अस्ट्रेलिया जाने सोच छाडेर अहमदले सुरु गरे फातिज बिर्यानी, अहिले ३० जनालाई रोजगारी दिन्छन् (भिडियो)

अस्ट्रेलिया जाने सोच छाडेर अहमदले सुरु गरे फातिज बिर्यानी, अहिले ३० जनालाई रोजगारी दिन्छन् (भिडियो)

A+ A A-

सानो छँदादेखि नै अदनान अहमद साहको घरमा बिर्यानी पाक्थ्यो । बिर्यानीको स्वादसँग उनी सानैदेखि जानकार थिए । उनलाई बनाउन पनि आउँथ्यो ।

इद, जन्मोत्सव, विवाहलगायत उत्सवमा त मुस्लिम समुदायमा बिर्यानी अनिवार्यजस्तै हुने गर्छ । स्कुलका साथीहरूले इदमा ठट्यौली गर्दै भनेको उनलाई अहिले पनि सम्झना छ, ‘अहमद ! बिर्यानी नखुवाउने ?’

उसो त कोरोना महामारीको बेला उनको घरमा प्रत्येक दिन बिर्यानी पाक्यो, त्यो पनि फरक–फरक स्वादमा ।

गत वर्षको कुरा हो । स्नातक उत्तीर्णपछि उच्च शिक्षाका निम्ति अहमदलाई अस्ट्रेलिया जाने मन भयो । तर, दाइले नेपालमै केही काम गर्न सकिने सुझाएपछि विदेश जानबाट रोकिए ।

उनले भने, ‘पढिरहँदा नै नेपालमा अवसर छैन, विदेश जाऊँजाऊँ लाग्यो । तर, विदेश गएर फर्किनुभएका दाइले नेपालमै केही काम गर्न सकिन्छ, विदेश नै किन जानु भनेपछि गइनँ ।’

तर, के गर्ने भन्नेमा उनी स्पष्ट थिएनन् । एक दिन बिर्यानीबारे सोचे । बजारचाहिँ कस्तो छ ? निस्किए बजारमा । उनले कतै सहजै बिर्यानी पाएनन् । बरू, मःम:ले पाएको बजार देखेर छक्क परे ।

उनलाई लाग्यो, मःम:जस्तै बिर्यानीलाई पनि बजारमा स्थापित गर्न कसो नसकिएला ? परिवारमा सल्लाह गरे । साथ दिने वचन पनि पाए ।

ललितपुरको पुल्चोकस्थित हर्मन बेकरीनजिक ठाउँ पाए । अब, नामचाहिँ के राख्ने ? उनी घोरिए । अन्ततः ‘फातिज हाउस’ जुराए । फाती उनको आमाको नाम हो । ‘फाती’को बिर्यानी भन्ने अर्थमा उनले यो नाम जुराएका हुन् ।

आमाको नामबाट खोलिएको बिर्यानी हाउसबाट व्यावसायिक रूपमा बिर्यानी बेच्न थाले । उनी भन्छन्, ‘सुरुवाती दिनमा ग्राहक नआउँदा चामल धेरै पाकेर बिग्रियो । मीठो बिर्यानी तयार गर्ने पाककला त थियो । त्यसैले ग्राहक कम आए पनि राम्रो सेवा दिने लक्ष्य बनायौँ ।’

ग्राहकहरू बिस्तारै आउने क्रम बढ्यो । सानो ठाउँमा धैरै ग्राहक राख्नै मुस्किल हुन थाल्यो । पार्किङको समस्या पनि उस्तै भयो । उनी ठूलो ठाउँको खोजीमा निस्किए । झम्सिखेलमा भनेजस्तै ठाउँ फेला पर्‍यो । जहाँ प्रशस्त ठाउँ र पार्किङको राम्रो व्यवस्था भयो ।

करिब फातिज हाउस सञ्चालनको ६ महिनामै झम्सिखेलमा शाखा विस्तार गरे । हाल वसन्तपुरमा फातिजको तेस्रो शाखा सञ्चालनमा छ ।

अहमदको योजना यतिमा मात्रै सीमित छैन । देशका ठूला चोकहरूमा मःम: जसरी बिर्यानी व्यवसाय विस्तार गर्न चाहन्छन् उनी । ‘नेपाली स्वादको बिर्यानी बनाउँछौँ । यसलाई त्यही रूपमा विस्तार गर्ने हो । यो अबको एक मात्र लक्ष्य हो’, उनले शिलापत्रसँग भने ।

बिर्यानी भारत र पाकिस्तानमा चर्चित छ । नेपाली बिर्यानी पनि अन्तर्राष्ट्रियस्तरमै चर्चित होस् भन्ने अहमदको चाहना छ । पुल्चोक, झम्सिखेल र वसन्तपुरका शाखाबाहेक अनलाइन माध्यममा ‘भोज डिल’, पठाओ फुडस्, डब्ल्यूएल फुडस् तथा फुडमाडौंलगायत माध्यमबाट दैनिक ५ सय प्लेटभन्दा धेरै बिर्यानी बिक्री हुने अहमदले बताए ।

फातिजमा उनले करिब ३० जनालाई रोजगारी दिइरहेका छन् ।

प्रकाशित मिति: बिहीबार, फागुन १८, २०७९ ०६:२४