स्कटल्यान्डमाथि नेपालको रोमाञ्चक जित, नेपालले जोड्यो चार खेलबाट आठ अंक

तस्वीर : सुशील श्रेष्ठ/शिलापत्र

A+ A A-

आईसीसी क्रिकेट विश्वकप लिग टु अन्तर्गत त्रिदेशीय सिरिजको अन्तिम खेलमा नेपालले स्कटल्यान्डलाई दुई विकेटले पराजित गरेको छ । योसँगै नेपालले त्रिदेशीय सिरिजमा चार खेलमा चारै खेल जित निकालेको हो ।

२१३ रनको चुनौती पछ्याउँदै जवाफी ब्याटिङ गरेको नेपालले ४१.१ ओभरमा आठ विकेटको क्षतिमा लक्ष्य भेट्टाएको हो । नेपालको जितमा कप्तान रोहितकुमार पौडेल र करण केसीले उत्कृष्ट प्रदर्शन गरे । कप्तान रोहितले १०१ बलमा ७ चौका र चार छक्का प्रहार गर्दै ९५ रनको योगदान दिए । यसैगरी करण केसीले ३७ बलमा दुई चौका र एक छक्का प्रहार गर्दै ३१ रन जोडे ।

यसअघि नेपालका ज्ञानेन्द्र मल्ल २१, कुशल मल्ल १७, आशिफ शेख १२, सन्दीप लामिछाने ९, दीपेन्द्रसिंह ऐरी सात, सोमपाल कामी दुई, सन्दीप जोरा र कुशल भुर्तेल समान १–१ रनमा आउट भए ।

स्कटल्यान्डका मार्क वाटले तीन र र क्रिस ग्रेभ्सले दुई विकेट लिएका छन् । ब्रान्डन म्याकमुलेन र माइकल लिस्कले समान १–१ विकेट लिएका छन् । यसअघि टियु क्रिकेट मैदानमा टस हारेर पहिले ब्याटिङ गरेको स्कटल्यान्डले ४६.१ ओभरमा सबै विकेटको क्षतिमा २१२ रन मात्रै बनाउन सकेपछि नेपालले मध्यम लक्ष्य पाएको थियो ।

स्कटल्यान्डका लागि जर्ज मन्जीले ६०, म्याथेव क्रोसलाई ४२, ब्रान्डन म्याकमुलेनले ३१, कायल कोएट्जरलले २२, क्रिस्टोफर म्याकब्राइडले २२, रन बनाए । नेपालका लागि सन्दीप लामिछानेले उत्कृष्ट बलिङ गरे । सन्दीपकै राम्रो बलिङमा स्कटल्यान्डका ब्याटर सस्तैमा समेटिए । सन्दीपले जर्ज मन्जी, कायल कोएट्जर, टोमस म्याकिनतोस, रिची बेरिङटनलाई आउट गराए । सन्दीपले १० ओभरमा ४५ रन खर्चिएर चार विकेट लिएका हुन् ।

त्यस्तै, करण केसीले तीन विकेट लिए । उनले ब्रान्डन म्याकमुलेन, मार्क वाट र माइकल लिस्कलाई आउट गराए । योसँगै करण केसीले एकदिवसीय अन्तर्राष्ट्रिय क्रिकेटमा ५० विकेट पूरा गरेका छन् । कुशल मल्ल र ललितनारायण राजवंशीले समान १–१ विकेट लिए ।

नेपालले अन्तिम खेलमा स्कटल्यान्डलाई पराजित गरेसँगै सिरिज क्लीन स्वीप गरेको हो । नेपालले चार खेलमा चारै खेल जित निकाल्दै महत्वपूर्ण आठ अंक बटुलेको छ । २८ खेलबाट नेपालको २६ अंक भएको छ । तर नेपाल अझै लिग टु को छैटौँ स्थानमा छ । यता, नेपालसँग लिग टु कै अन्तिम खेलमा पराजित भएपनि स्कटल्यान्ड च्याम्पियन बनेको छ । स्कटल्यान्डले आफ्नो कूल ३६ खेलबाट ५० अंक बनाएको छ ।

यता, दोस्रो स्थानमा रहेको ओमानको कूल ३६ खेलबाट ४४ अंक छ । तेस्रो स्थानमा रहेको नामिबियाको ३४ खेलबाट ३७ अंक छ । चौथो स्थानमा रहेको अमेरिकाको कूल ३६ खेलबाट ३५ अंक छ । यता, पाँचौँ स्थानमा रहेको यूएईको २६ खेलबाट २७ अंक छ । लिग टु को पुछारमा रहेको पपुवा न्युगिनीको २८ खेलबाट पाँच अंक मात्र छ ।

सबै तस्वीर: सुशील श्रेष्ठ/शिलापत्र