स्कटल्यान्डविरुद्ध नेपालको रोमाञ्चक जित

A+ A A-

घरेलु टिम नेपालले आईसीसी क्रिकेट विश्वकप लिग टुअन्तर्गत त्रिदेशीय सिरिजमा स्कटल्यान्डमाथि रोमाञ्चक जित निकालेको छ । २७५ रनको चुनौती पछ्याउँदै ब्याटिङमा उत्रिएको नेपालले स्कटल्यान्डलाई तीन विकेटले पराजित गरेको हो ।

नेपालले ४७ ओभरमा सात विकेटको क्षतिमा लक्ष्य भेट्टायो । नेपालको जितमा दीपेन्द्रसिंह ऐरी र कुशल मल्ल नायक बने । नेपालले ७७ रन बनाउँदा महत्वपूर्ण पाँच विकेट गुमाएको थियो । कुशल भुर्तेल १६, आशिफ ९, रोहितकुमार पौडेल ६, सन्दीप जोरा ५ र ज्ञानेन्द्र मल्ल ४ रन बनाएर आउट भए ।

एकपछि अर्को विकेट गुमाएको नेपाल दबाबमा परेको थियो । त्यसो त पहिलो ओभरमा नै स्टकल्यान्डका क्रिस सोललाई चार चौका प्रहार गर्दै कुशल भुर्तेलले उत्कृष्ट सुरुवात गरेका थिए । पहिलो ओभरमै नेपालले २३ रन बटुल्न सक्यो । तर २.१ बलमा नै उही क्रिसको बलमा कुशल भुर्तेल आउट हुन पुगे । त्यसपछि नेपालको विकेट पतनको शृंखला सुरु भएको थियो ।

महत्त्वपूर्ण पाँच खेलाडी सस्तैमा समेटिँदा कुशल भुर्तेलले मात्रै दोहोरो अंक बटुलेका थिए । यसअघि नामिबियाविरुद्ध शतक बनाएका कुशल मात्रै होइन, नामिबियाविरुद्धको खेलमा ७२ रन बनाएका कप्तान रोहितकुमार पौडेलले पनि दोहोरो अंक जोड्न नसक्दा नेपाल हार्ने स्थितिमा थियो । तर, पाँचौँ नम्बरमा ब्याटिङ गर्न आएका कुशल मल्लले उत्कृष्ट प्रदर्शन गर्दै नेपालको खेल नै परिवर्तन गरिदिए ।

कुशल मल्लले दीपेन्द्रसिंह ऐरीसँग मिलेर छैटौँ विकेटका लागि सय रनको साझेदारी गरे । यो साझेदारी नै नेपालको जितको मुख्य आधार बन्यो । कुशल मल्ल ८१ रनमा आउट भएका थिए । कुशलले ६७ बलमा ९ चौका र चार छक्का प्रहार गर्दै ८१ रन बनाएका हुन् । कुशल मल्लको यो दोस्रो अर्धशतक पनि हो । यसअघि उनले त्रिवि क्रिकेट मैदानमै लिग टुकै खेलमा अमेरिकाविरुद्ध अर्धशतक बनाएका थिए ।

कुशल मल्ल आउट भएपछि नेपालको पारी दीपेन्द्रले सम्हाले । दीपेन्द्रले ११६ बलमा आठ चौका र एक छक्का प्रहार गर्दै अविजित ८५ रन बनाए । त्यस्तै, सोमपाल कामीले अविजित २४ र गुल्सन झाले १७ रन बनाए । स्कटल्यान्डका क्रिस सोल र मार्क वाटले समान ३–३ विकेट लिँदा माइकल लिस्कले एक विकेट लिए ।

टस जितेर नेपालले फिल्डिङ रोजेपछि ब्याटिङ गरेको स्कटल्यान्डले निर्धारित ५० ओभरमा ९ विकेटको क्षतिमा २७४ रन बनाएको थियो । स्कटल्यान्डका लागि माइकल लिस्कले शतक बनाए । उनले उत्कृष्ट ब्याटिङ ७९ बलमा ९ छक्का र तीन चौका प्रहार गर्दै शतक बनाए । खराब सुरुवात गरेको स्कटल्यान्डका लागि माइकलले उत्कृष्ट प्रदर्शन गर्दै उकासे । माइकल ८५ बलमा १०७ रनमा अविजित रहे । उनकै प्रदर्शनमा नेपालले चुनौतीपूर्ण लक्ष्य पाएको हो ।

त्यस्तै, ज्याक जर्भिसले २६ क्रिस्टोफर म्याकब्राइड, कप्तान रिचिइ बेरिङटन र ब्रानडन म्याकमुलेनले समान २२-२२ रन बनाए । मार्क वाटले २०, टोमस म्याकिनटोसले १९ र क्रिस ग्रिभ्सले १६ रन बनाए । बलिङतर्फ नेपालका सन्दीप लामिछानेले तीन विकेट लिए । उनले १० ओभरमा २७ रन खर्चिएर तीन विकेट लिएका हुन् ।

कुशल मल्लले ९ ओभरमा एक ओभर मेडन राख्दै ४९ रन खर्चिएर दुई विकेट लिए । सोमपाल कामी, कुशल भुर्तेल र दीपेन्द्रसिंह ऐरीले समान १–१ विकेट लिए । आईसीसी क्रिकेट विश्वकप लिग टुमा यो जितसँगै नेपालले २६ खेलबाट २२ अंक बनाएको छ । स्कटल्यान्ड भने तीन खेलअघि नै लिग टु च्याम्पियन बनिसकेको छ । स्कटल्यान्डले यसअघि नामिबियालाई १० विकेटले हराएको थियो ।

स्कटल्यान्डको ३४ खेलबाट ४८ अंक छ । दोस्रो स्थानमा रहेको ओमानको ३६ खेलबाट ४४ अंक हुँदा तेस्रो स्थानमा रहेको नामिबियाको ३२ खेलबाट ३७ अंक छ । चौथो स्थानमा रहेको अमेरिकाको कूल ३६ खेलबाट ३५ अंक हुँदा पाँचौँ स्थानको यूएईको २६ खेलबाट २७ अंक छ । नेपाल भने लिग टु को छैटौँ स्थानमा छ । पुछारमा रहेको पपुवा न्युगिनीको २८ खेलबाट पाँच अंक मात्रै छ ।

प्रकाशित मिति: शुक्रबार, फागुन ५, २०७९ १६:४१