सराङकोटमा शहीद पार्क : तीन महिनामै बनाइयाे आधा दर्जन शालिक

A+ A A-

पोखरा महानगरपालिकाले पोखराका चोकचोकमा राखिएका विभिन्न विभूतिका शालिकलाई व्यवस्थापन गर्ने अभियान तीव्ररुपमा अगाडि बढाएको छ । महानगरपालिकाले सराङकोट मेथलाङस्थित निर्माण गरिरहेको ‘राष्ट्रिय विभूति तथा शहीद पार्क’को निर्माण तीव्ररुपमा अगाडि बढाएको हो ।

महानगरले शालिकको व्यवस्थापन गरी आन्तरिक तथा बाह्य पर्यटक प्रवर्द्धन उद्देश्यले साराङकोटमा विभिन्न शहीद तथा विपभूतिहरुका पूर्णकद र अर्धकदका शालिकसहित पार्क निर्माण गरेको हो ।पार्क निर्माणसँगै पोखरामा नयाँ पर्यटकीय गन्तव्य थपिएको छ ।

नवनिर्मित पोखराको शहीद पार्कको डाँडाबाट पोखराको मनोरम दृश्य सजिलै देख्न सकिन्छ ।

पार्कमा नेपाल एकीकरणका सुत्रधार पृथ्वीनारायण शाहदेखी अन्य शहीदका कलात्मक शालिक राख्ने क्रम शुरु भएको छ ।

पार्कमा पृथ्वीनारायण शाहको ६ फिट ३ इन्च अग्लो पूर्णकदको शालिक राखिएको पोखरा महानगरपालिकाका नगरप्रमुख मानबहादुर जिसीका स्वकीय सचिव लक्ष्मण तिमल्सिनाले जानकारी दिए ।

पोखराको व्यस्त चोक पृथ्वीचोकमा रहेको पृथ्वीनारायण शाहको शालिक दोस्रो जनआन्दोलनमा आन्दोलनकारीले तोडफोड गरेका थिए । क्षतिग्रस्त शालिकलाई महानगरले १४ वर्षपछि पार्क निर्माण गरी व्यवस्थापन गरेको हो ।

पोखराको व्यस्त बजार क्षेत्रसँगै चोकहरुबाट शहीद र विभूतिको शालिकलाई महानगरपालिकाले एकै ठाउँमा स्थापित गर्ने निर्णय गरेको थियो । महानगरपालिकाको निर्णयसँगै पहिलो चरणमा पोखरा–१८ सराङकोटस्थित जामुनबोटको ५६ रोपनी क्षेत्रफलमा रहेको राष्ट्रिय विभूति तथा शहीद पार्कमा पृथ्वीनारायाण शाहसँगै अन्य विभूतिहरुको शालिक स्थापना गरिएको छ ।नेपाल कम्युनिस्ट पार्टीका संस्थापक पृष्पलाल, जनआन्दोलन २०६२/६३ का प्रथम शहीद भीमसेन दाहालको कलात्मक अर्धकदको शालिक पार्कमा राखिसकिएको छ । विभूति पार्कमा पूर्वप्रधानमन्त्री बीपी कोइराला, भीमसेन थापा, शहीदहरु हरि गुरुङ, योगेन्द्रमान शेरचन, लखन थापालगायत राष्ट्रिय विभूतिहरुको शालिक राखिने स्वकीय सचिव तिमल्सिनाले बताए ।

‘योगेन्द्रमान शेरचन र रविन्द्र अधिकारीको अर्धकदको शालिक तयार हुँदै छ,’ उनले भने, ‘शालिक तयार हुने बित्तिकै राखिने छ ।’

तत्कालीन पोखरा उपमहानगरपालिकाले सराङकोट गाविस हुँदा ५६ रोपनी क्षेत्रफल छुट्याएर पार्क बनाउने निर्णय गरेको थियो । पार्कको भोगाधिकारको जिम्मा जनआन्दोलनका प्रथम शहीद भीमसेन दाहाल स्मृति प्रतिष्ठानलाई २०६७ सालमा दिइएको थियो । पछि महानगरपालिकाले आफ्नै लगानीमा सराङकोटमा विभूति तथा शहीद पार्क स्थापना गर्ने निर्णय गरेको थियो ।

स्वकीय सचिव तिमिल्सिनाका अनुसार पृथ्वीनारायण शाहको ६ फिट ३ इन्च अग्लो शालिक बनाउन दुई लाख ५० हजार रुपैयाँ खर्च गरिएको छ । अर्धकदको एउटा शालिक निर्माण गर्न ५० हजार रुपैयाँ खर्च भएको छ । ‘विभूति तथा शहीद पार्क व्यवस्थित गर्न महानगरपालिकाले यो वर्ष एक करोड रुपैयाँ बजेट छुट्याएको छ,’ उनले भने, ‘त्यसबाट सेमिनार हल, बाल उद्यान, पृथ्वीनारायण शाहको ब्लक र रविन्द्र अधिकारी ब्लक निर्माण गरिने छ ।’पार्कसम्म पुग्ने बाटो कालोपत्रे गरिएको छ । पार्क उक्लिने सिँढी निर्माण गरिएको छ । विभूति तथा शहीद पार्कभन्दा केही तलको स्थानमा खुल्ला व्यायाम शालासहितको पार्क बनाइएको छ ।

‘४५ लाखको लागतमा ओपन जिमसहितको व्यवस्थित पार्क बनाइएको छ,’ तिमल्सिनाले भने, ‘सार्वजनिक शौचालय पनि छ ।’

यसअघि पोखराका विभिन्न चोकमा रहेका विभूति तथा शहीदको शालिकलाई पार्क बनाएर ब्यवस्थापन गर्ने काम तीन महिना अघिमात्र थालिएको हो । यही तीन महिनाको अवधिमा पार्कका खाकासहित एउटा पूर्ण र दुईवटा अर्धकदलगायत आधा दर्जन शालिक राखिएको हो । पार्कमा १०८ विभूति र शहीदको शालिक स्थापना गरिने योजनासहित काम भईरहेको तिमल्सिनाले जानकारी दिए ।‘यो वर्ष १ करोडबाट पूर्वाधारका कामहरु गरिने छ,’ उनले भने, ‘बजार क्षेत्रका शालिक ल्याएर स्थापित गरिने छ ।’

पोखराका विभिन्न स्थानमा रहेका शहीद लखन थापादेखि मेयर हर्क गुरुङ, अमरसिंह थापा, हरिप्रसाद गुरुङ, कवि शिरोमणि लेखनाथ पौडेललगायतका शालिकलाई महानगरपालिकाले सराङकोटस्थित राष्ट्रिय विभूति तथा शहीद पार्कमा व्यवस्थापन गर्ने जनाएको छ ।