अनुसन्धान भन्छ– डुब्दैछन् एसियाका ठूला शहरहरू, भारतकाे ३ करोड जनसंख्या जोखिममा

हालै सार्वजनिक एक प्रतिवेदनले डरलाग्दो भविष्यवाणी गरेको छ । नेचर क्लाइमेट चेन्ज जर्नलमा प्रकाशित प्रतिवेदनमा एसियाका ठूला शहरहरू समुद्रमा डुब्ने उल्लेख छ ।

सो जर्नलका अनुसार सन् २१०० सम्ममा शहरहरू डुबानमा पर्दा ५ करोड मानिसहरू प्रभावित हुनेछन् जसमध्ये भारतकाे मात्र ३ करोड जनसंख्या प्रत्यक्ष रुपमा प्रभावित बन्नेछ ।

जलवायु परिवर्तनका कारण पृथ्वीको तापक्रम दिनदिनै बढिरहेको छ । यसले अभूतपूर्व मात्रामा हिउँ पग्लन थालेको छ । यी कारणले गर्दा समुद्रको सतह लगातार बढिरहेका छ ।

लगातार समुद्रको सतह बढिरहेको विषय उल्लेख गर्दै प्रतिवेदनमा एसियाका ठूला शहरहरू समुद्रमा डुब्ने बताइएको हो । प्रतिवेदनले करोडौं मानिसहरू घरविहीन बन्ने चेतावनी दिएको छ ।

फ्रेन्च नेस्नल सेन्टर फर साइन्टिफिक रिसर्च ‘सीएनआरएस’, द युनिभर्सिटी अफ ला रोचेल्ला इन फ्रान्स एन्ड द नेस्नल सेन्टर फर एट्मोसफियरिक रिसर्च इन युनाइटेड स्टेट्स ‘एनसीएआर’ले सार्वजनिक गरेकाे अनुसन्धान प्रतिवेदनमा अर्को शताब्दीमा फिलिपिन्सको राजधानी मनिलामा अहिलेभन्दा १८ गुणाले बढी बाढीको घटना देखिने उल्लेख छ । फिलिपिन्सको राजधानी मनिलामा मात्र १ करोड ३० लाख मानिस बसोबास गर्छन् ।

यस्तै थाइल्यान्डको राजधानी बैंकक, भियतनामको हो चि मिन शहर र म्यानमारकाे यांगोनलगायत केही शहरहरू पनि डुबानको जोखिममा छन् । जलवायु विज्ञान सल्लाहकार लर्डेस टिबिगका अनुसार अब विश्वभरका तटीय ठूला शहरहरू खराब अवस्थाको सामना गर्न तयार हुनुपर्छ ।

जलवायु परिवर्तनलाई रोक्न विश्व एक नबने समुद्र छेउका तथा टापु शहरहरू विलय हुने उनको भनाइ छ ।

उता भारतको चेन्नई र कोलकत्ता पनि समुद्रले डुबाउने जोखिमपूर्ण शहरहरूमा पर्दछन् । सीएनएनबाट साभार

प्रकाशित मिति: बुधबार, फागुन २४, २०७९ १८:४४