बेसहारा बालबालिकाको सहारा बनेकी सानु भन्छिन्– पहिलो प्राथमिकता टुहुरालाई दिन्छौँ

बेसहारा बालबालिकाको सहारा बनेकी सानु भन्छिन्– पहिलो प्राथमिकता टुहुरालाई दिन्छौँ

A+ A A-

धनगढी उपमहानगरपालिका- १, शिवनगरमा छ परिवार बालगृह । यो गृहमा अहिले पाँच बालिका र चार बालक गरी नौ जना बालबालिका छन् । कञ्चनपुर घर भएकी सानु चौधरीको ती बालबालिकाहरूको हेरचाह नै दैनिकी बनेको छ ।

१२ वर्षअघि सञ्चालनमा ल्याइएको बालगृहमा उनले बालबालिकाको हेरचाहसँगै पारिवारिक पुनर्मिलन गराउने गरेकी छिन् । कञ्चनपुरको बेलौरी नगरपालिका वडा नम्बर ७, पौलाहामा विवाह गरेकी सानुले धनगढीमा अनाथालय सञ्चालन गर्ने आँट गरेकी थिइन् ।

बाँकेको राप्ती सोनारी गाउँपालिका– ३ मा जन्मिएकी सानु अहिले ३३ वर्षकी भइन् । १५ वर्षकै उमेरमा एकल बनेकी उनले छोराको मायाले गर्दा नै बालगृह सञ्चालन गर्ने सपना बोकिन् । उनले भनिन्, ‘मेरो चार महिनाको छोरा हुँदा म एकल महिला बनेँ । बाबुको माया दिन नपाए पनि आमाको माया दिनुपर्छ भन्ने लाग्यो । त्यसपछि परिवार गुमाएका बालबालिकाको हेरचाह गर्न मैले बालगृह सञ्चालन गरेँ ।’ उनले छोरा सात वर्षको हुँदा दोस्रो विवाह गरिन् । अहिले उनीसँग दुई छोरा छन् । उनी भन्छन्, ‘बालगृहमा रहेका बालबालिका पनि मेरा छोराछोरी हुन् ।’

सानुले सुरुमा कञ्चनपुरमै बालगृह सञ्चालन गरेकी थिइन् । तर, अहिले कैलालीको धनगढीमा भाडाको घरमा बालगृह सञ्चालन गरिरहेको उनी बताउँछिन् । उनी भन्छिन्, ‘बालगृहमा १४ जना बालबालिका थिए । गत वर्ष पाँच जनालाई आफन्तको जिम्मा लगाइसकेकाले अहिले नौ जना मात्र छन् ।’ उनका अनुसार बालगृहमा १० वर्षमुनिका बालबालिकालाई राखेर स्याहारसुसार तथा पठनपाठन गराइँदै आएको छ ।

उनी भन्छन्, ‘पाँच महिनामुनिका जुम्ल्याहा बच्चा भर्ना भएका थिए । उनीहरू अहिले ठूला भएर विद्यालयमा पढ्ने भइसकेका छन् ।'

सानैबाट स्कुल नदेखेका पाँच जना बच्चाहरू अहिले कक्षा ८ मा भर्ना भएको उनले बताइन् । ‘एक जना १२ कक्षामा पढिरहेको छ भने एक जना कक्षा ३ मा छ । दुई जना सानै छन्, विद्यालय जाने बेलै भाको छैन’, उनले भनिन् ।

बालगृह सञ्चालनमा उनको घरपरिवारले पनि साथ सहयोग गर्दै आएको उनी बताउँछिन् । हाल उनका श्रीमान्‌सहित तीन जना सहयोगी बालगृहमा छन् । बेसहाराको सहारा बनेकी सानुले सबैभन्दा पहिलो प्राथमिकता बुबाआमा गुमाएका बालबालिकालाई दिन्छिन् । त्यसपछि बुबा गुमाएका र अन्तिममा सडक बालबालिकालाई गृहमा भर्ना गर्ने गरिएको उनी बताउँछिन् ।

उनले कुनै आफन्त आएर जिम्मा लिएमा ती बालबालिकालाई उनीहरूको जिम्मा लगाउने गरेको बताइन् । ‘हामीले यहाँ विभिन्न जिल्लाका बालबालिकालाई राखेका छौँ, तर कोही आफन्त आएर जिम्मा लिन्छन् भने पठाउने गरेका छौँ,’ उनले भनिन्, ‘हाम्रो उद्देश्य यहाँ बालबालिकालाई राख्ने मात्रै होइन, उनीहरूलाई आफन्तसँग पुनर्मिलन गराउनु पनि हो ।’

बालगृहमा कैलाली र कञ्चनपुरका मात्र नभई डोल्पा, मुगु र बर्दिया जिल्लाका बालबालिका पनि छन् । ‘हामीले कुनै जात, धर्म, भाषा संस्कृति हेर्दैनौँ । जुन बालबालिकाले दुःख पाएको छ, उसलाई ल्याउने हो,’ उनले भनिन्, ‘बालगृहको काम भनेको उनीहरूको संरक्षण गर्नु हो ।’

सामाजिक कार्य गर्दै आएको बालगृह समाजको आर्थिक सहयोगको भरमा सञ्चालन भएको छ । यसबाट उनी पनि अछुतो छैनन् । भन्छिन्, ‘कसैले जन्मदिनको अवसरमा रकम तथा खाद्यान्न सहयोग गर्दै आएका छन् भने कसैले कुनै विशेष दिनमा खाद्यान्न सहयोग गर्दै आएका छन् । साथै, स्थानीय तहले पनि अहिले सहयोग गर्दै आएको छ ।’

प्रकाशित मिति: बिहीबार, फागुन २५, २०७९ ०६:५१