही ग्राहक त बोधि बुक्स एण्ड बेक्सको ढोकाबाट भित्र छिर्ने बित्तिकै उत्साहले चिच्याउँथे । जसको उद्घाटनदेखि नै लगातार ग्राहकको घुइँचो लाग्यो । तर, उद्घाटनकको केही दिनमै विनाशकारी भूकम्पको उनले पनि सामना गर्नुपर्‍यो । तीन महिनासम्म बन्द गरे ।

फेरि, खोले । दुई महिनामै छिमेकी देश भारतको नाकाबन्दी सुरु भयो । एउटा ग्याँस सिलिन्डर पाउन बिहान ४ बजे बसपार्क पुग्नुपर्ने अवस्था आयो । यद्यपि, यस्ता व्यवधानबाट जगन्नाथले हिम्मतचाहिँ हारेनन् ।

विस्तारै लेखक, साहित्यकार, पत्रकार र बुद्धिजीवीहरूको गन्तव्य बन्न पुग्यो- बोधि बुक्स एण्ड बेक्स । कतिपय ग्राहकले त शाखा नै विस्तार गर्न आग्रह गरे । उनले पनि शाखाको महसुस गरे । पहिलो शाखा बालुवाटारमा विस्तारको तयारी पनि गर्दै थिए, ठीक त्यसैबेला विश्वलाई नै अत्याएको कोरोना महामारी फैलियो । जतिबेला बालुवाटारमा शाखा खोल्न साइत हेरेर बसेका थिए, उनको त्यहाँ ठूलै लगानी डुब्यो ।

उनले शिलापत्रसँग भने, ‘त्यसलाई हामीले राम्रो पाठका रूपमा लियौँ । हरेस खाएनौँ ।’ जगन्नाथले १४ जनालाई बोधि बुक्स एण्ड बेक्समा रोजगारी दिएका छन् । आगामी एक वर्षभित्र ललितपुरमा शाखाको विस्तार गर्ने उनको तयारी छ । तर, उनलाई सरकार भने व्यवसायीमैत्री नभएको भान हुन्छ । व्यवसाय गर्न अनेकौँ कानुनी प्रक्रियागत झन्झट हुने गरेको उनको तीतो अनुभव छ ।