विश्वकप छनोट खेल्न नेपाललाई दुई खुड्किलो

A+ A A-

आईसीसी क्रिकेट विश्वकप लिग टुबाट सिधै विश्वकप छनोटमा पुग्न नेपालको लागि अब दुई जित आवश्यक छ । आइतबार नेपालले यूएईविरुद्ध फराकिलो जित निकालेसँगै नेपाल विश्वकप छनोटमा प्रवेशनजिक पुगेको हो ।

टीयू क्रिकेट मैदानमा नेपालले यूएईलाई १७७ रनले पराजित गर्‍यो । यो जितसँगै नेपालले एकदिवसीय अन्तर्राष्ट्रिय (ओडीआई) मान्यता कायमै राख्न सफल भयो । अब विश्वकप छनोटमा सिधै पुग्न नेपालले दुई खेल जित्नुपर्छ ।

जितपछि नेपालका कप्तान रोहितकुमार पौडेलले अबको लक्ष्य विश्वकप छनोटमा पुग्ने भएका बताएका छन् । उनले भने, ‘एकदमै खुसी लागिरहेको छ । हामीले यात्रा सुरू गर्दा नै एकदिवसीय मान्यता पाउने थियो । त्यो पूरा भयो । हामी विश्वकप छनोटमा पुग्न दुई खेल पर छौँ । अब बाँकी दुई खेल जित्ने लक्ष्य हुनेछ ।’

त्यसो त, कप्तान रोहितलाई यूएईविरुद्धको जित अप्रत्यासित भएको पनि बताए । उनले भने, ‘२२ मै तीन विकेट गएको थियो । यहाँबाट राम्ररी टिमलाई अगाडि लानुपर्छ भन्ने भएको थियो । त्यसपछि जोन्टी (भीम सार्की) सँग राम्रो साझेदारी भयो । त्यसपछि आरिफ दाईसँग । यसपछि हामीले राम्रो रन बनायौँ । यस्तो सजिलै नतिजा हाम्रो पक्षमा आउछ भन्ने लागेको थिएन ।’

नेपालले सोमबार पपुवा न्युगिनीसँग प्रतिस्पर्धा गर्दैछ । यो खेल पनि आफ्नो पक्षमा पार्दै फागुन २ गते हुने यूएईविरुद्धको अन्तिम खेलमा जित निकाल्दै विश्वकप छनोटमा पुग्ने नेपालको लक्ष्य छ ।

नेपाली टिम यतिबेला उत्कृष्ट लयमा छ । यसअघि लिग टुकै सिरिजमा नेपालले घरेलु भूमिमा चारै खेल जित्न सफल भयो । लिग च्याम्पियन बनिसकेको स्कटल्यान्डविरुद्ध दुई र नामिबियाविरुद्ध दुई खेल जित्दै नेपालले महत्त्वपूर्ण आठ अंक बटुलेको थियो । त्यसपछि नेपालले यूएईमा सम्पन्न त्रिदेशीय सिरिजको चार खेलमध्ये तीनमा जित निकाल्यो ।

पछिल्लो १० खेलमध्ये नेपालले ९ खेलमा जित निकालेको छ भने एक खेलमा मात्रै हार ब्यहोरेको छ । यूएईसँग उसैको भूमिमा नेपाल ६८ रनले हारेको थियो । त्यसपछि पनि नेपालले यूएईलाई दुई पटक हराई सकेको छ ।

यस्तो छ समीकरण

नेपालले अब बाँकी दुवै खेल जिते ४० अंक हुनेछ । यस्तो भए नामिबियालाई पछि पार्दै नेपाल सिधै विश्वकप छनोटमा पुग्नेछ । तर, यी दुई खेलमध्ये नेपालले एउटा खेलमा मात्रै हारे नामिबियाको भाग्य चम्किने छ । नामिबिया विश्वकप छनोटमा पुग्दा नेपाल भने विश्वकप छनोटमा पुग्न प्लेअफ खेल्नुपर्ने हुन्छ । नामिबियाको कूल ३६ खेलबाट ३९ अंक छ ।

अमेरिका, यूएई र पपुवा न्युगिनी प्लेअफमा झरिसकेका छन् । यता, लिग टु च्याम्पियन बनिसकेको स्कटल्यान्डको ३६ खेलबाट ५० अंक हुँदा दोस्रो हुँदै विश्वकप छनोटमा पुगिसकेको ओमानको ३६ खेलबाट ४४ अंक छ । पाँचौँ स्थानमा रहेको अमेरिकाको ३६ खेलबाट ३५ अंक हुँदा छैटौँ स्थानमा रहेको यूएईको ३४ खेलबाट ३१ अंक छ । यता, सातौँ स्थानमा रहेको पपुवा न्युगिनीको ३४ खेलबाट ११ अंक छ ।

लिग टुबाट स्कटल्यान्ड, ओमान, नामिबिया, नेपाल र अमेरिका गरी पाँच टिमले एकदिवसीय अन्तर्राष्ट्रिय (ओडीआई) मान्यतालाई जोगाई सकेका छन् । अब प्लेअफबाट दुई टिमले ओडीआई मान्यता पाउने छन् ।

प्रकाशित मिति: आइतबार, फागुन २८, २०७९ १९:३३