लिग-२ त्रिदेशीय सिरिजमा चम्किएका आठ नेपाली खेलाडी

A+ A A-

ब्याटिङ धरासायी हुँदा नेपालले पटक-पटक खेल हार्दै आइरहेको थियो । तर, आईसीसी क्रिकेट विश्वकप लिग-२ अन्तर्गत घरेलु टिम नेपालसँगै नामिबिया र स्कटल्यान्डबीचको त्रिदेशीय सिरिजमा नेपाली ब्याटरले चमत्कार नै गरे । चार खेलमा चारै खेल जितेको नेपालका यी खेलाडीले तारिफयोग्य प्रदर्शन गरेका छन् ।

रोहितकुमार पौडेल (कप्तान)

नेपालका कप्तान रोहितकुमार पौडेलले नामिबिया र स्कटल्यान्डसँगको त्रिदेशीय सिरिजमा गजबको प्रदर्शन गरे । पहिलो खेलमै नामिबियाविरुद्ध नेपालले दुई विकेटको जित निकाल्दा रोहितले ७२ रन बनाए । ७६ बलको सामना गरेका रोहितले सात चौका र तीन छक्का प्रहार गरेका थिए । उनले कुशल भुर्तेलसँग मिलेर तेस्रो विकेटका लागि १३३ रनको साझेदारी गर्दै नेपाललाई जिततर्फ अगाडि बढाएका थिए । २८६ रनको विजयी लक्ष्य पछ्याउने क्रममा नेपालले कीर्तिमानी जितसमेत निकालेको थियो ।

स्कटल्यान्डविरुद्ध सिरिजको अन्तिम खेलमा हारिसकेको खेल नेपालले दुई विकेटको जित निकाल्दा नायक सावित भए उनै कप्तान रोहित । उनले अविजित ९५ रन बनाए । एकपछि अर्को ब्याटर आउट भइरहँदा उनी डटेर नेपाली टिमलाई जिताए । उनले १०१ बलमा सात चौका र चार छक्का प्रहार गरेका थिए ।

त्यस्तै, नामिबियाविरुद्धकै अर्को खेलमा तीन विकेटको जित निकाल्दा रोहितले ३९ रनको महत्त्वपूर्ण योगदान दिए । यो सिरिजमा रोहितले नामिबियाविरुद्ध ७२ र ३९ रन, स्कटल्यान्डविरुद्ध ६ र ९५ रन गरी कूल २१२ रन बनाए ।

सन्दीप लामिछाने

सन्दीप लामिछाने नेपालका त्यस्ता बलर हुन्, जसले त्रिवि क्रिकेट मैदानमा तहल्का नै मचाए । उनले चार खेलमा १३ विकेट लिन सफल भए । नेपालले चार खेलमध्ये चारै जित निकाल्दा सन्दीपको मुख्य भूमिका रह्यो । यी चारै खेलमा सन्दीप चम्किए । उनले आफ्नो पहिलो खेलमा नामिबियाविरुद्ध तीन विकेट लिए । १० ओभर बलिङ गरेका सन्दीपले ६६ रन खर्चिएर तीन विकेट लिएका थिए ।

दोस्रो खेलमा स्कटल्यान्डविरुद्ध पनि तीनै विकेट लिए । १० ओभर बलिङ गरेका सन्दीपले मात्र २७ रन खर्चिएर तीन विकेट लिन सफल भएका थिए । नामिबियाविरुद्ध तेस्रो खेलमा सन्दीपले १० ओभर बलिङ गर्दै ४६ रन खर्चिएर तीन विकेट लिएका थिए । स्कटल्यान्डविरुद्ध सिरिजको अन्तिम खेलमा सन्दीपले १० ओभर बलिङ गर्दै ४५ रन दिएर चार विकेट लिए ।

सन्दीपले उत्कृष्ट बलिङ मात्रै गरेनन्, विपक्षी खेलाडीलाई सस्तैमा समेट्दै नेपाललाई जितसमेत दिलाए । स्पिनरका रूपमा नेपालका सन्दीप मात्रै त्रिवि क्रिकेट मैदानमा चल्न सके । नेपाली टिमले सन्दीपलाई नै आफ्नो मुख्य हतियारका रूपमा प्रस्तुत गर्‍यो । यसअघि सधैँ स्पिनरलाई मुख्य प्राथमिकतामा राख्ने नेपाली टिमले यो पटक भने दुई खेलमा स्पिनरका रूपमा सन्दीपलाई मात्रै खेलाए । ललितनारायण राजवंशीले भने नामिबियाविरुद्धको पहिलो खेल र स्कटल्यान्डविरुद्धको अन्तिम खेलमा मात्रै मौका पाएका थिए ।

कुशल मल्ल

कुशल मल्ल नेपालका लागि राम्रा अलराउण्डरका रूपमा उदय हुन सक्ने प्रतिभावान खेलाडी हुन् । उनको ब्याटिङसँगै स्पिन पनि उत्तिकै सशक्त छ । चार खेलमा चारै जित नेपालले निकाल्दा कुशल मल्लको पनि महत्त्वपूर्ण भूमिका रह्यो । कुशलले यो सिरिजमा दुई अर्धशतकसमेत बनाए । पहिलो खेलमा नामिबियाविरुद्ध ६ रनमा आउट भए । बलिङतर्फ उनले एक विकेट लिए । कुशलले दोस्रो खेलमा स्कटल्यान्डविरुद्ध ८१ रन बनाउँदै नेपालको जितको मुख्य भागिदार बने ।

kushal malla1677065543.jpg

कुशलले दीपेन्द्रसिंह ऐरीसँग मिलेर छैटौँ विकेटका लागि १०० रनको साझेदारी गरेका थिए । बलिङतर्फ पनि उनले ९ ओभर बलिङ गर्दै एक ओभर मेडन राख्दै ४९ रन खर्चिएर दुई विकेट लिएका थिए । लगत्तै तेस्रो खेलमा नामिबियाविरुद्ध कुशल मल्लले फेरि अर्धशतक बनाए । २७५ रनको विजयी लक्ष्य पछ्याउने क्रममा नेपालका कुशल मल्लले ४९ बलमा ६ चौका र चार छक्कासहित ६२ रन बनाए । बलिङतर्फ उनले चार ओभर बलिङ गर्दै १९ रन खर्चिए तर विकेट लिन भने सकेनन् ।

चौथो खेलमा कुशलले स्कटल्यान्डविरुद्ध १७ रन बनाए । बलिङतर्फ भने उनले ६ ओभरमा ३० रन खर्चिएर एक विकेट लिए । चार खेलबाट उनले कुल १६६ रन बनाउँदा बलिङतर्फ चार विकेट लिए ।

करण केसी

करण केसीले स्कटल्यान्ड र नामिबियाविरुद्धको खेलमा राम्रो प्रदर्शन गरे । बलिङमा मात्रै नभएर उनी ब्याटिङमा पनि चम्किए । नामिबियाविरुद्धको पहिलो खेलमा नै पाँच विकेट लिएका करणले सबैको तारिफ पाए । बलिङ अलराउण्डर करणले १० ओभरमा एक मेडनसहित ६१ रन खर्चिएर पाँच विकेट लिए ।

karan kc1677065564.jpg

नामिबियाविरुद्ध ब्याटिङमा पनि करणले राम्रो गरे । आठौँ नम्बरमा ब्याटिङ गर्न आएका करणले मात्र १२ बलमा दुई छक्का र एक चौकासहित अविजित २० रन बनाएपछि नेपालको जित सम्भव भयो । दोस्रो खेलमा स्कटल्यान्डविरुद्ध ९ ओभर बलिङ गर्दै एक मेडनसहित ६८ रन खर्चिए । तेस्रो खेलमा नामिबियाविरुद्ध ९ ओभर बलिङ गर्दै ७४ रन खर्चिएका करणले एक विकेट लिए । चौथो खेलमा स्कटल्यान्डविरुद्ध करण केसी ब्याटिङ र बलिङ दुवैमा जमे । ८.१ ओभर बलिङ गरेका करणले ४२ रन खर्चिएर तीन विकेट लिए । ब्याटिङतर्फ पनि करणले अविजित ३१ रन बनाएपछि नेपालको जित सम्भव भयो । करण केसीले कप्तान रोहितसँग मिलेर ७५ रनको साझेदारी गर्दै स्कटल्यान्डविरुद्ध नेपाललाई दुई विकेटको जित दिलाएका थिए ।

दीपेन्द्रसिंह ऐरी

नेपालको शतप्रतिशत जितमा दीपेन्द्रले पनि उत्कृष्ट प्रदर्शन गरे । ब्याटिङ अलराउण्डरका रूपमा रहेका दीपेन्द्र नेपाली क्रिकेटका राम्रा खेलाडी हुन् । दीपेन्द्रले नामिबियाविरुद्धको पहिलो खेलमा सात रन मात्रै बनाए । आठ ओभर बलिङ गरेका दीपेन्द्रले २६ रन खर्चिए । तर, दोस्रो खेलमा स्कटल्यान्डविरुद्ध उत्कृष्ट ब्याटिङ गरे । उनले अविजित ८५ रन बनाउँदै नेपाललाई जिताए । ११६ बलको सामना गरेका दीपेन्द्रले आठ चौका र एक छक्का प्रहार गरेका थिए । बलिङतर्फ पनि उनले पाँच ओभर बलिङ गर्दै २५ रन खर्चिएर एक विकेट लिए ।

नामिबियाविरुद्धको तेस्रो खेलमा दीपेन्द्र एक रनमा आउट हुँदा १० ओभर बलिङ गर्दै एक मेडन राख्दै ३७ रन मात्रै दिए । चौथो खेलमा स्कटल्यान्डविरुद्ध दीपेन्द्रले सात रन बनाए । बलिङतर्फ पाँच ओभर बलिङ गर्दै २९ रन खर्चिए ।

कुशल भुर्तेल

त्रिवि क्रिकेट मैदानमा सम्पन्न त्रिदेशीय सिरिजमा नेपालका कुशल भुर्तेलले शतक बनाए । उनको यो शतक एकदिवसीय अन्तर्राष्ट्रिय क्रिकेटमा नेपालका खेलाडीले बनाएको चौथो शतक हो । यसअघि रोहितकुमार पौडेल, पूर्वकप्तान पारस खड्का र दीपेन्द्रसिंह ऐरीले शतक बनाएका थिए । कुशलले पहिलो खेलमा नामिबियाविरुद्ध शतक बनाए । उनकै शतकमा नेपालले नामिबियालाई हराउन सफल भयो । उनले ११३ बलमा १० चौका र चार छक्का प्रहार गर्दै ११५ रन बनाए ।

kushal bhurtel1677065649.jpg

त्यसपछिका खेलमा भने कुशलको प्रदर्शन बिर्सिन लायक रह्यो । स्कटल्यान्डविरुद्ध १६ रन बनाएका कुशलले बलिङतर्फ ६ ओभरमा २२ रन खर्चिएर एक विकेट लिए । कुशल तेस्रो खेलमा नामिबियाविरुद्ध एक रन र चौथो खेलमा स्कटल्यान्डविरुद्ध एक रनमै आउट भए ।

आशिफ शेख

विकेटकिपर ब्याटर आशिफ शेख नामिबियाविरुद्ध पहिलो खेलमा नै शून्यमा आउट भए । दोस्रो खेलमा स्टकल्यान्डविरुद्ध ९ रनमा पभिलियन फर्किएका आशिफले तेस्रो खेलमा नामिबियाविरुद्ध उत्कृष्ट ब्याटिङ गर्दै प्लेयर अफ द म्याच चुनिए ।

उनले तेस्रो खेलमा ८१ रन बनाए । उनकै उत्कृष्ट प्रदर्शनमा नेपालले नामिबियालाई हराउन सफल भयो । ९८ बलमा आठ चौका र दुई छक्का प्रहार गरेका आशिफले दोस्रो विकेटका लागि ज्ञानेन्द्र मल्लसँग १३९ रनको कीर्तिमानी साझेदारी गरे । चौथो खेलमा स्कटल्यान्डविरुद्ध आशिफ १२ रनमा आउट भए ।

ज्ञानेन्द्र मल्ल

ज्ञानेन्द्र मल्ल नेपाली टिमका भरपर्दा अनुभवी खेलाडी हुन् । राष्ट्रिय टिममा भएका सबैभन्दा सिनियर खेलाडी पनि ।पहिलो खेलमा नामिबियाविरुद्ध २५ रन बनाएका ज्ञानेन्द्रले दोस्रो खेलमा स्कटल्यान्डविरुद्ध चार मात्रै बनाए । तर, तेस्रो खेलमा नामिबियाविरुद्ध उनले अर्धशतक बनाए । उनले ७४ बलमा पाँच चौका र तीन छक्का प्रहार गर्दै ६५ रन बनाए । उनले अर्धशतक बनाउने क्रममा आशिफसँग १३९ रनको साझेदारी पनि गरेका थिए । चौथौ खेलमा स्कटल्यान्डविरुद्ध ज्ञानेन्द्र २१ रनमा आउट भए ।