सिकारीले फेला पारे सुन्दर नोहक गुफा, एकैचोटि ५ सय मानिस छिर्न मिल्ने (भिडियाे)

सिकारीले फेला पारे सुन्दर नोहक गुफा, एकैचोटि ५ सय मानिस छिर्न मिल्ने (भिडियाे)

A+ A A-

काठमाडौंबाट एक सय १० किलोमिटरको दूरीमा छ– धादिङको घाङमाङ गाउँ । दुर्गम यो गाउँ यतिबेला चर्चाको शिखरमा छ । कारण– यही गाउँमा रहेको सुन्दर र आकर्षक ‘नोहक गुफा’को चर्चा देश–परदेशसम्म फैलिएको छ ।

बेनीघाट बजारदेखि भने यो गुफा २१ किलोमिटर दूरीमा पर्छ । गुफा निकै रमणीय छ । भित्र झण्डै तीन तलासम्म हिँडडुल गर्न मिल्ने छ । गुफामा एकसाथ ५ सय जना मानिस प्रवेश गर्न सकिने गुफा रहेको बेनीघाट रोराङ गाउँपालिकाका अध्यक्ष कृष्णबहादुर थपलियाले बताए ।

गुफाको मध्यभागमा चुन पग्लेर विभिन्न देवीदेउताका जस्ता देखिने आकृतिहरू बनेका छन् । स्थानीयहरूका अनुसार जंगलमा मृगको सिकार गर्न जाने क्रममा यो गुफा पत्ता लागेको हो । ‘हाम्रा हजुरबाहरूले सिकार खेल्ने क्रममा यो गुफा पत्ता लगाउनुभएको हो’, श्रीराम चेपाङले शिलापत्रसँग भने ।

उनी घाङमाङका स्थानीय हुन् । उनलाई गुफासम्म आइपुग्न बाटो, बिजुली, खानेपानीलगायतका सुविधा भए र गुफा क्षेत्रको संरक्षणसँगै प्रचार भए पर्यटक आउने लागेको छ । अहिले गुफासम्म पुग्न पृथ्वी राजमार्गअन्तर्गत बेनीघाट रोराङ गाउँपालिकाको चरौँदीबाट करिब २६ किलोमिटर उकालो, साँघुरो र जोखिमपूर्ण यात्रा गर्नुपर्छ । गाउँपालिका अध्यक्ष थपलियाका अनुसार भने चालु आर्थिक वर्षमा बाग्मती प्रदेश सरकारले ९९ करोड रूपैयाँ यस क्षेत्रसँग जोडिएको सडकको स्तरोन्नतिका लागि बजेट विनियोजन गरेको छ ।

र, गुफाको प्रवर्द्धन गर्न भनेर राजनीतिक दलसँगै विभिन्न संघसंस्थाका प्रतिनिधि गरी डेढ सय बढी जनाले गएको शुक्रबार गुफासम्मको यात्रा गरे । त्यसक्रममा उनीहरूलाई स्थानीयले स्वागत गरेका थिए । शुक्रबार साँझ घाङमाङ पुगेर बास बसेका उनीहरू शनिबार बिहान करिब ८ बजे गुफा पुगेका थिए । यही गुफा परिसरमा गाउँ कार्यपालिकाको बैठक बसेर गुफाको थप प्रचारप्रसार गर्ने र आगामी वर्ष नोहक गुफा महोत्सव गर्ने निर्णय गाउँपालिकाले गरिसकेको छ ।

महोत्सव अगाडि पर्यटकहरूका लागि भनेर घाङमाङ गाउँमा होमस्टेहरू स्थापना गराइने भएको छ । घाङमाङ गाउँमा चेपाङहरू बस्दछन् । गाउँपालिका उपाध्यक्ष टापबहादुर श्रेष्ठले गुफाको प्रचारप्रसार गरी पर्यटनको प्रवर्द्धन गर्न सके गाउँपालिकाको मात्रै नभएर देशकै गरिमा बढ्ने बताए । गुफा गाउँपालिकाको आर्थिक विकासको मेरुदण्ड बन्ने पनि उनको दाबी छ । अर्कातिर, पर्यटन प्रवर्द्धन हुँदा स्थानीय चेपाङ समुदायको जीवनस्तर उकास्न गुफा वरदान सावित हुने बताए ।

प्रकाशित मिति: शुक्रबार, फागुन २६, २०७९ ११:२५