आशिफ, ज्ञानेन्द्र र कुशलको अर्धशतकमा नामिबियाविरुद्ध नेपालको जित

A+ A A-

घरेलु टिम नेपालले आईसीसी क्रिकेट विश्वकप लिग टुअन्तर्गत त्रिदेशीय सिरिजमा नामिबियालाई सहज रुपमा पराजित गरेको छ ।

नेपालले नामिबियालाई तीन विकेटले पराजित गरेको हो । टियु क्रिकेट मैदानमा नामिबियाले दिएको २७५ रनको चुनौती पछ्याउँदै ब्याटिङ गरेको नेपालले ४७.३ ओभरमा सात विकेटको क्षतिमा लक्ष्य भेटायो ।

नेपालको जितमा आशिफ शेख, ज्ञानेन्द्र मल्ल र कुशल मल्लले अर्धशतक बनाए । ९ रन हुँदा कुशल भुर्तेललाई गुमाएको नेपालका लागि आशिफ शेख र ज्ञानेन्द्र मल्लले उत्कृष्ट साझेदारी गर्दै जिततर्फ लगेका थिए । आशिफ र ज्ञानेन्द्रले दोस्रो विकेटका लागि १३९ रनको साझेदारी गरेका थिए ।

आशिफले ९८ बलमा आठ चौका र दुई छक्काको मद्दतमा ८१ रन बनाए । आशिफको यो एकदिवसीय अन्तर्राष्ट्रिय क्रिकेटमा छैटौँ अर्धशतक हो । ज्ञानेन्द्रले ज्ञानेन्द्रले ७४ बलमा पाँच चौका र तीन छक्काको मद्दतमा ६५ रन बनाए । यो ज्ञानेन्द्रको एकदिवसीय अन्तर्राष्ट्रिय क्रिकेटमा सातौँ अर्धशतक हो ।

nepl vs nm1676718081.jpg

त्यस्तै, कुशल मल्लले ४९ बलमा ६ चौका र चार छक्का प्रहार गर्दै ६२ रन बनाए । कुशलको यो एकदिवसीय अन्तर्राष्ट्रिय क्रिकेटमा तेस्रो अर्धशतक हो । कुशलले यसअघि स्कटल्यान्डविरुद्ध अर्धशतक बनाएका थिए । त्यस्तै, कप्तान रोहितकुमार पौडेलले ३९ रनमा आउट भए । सोमपाल कामी आठ रनमा अविजित रहे । सन्दीप जोरा भने तीन रनमा आउट भए । कुशल भुर्तेल र दीपेन्द्रसिंह ऐरी समान १–१ रनमा आउट भए । बलिङतर्फ नामिबियाका रुबेन ट्रम्पलम्यानले तीन विकेट लिए ।

यसअघि टस हारेर पहिले ब्याटिङ गरेको नाििमबियाले निर्धारित ५० ओभरमा ६ विकेटको क्षतिमा २७४ रन बनाएपछि नेपालले प्रतिस्पर्धात्मक लक्ष्य पाएको हो । नामिबियाका लागि जान ग्रिनले उत्कृष्ट प्रदर्शन गरे । उनले अविजित ७५ रन बनाए । उनले ६३ बलमा ११ चौका र एक छक्का प्रहार गरे । त्यस्तै, पिकी फ्रान्सले ४९ रनमा आउट भए ।

नामिबियाका लागि लो ह्यान्ड्रे लोरेन्सलाई ४१, माइकल भान लिंगेन २२, कार्ल बिर्केनस्टोकले २०, जेर्हार्ड इरासमुस र जान निकोल लोफ्टिईले समान १५–१५ रन बनाए । जान ग्रिन र पिकी फ्रान्सले उत्कृष्ट ब्याटिङ गर्दै छैटौँ विकेटका लागि ९४ रनको साझेदारी गरे ।

सन्दीप लामिछानेले राम्रो बलिङ गर्दै तीन विकेट लिए । उनले १० ओभरमा ४६ रन खर्चिएर तीन विकेट लिए । नामिबियाले उत्कृष्ट सुरुआत गरेको थियो । ६४ रनमा नामिबियाले पहिलो विकेट गुमाएको थियो । नामिबियाका दुवै ओपनरलाई सन्दीपले आउट गराएपछि नेपाल खेलमा फर्र्किएको थियो । त्यस्तै, नेपालका करण केसीले एक विकेट लिए ।