पाकिस्तान-नेपाल-भारतसँग जोडिएको ‘लुडो प्रेम’, इकरा र मुलायमको मिलन-विछोडको कथा

पाकिस्तान-नेपाल-भारतसँग जोडिएको ‘लुडो प्रेम’, इकरा र मुलायमको मिलन-विछोडको कथा

A+ A A-

तीन वर्षअघि अनलाइन लुडो खेल्दाखेल्दै पाकिस्तान हैदरावादकी १९ वर्षीया इकरा जिवानी र भारत प्रयागराजका २१ वर्षे मुलायम सिंह यादव प्रेममा परे । इकरा नेपालहुँदै गैरकानुनी बाटोबाट भारत पुगिन् । विवाह गरेर उनीहरू बैङ्लुरुमा बस्न थाले ।

तर, पाकिस्तानसँग जोडिएको ह्वाट्सएप कलका कारण प्रहरीलाई इकरामाथि शंका भयो । जाँचपछि उनलाई पाकिस्तान पठाइयो । मुलायमलाई प्रहरीले जेल हाल्यो ।

मुलायमको परिवार अहिले बुहारी फर्काउन र छोराको रिहाइका लागि सरकारसित गुहार लगाइरहेको छ । आउनुस्, इकरा र मुलायमको प्रेम, विवाह र विछोडको कथा तपाईंलाई सुनाउँछौँ ।

लुडो खेल्दाखेल्दै प्रेम

यसै वर्ष १९ फेब्रुअरीमा इकरालाई बाघा बोर्डरको बाटोबाट पाकिस्तान पठाइयो । उनको कसुर थियो- गैरकानुनी तरिकाले भारत आउनु । उनी प्रयागराजका मुलायम सिंहसँग विवाह गरी बैङ्लुरुमा बस्न थालेकी थिइन् ।

कोभिड लकडाउनपछि सन् २०२० मा मुलायमले इकरासँग समीर अन्सारी बनेर अनलाइन लुडो खेल्न सुरु गरेका थिए । त्यो बेला इकरा १९ वर्षकी थिइन् भने मुलायम २१ वर्षका थिए । उनी बैङ्लुरुस्थित एक आईटी कम्पनीमा काम गर्थे ।

अनलाइन लुडो खेल्दाखेल्दै दुवैबीच सम्बन्ध गहिरियो । यो ‘लङ-डिस्टेन्स रिलेसनसिप’ थियो । इकरालाई परिवारले पाकिस्तानमै विवाह गर्न दबाब दिइरहेको थियो । यस्तै, चलिरहेका बेला इकरा मुलायमकै सल्लाहअनुसार पाकिस्तानबाट दुबईहुँदै नेपाल आइपुगिन् ।

उनीहरूले नेपालकै मन्दिरमा विवाह गरे । र, सेप्टेम्बर २०२० मा नेपालबाट पटनाहुँदै बैङ्लुरु पुगे । उनीहरू बेलन्दुर पुलिस थाना क्षेत्रमा बस्न थाले । स्थानीय प्रहरीका अनुसार, मुलायम काम गर्थे भने इकरा घरमै बस्थिन् । मुलायमले रिया यादवको नामबाट इकरालाई ‘नक्कली आधार कार्ड’ बनाइदिएका थिए ।

ह्वाट्सएपमा हुन्थ्यो कुराकानी

आफ्नो परिवारबाट टाढा बस्न थालेकी इकरा घरको न्यास्रो मेटाउन ह्वाट्सएपमा पाकिस्तानको हैदरावादमा बस्ने आफ्नी आमासित कुरा गर्थिन् । बैङ्लुरु प्रहरीको गुप्त संयन्त्रले बैङ्लुरुमा हुन लागेको जी२० कार्यक्रम र एयरो शोलाई मध्यनजर गर्दै निकै सतर्कता अपनाएको छ । यही निगरानीका क्रममा इकराको कल प्रहरीको राडारमा आयो ।

त्यसपछि प्रहरीले इकरालाई खोज्न थाल्यो । सोधपुछपछि थाहा भयो, यो बोर्डर वारपारको प्रेमकथा हो । प्रहरीकै भनाइमा अहिले गैरकानुनी तरिकाले भारत आउनुबाहेक उनी (इकरा) विरुद्ध कुनै अपराध बन्दैन । तर, अहिले पनि अनुसन्धान जारी छ ।

अनुसन्धानमा संलग्न एक प्रहरी अधिकारी भन्छन्, ‘गैरकानुनी प्रवेश र जालसाजीलाई बिर्संदा यो एक प्रेमकथाजस्तै लागिरहेको छ ।’

मुलायम सिंहलाई जालसाजी, फरेनर्स एक्ट र आईपीसीका अन्य धाराहरूबमोजिम गिरफ्तार गरी न्यायिक हिरासतमा पठाइएको छ । उनी अहिले बैङ्लुरुको केन्द्रीय कारागारमा छिन् ।

सरकारसँग गुहार

प्रयागराजको मकसुदना गाउँमा छ मुलायमको घर । उनकी आमा शान्ति देवीले भनिन्, ‘केटा र केटीलाई छोडिदिऊन् भन्ने हामी चाहन्छौँ । हामी इकरालाई बुहारी बनाउँछौँ । राम्रोसँग राख्छौँ । चाहे ऊ पाकिस्तानी होस् वा मुसलमान, आफ्नी बुहारीलाई अपनाउँछौँ । चाहे जुनसुकै जातकी होस् । दुवैबीच विवाह भइसकेको छ । हाम्रो छोरालाई छोडिदिऊन् । सरकारले चाह्यो भने बुहारीलाई फर्काइदिन सक्छ ।’

मुलायमकी आमा ।

पाकिस्तानको सरकारसँग मुलायमकी आमा भन्छिन्, ‘विवाह त भइसकेको छ, अब दुईलाई आफ्नो घरमा ल्याइदेऊ ।’

मुलायमका दाइ जितलालका अनुसार, उनलाई मुलायम र इकराका बारेमा १९ जनवरीमा प्रहरीले गिरफ्तार गरेपछि मात्रै थाहा भयो । त्यसअघि उनलाई लागेको थियो, आफ्नो भाइ कुनै साथीसँग बसिरहेको छ ।

'ऊ हाम्री बुहारी हो भने भारतकी पनि बुहारी हो'

इकरालाई पाकिस्तान पठाइएको खबर मिडियामा आएपछि जितलाल निराश भए । ‘भन्नुहोस्, हाम्रो घरको इज्जत हामीले कसरी पाउँछौँ ? हामी उनलाई यहीँ राख्न चाहन्छौँ । हामीलाई हिन्दुस्तान-पाकिस्तानको अवस्थाबारे थाहा छ । तर, इकरा र मुलायमको नियत गलत थियो र ? उनीहरूले प्रेम मात्रै त गरेका थिए, होइन ? जसका लागि उनी जेलमा छन्, उसलाई आफ्नै देश पठाइएको थाहा पाउँदा मेरो भाइको के हाल होला ?’, उनी प्रश्न गर्छन् ।

जितलालले एक वकिलमार्फत मुलायमको जमानत निवेदन अदालतमा दिएका छन् । भन्छन्, ‘अनुसन्धान गरिएको छ । पछि इकरालाई पाकिस्तान पठाइएको छ । त्यसो भए भन्नुस्, मेरो भाइलाई किन जेलमा राखियो ?’

उनी अगाडि भन्छन्, ‘उनी हाम्री बुहारी हुन् भने तपाईंकी पनि बुहारी भइनन् र साहेब ? इन्डियाकै बुहारी भइनन् ?'

प्रकाशित मिति: शनिबार, फागुन १३, २०७९ ०७:००