म्याट्रेस कारखाना खोलेर चिनियाँ नागरिकको यौन शोषणको धन्दा, यसरी पार्थे नाबालिगलाई जालमा

म्याट्रेस कारखाना खोलेर चिनियाँ नागरिकको यौन शोषणको धन्दा, यसरी पार्थे नाबालिगलाई जालमा

A+ A A-

ललितपुर प्रहरीले १३ फागुनमा ललितपुरको बुङमतीबाट एक जना चिनियाँ नागरिकलाई पक्राउ गर्‍यो । प्रहरीको केन्द्रीय अनुसन्धान ब्युरो (सीआईबी) लाई आएको सूचनाको खोजीमा लागेको ललितपुर प्रहरी सूचनालाई पुष्टि गर्दै ती चिनियाँ नागरिक पक्राउ गर्न सफल भएको हो ।

पक्राउ पर्नेमा ४९ वर्षीय यान लिङमिङ छन् । उनीमाथि ललितपुर प्रहरीले बलात्कार मुद्दामा अनुसन्धान अघि बढाएको ललितपुर प्रहरी प्रमुख एसएसपी सिद्धिविक्रम शाहले जानकारी दिए ।

प्रहरीको प्रारम्भिक अनुसन्धानबाट लिङमिङमाथि नाबालिगसहित ३ जनाकिशोरीमाथि बलात्कार गरेको खुलेको छ । उनले एक जना नाबालिगसहित दुई जनालाई पोखराबाट ललितपुर ल्याएर र अर्का एक जना युवतीलाई झापाबाट ललितपुर बोलाएर बलात्कार गरेको खुलेको छ ।

प्रहरीका अनुसार १७, १८ र १९ वर्षीया किशोरीलाई उनले बलात्कार गरेको खुलेको हो । ललितपुर प्रहरी प्रमुख एसएसपी शाहका अनुसार मिङले बुङमतीमै ‘न्यु प्युरी एण्ड म्याट्रेस’ कम्पनीसमेत सञ्चालन गरेका थिए ।

यसरी पार्थे जालमा

४९ वर्षीय यान लिङमिङको नेपाल बसाइ लामो छ । ललितपुरमै व्यवसाय सञ्चालन गरेर बसेका कारण उनी नेपाली र अंग्रेजी भाषासमेत राम्ररी बोल्न सक्छन् । उनी समय–समयमा सामाजिक सञ्जाल फेसबुकसमेत चलाउँछन् । सीआईबीका प्रवक्ता एसपी सञ्जय थापाका अनुसार लिङमिङले नाबालिकादेखि किशोरीसम्मलाई फकाउने भरपर्दो हतियार नै फेसबुक बनाएका थिए ।

फेसबुकमार्फत साथी बन्ने गरेका लिङमिङले उपत्यकाभन्दा बाहिरका जिल्लाका नाबालिकालाई आफ्नै खर्चमा काठमाडौं बोलाउने गर्थे । यसरी काठमाडौं पुगेका किशोरीहरूलाई आर्थिक प्रलोभनमा पारेर रात्रिकालीन मनोरञ्जन ‘नाइट क्लबदेखि महँगाका रेस्टुरेन्टमा समेत लैजाने गरेको खुलेको छ ।

त्यसरी प्रभावमा पर्ने गरेका किशोरीमध्ये केहीलाई काठमाडौंको ठमेलका विभिन्न होटल र ललितपुरस्थित आफ्नै कोठामा पुर्‍याएर यौन शोषण गर्ने गरेको खुलेको छ । सीआईबीको टोलीले ठमेलको एक होटलमा लिङमिङले चार जना नाबालिकालाई ललाइफकाइ राखेको अवस्थामा फेला पारेर उद्धार गरिएको जनाएको छ ।

पीडितका आफन्तले सीआईबीमा यौन शोषणबारे उजुरी दिएपछि ललितपुर प्रहरी उनको खोजीमा लागेको थियो । हालसम्म ललितपुर प्रहरीमा तीन जनाले जाहेरी दिएका छन् । प्रहरीका अनुसार २०७३ सालदेखि व्यवसाय गर्दै आएका लिङमिङले लामो समयदेखि बालिकामाथि यौन शोषण गर्ने गरेको आशंका गरेको छ ।

फेसबुकबाहेक उनले आफ्नै कारखानामा काम गर्ने महिला कर्मचारीमार्फतसमेत बालिकालाई आफ्नो सम्पर्कमा ल्याउन लगाएर यौन शोषण गरेको आशंका प्रहरीले गरेको छ । प्रहरीको प्रारम्भिक अनुसन्धानअनुसार लिङमिङबाट हालसम्म छ जना पीडित भएको खुलेको छ ।

प्रकाशित मिति: मंगलबार, फागुन १६, २०७९ २०:१०