गृह मन्त्रालयले थाल्यो रिक्त पाँच एआईजीमा बढुवा प्रक्रिया, एक महिनापछि को बन्छन् नयाँ आईजीपी ?

गृह मन्त्रालयले थाल्यो रिक्त पाँच एआईजीमा बढुवा प्रक्रिया, एक महिनापछि को बन्छन् नयाँ आईजीपी ?

A+ A A-

नेपाल प्रहरीका थप एक जना अतिरिक्त महानिरीक्षक (एआईजी) ले अनिवार्य अवकाश पाएका छन् । एआईजी पूजा सिंहले आज (आइतबार) बाट एआईजीको ५६ वर्षे उमेर हदका कारण अवकाश पाएकी हुन् ।

यसअघि उमेर हदकै कारण चार जना एआईजीले अनिवार्य अवकाश पाएका थिए । योसँगै प्रहरीमा आठ एआईजीको दरबन्दी रहेकोमा तीन एआईजी मात्रै बाँकी छन् । एआईजी सिंहले अवकाश पाएसँगै पाँच एआईजीको दरबन्दी रिक्त भएको छ । एआईजीको ५६ वर्षे उमेर हदका कारण सबैभन्दा पहिलो हालका प्रहरी प्रमुख (आईजीपी) का ब्याची विश्वराज पोखरेलले अवकाश पाएका थिए ।

त्यसपछि क्रमश: मुकुन्द आचार्य, अरुणकुमार बीसी र रवीन्द्र धानुकले अवकाश पाएका थिए ।

पोखरेलले २० साउन, आचार्यले २३ भदौ, बीसीले १५ कात्तिक र धानुकले २५ कात्तिकमा अवकाश पाएका थिए । तर, रिक्त एआईजीको दरबन्दीमा सरकारले अझै बढुवा गरेको छैन । प्रहरी नियमावलीअनुसार प्रहरीमा रिक्त पद तीन महिनाभित्र बढुवा गरिसक्नुपर्ने व्यवस्था छ । तर, सरकारकै अनिच्छाका कारण अझै एआईजी बढुवा हुन सकेको छैन ।

प्रहरी स्रोतका अनुसार आईजीपी धीरजप्रताप सिंहले प्रहरीको ३० वर्षे सेवाहद हटाउने प्रस्ताव गर्दा एआईजी बढुवा थप अन्योलमा परेको हो । आईजीपी सिंह ३० वर्षे सेवा हदका कारण एक महिनापछि ११ चैतमा अनिवार्य अवकाशमा जाँदैछन् ।

प्रहरी प्रधान कार्यालयले भने योबीचमा आमनिर्वाचनका कारण बढुवा प्रक्रिया रोकिएको जनाएको छ । रोचक तथ्य के छ भने तीन एआईजीको दरबन्दी रहेको प्रहरीमा पाँच एआईजी थप आवश्यक रहेको भन्दै त्कालीन केपी शर्मा ओली नेतृत्वको सरकारले दुईवटा र शेरबहादुर देउवा नेतृत्वको सरकारले तीन दरबन्दी थप गरेर पाँच बनाएको थियो ।

तिनै दरबन्दी हाल रिक्त छन् ।

एआईजी बढुवा पेचिलो

गृह मन्त्रालयले ४ मंसिरको चुनाव सकिएलगत्तै आचारसंहित लागू रहेकै बेला रिक्त चार एआईजी बढुवा गर्ने भन्दै निर्वाचन आयोगसँग सहमति लिएको थियो ।

तर, उक्त सहमति कार्यान्वयन भने हुने सकेन । अहिले एआईजीमा बढुवा हुने ब्याचका प्रहरी अधिकारी नै ११ चैतपछि आईजीपीको प्रतिस्पर्धामा पुग्ने भएकाले पनि एआईजी बढुवा पेचिलो बनेको छ ।

सोही कारण आठ महिनासम्म बढुवा रोकिएको हो । तर, एआईजी पूजा सिंहले अवकाश पाएलगत्तै भने गृह मन्त्रालयले एआईजी बढुवा प्रक्रिया थालेको छ ।

एआईजी बढुवामा २०५१ चैत ५ र २०५२ भदौमा प्रहरी निरीक्षकमा भर्ना भएका टोलीहरू वसन्तबहादुर कुँवर, टेकप्रसाद राई, अशोक सिंह, दीपक थापा, श्यामलाल ज्ञवाली मुख्य प्रतिस्पर्धामा छन् ।

त्यस्तै, उनीहरूकै ब्याची सन्दीप भण्डारी, टेक तामाङ, किरण वज्राचार्य, उमेशराज जोशी, मीरा चौधरी, रामदत्त जोशी, भीम ढकाल, दुर्गा सिंह र किरण राणा पनि प्रतिस्पर्धामा छन् । जसमध्ये दीपक थापा, भीम ढकाल, टेक तामाङचाहिँ २०५२ भदौमा भर्ना भएका हुन् ।

प्रहरी नियमावलीअनुसार एआईजी बढुवा समितिमा गृह सचिवको अध्यक्षतामा प्रधानमन्त्री तथा मन्त्रिपरिषद् कार्यालयका सचिव सदस्य र आईजीपी सदस्य–सचिव रहने व्यवस्था छ ।

प्रकाशित मिति: आइतबार, फागुन ७, २०७९ १४:२८