उद्योगी व्यवसायीले बन्द गराए धनगढीका बैंक शाखा

A+ A A-

धनगढी उपमहानगरपालिका- ३, बोराडाँडीकी कलावती थापा मगर बिहीबार धनगढीस्थित नवजीवन सहकारी संस्था लिमिटेडमा आवश्यक रकम खाताबाट निकासा गर्न गइन् । सहकारीले आधा गेट मात्र खुल्ला देखेपछि हतार–हतार प्रवेश गरिन् ।

कैलाली उद्योग वाणिज्य संघ प्रदेश समिति तथा कैलाली शाखाले बैंकको चर्को ब्याजदरविरुद्ध धनगढीस्थित बैंक तथा सहकारीका शाखाहरू बन्द गराएको छ ।

दाँतको उपचारका लागि रकम निकाल्न पुगेकी कलावतीलाई बैंक तथा सहकारी बन्द हुनेबारे जानकारी थिएन । उनले भनिन्, ‘व्यवसायीहरूले बैंक तथा सहकारी बन्द गराउँदै हिँडेको बारे जानकारी थिएन । सहकारीमा समयमै नपुगेको भए मैले उपचारका लागि पैसा निकाल्न पाउने थिइनँ ।’

उनलाई सुरुमा सहकारीको गेटामा रहेका सुरक्षा गार्डले सहकारीबाट प्रवाह हुने सेवा बन्द रहेको भन्दै फर्काउन लागेको थियो ।

उनले भनिन्, ‘सुरक्षा गार्डले बैँक बन्द छ भन्दै फर्किन भन्यो । तर, उपचार गराउन पैसा जरुरी भयो भनेपछि भित्र जान दियो ।’ उनी माया मेट्रो अस्पतालमा दाँतको उपचार गराइरहेकी छन् । सोही कार्यका लागि खातामा रहेको रकम निकासा गर्न पुगेकी थिइन् ।

धनगढी उपमहानगरपालिका वडा नम्बर ४ का विजय चौधरी घरायसी खर्चका लागि खाताबाट रकम निकाल्न पुगे । नवजीवनमै भेटिएका उनी भन्दै थिए, ‘थोरै भए पनि सहकारीले खातामा रहेको रकम निकासा गर्न दियो ।’

तर, संघको आन्दोलनका कारण अतिआवश्यक कार्यबाहेक अन्यका लागि सेवा बन्द गरेको छ । ‘चाहेको जति रकम त सहकारीले दिएन । तर, केही रकम पाएकोले अहिले राहात महसुस गरेको छु,’ चौधरीले भने, ‘बैंक त बन्द थियो तर, घरको जरुरी कामका लागि रकम निकाल्न आएको भनेपछि काम भयो ।’

संघको आन्दोलनका कारण धनगढीस्थित बैंक तथा सहकारीहरूले भित्रबाट सामान्य कारोबार गरिरहेका थिए । अन्य सबै काम बन्द भए पनि जरुरी भएकाहरूलाई केही समय भित्रैबाट सेवा प्रवाह गरिएको बैंकका एक कर्मचारीले बताए । ‘धनगढीका सबै बैँक बन्द भएका कारण हामीले पनि बन्द गरेका छौँ । तर, अत्यन्त जरुरी हुनेलाई केही समय भित्रैबाट रकम निश्चित रकम झिक्न मिल्ने गरी सेवा दिएका छौँ,’ ती कर्मचारीले भने ।

बैंकको चर्को ब्याजका कारण मर्कामा परेको भन्दै आन्दोलित उद्योगी व्यवासायीले धनगढीमा विरोध प्रदर्शनसहित बैंकका शाखाहरूमा तालाबन्दी गरेका छन् । बैंकका शाखाहरूमा तालाबन्दी भएपछि पैसा भुक्तान, जम्मा, ब्याज बुझाउने लगायतका कार्यहरू प्रभावित भएका छन् ।

अन्य दिन संघले अर्न्तक्रिया, छलफल, विरोध र्‍याली साथै विभिन्न सांकेतिक रूपमा आन्दोलन गर्दै आएकोमा बिहीबार बैंकका शाखाहरूमा तालाबन्दी गरेको छ । ‘पटक–पटक चर्को बैङ्कको ब्याजदर घटाउनुपर्ने माग गर्दै आन्दोलन गरे पनि राष्ट्र बैंक माग र मुद्धाबारे गम्भिर भएन,’ कैलाली उद्योग वाणिज्य संघ कैलालीका उपाध्यक्ष पुष्कर ओझाले भने, ‘अझै पनि सुनुवाइ नभए थप शशक्त आन्दोलनका कार्यक्रम अघि बढाइने छ ।’

उद्योगी व्यवसायीहरूले व्यवसायीमाथिको आतङ्क बन्द गर, बैङ्कको ब्याजदरमा एकरूपता कायम गर, व्यवसायीमाथिको व्यापार बन्द गरलगायतका नाराहरू लगाउँदै आन्दोलनका कार्यक्रम अघि बढाएका छन् ।

उद्योगी व्यवसायीहरूले शुक्रबार मुख्यमन्त्री तथा मन्त्रिपरिषदको कार्यालयमा धर्ना दिने कार्यक्रम तय गरेका छन् । यसका साथै सबै बजार बन्द गर्न आग्रह गरिएको छ ।

प्रकाशित मिति: बिहीबार, फागुन १८, २०७९ २१:०६