मुम्बई अस्पताल जानुअघि चन्द्र भण्डारीले भनेका थिए- आमालाई पनि मसँगै भारत लैजानुपर्छ है

मुम्बई अस्पताल जानुअघि चन्द्र भण्डारीले भनेका थिए- आमालाई पनि मसँगै भारत लैजानुपर्छ है

A+ A A-

‘दाइको अनुहार देखाइदिनुस् न,’ नीलो रङको कपडामा पूरै बेरिएका उनलाई एम्बुलेन्समा राख्नका लागि हतारिइरहेका स्वास्थ्यकर्मी अनि ‘एक झलक हेर्न’ आत्तिएको भिड ।

कीर्तिपुरस्थित बर्न अस्पतालमा बुधबार रातिदेखि नै ओइरिइरहेका कार्यकर्ताहरू कांग्रेस नेता तथा सांसद चन्द्र भण्डारीको अनुहार ‘एक झल्को’ हेर्न अत्तालिइरहेका थिए । बिहीबार दिउँसोसम्म त्यहाँ थेगिनसक्नु भिड जम्मा भइसकेको थियो ।

विमानस्थलमा भण्डारीलाई मुम्बई लैजान पर्खिरहेको ‘एयर एम्बुलेन्स’सम्म पुर्‍याउनका लागि स्वास्थ्यकर्मी र प्रहरीलाई हम्मेहम्मे पर्‍यो ।

स्वास्थ्यलाभको कामना गर्न त्यहाँ पुगेका शुभेच्छुकहरूले उनको अनुहार देख्नै पाएनन् । नीलो कपडाले बेरिएका घाइते भण्डारीलाई राखेर भिडलाई छिचोल्दै एम्बुलेन्स तिखो साइरनमा विमानस्थलतिर बतासियो ।

मृत्युसँगसँगै बेडमा लडिरहेकी ८६ वर्षीया आमालाई छोडेर भारतमा उपचार गर्न जान नमानिरहेका भण्डारीलाई आफन्तहरूले धेरै बेर सम्झाए । आफन्तको त्यो करकापपछि मुम्बई जान तयार हुँदै गर्दा उनकी आमा हरिकला भण्डारीको प्राण आधाभन्दा धेरै जलिसकेको शरीरबाट उडिसकेको थियो ।

कसरी भयाे घटना ?

भण्डारी बुधबार दिउँसो संसद बैठकमा सहभागी भएका थिए । त्यसपछि बेलुकी पार्टीमा गएका उनी, साढे नौ बजेतिर घर फर्किएका थिए । भण्डारी बुद्धनगरस्थित भाइको घरमा भुई तलमा आमा हरिकलासँग बस्दै आएका थिए । सुत्ने तरखरमा थिए, उनी । आमा हरिमाया ग्यास गन्ध आरहेको भन्दै भान्साभित्र पसिन् । आमा भान्सामा पस्दै गर्दा भण्डारी पनि आमाका पछाडि लागेर भान्सामा छिरे ।

अध्याँरो थियो । भण्डारीले ‘स्विच अन’ गरे । बत्ती बल्न नपाउँदै कोठाभरि आगो दन्कियो । स्वीच अन गर्दा आएको स्पार्कका कारण आगो लागेको हुन सक्ने प्रहरीको प्रारम्भिक अनुसन्धानले देखाएको छ । भण्डारीले आफूभन्दा अगाडि रहेकी आमालाई बचाउन खोजे । तर, आमा छोरा दुवै जना घाइते भए ।

घाइते भएका उनीहरूलाई उपचारका लागि सुरुमा बानेश्वरस्थित सिभिल अस्पताल पुर्‍याइएको थियो । सिभिल अस्पतालले बुधबार राति नै कीर्तिपुर अस्पताल रिफर गरेको थियो । अस्पतालले प्राथमिक र प्रारम्भिक उपचारपछि दुवै जनालाई आईसीयूमा राखेर उपचार सुरु गरेको थियो । भण्डारीको अनुहार, दुवै हात र दुवै खुट्टा गरी २५–३० प्रतिशत र आमाको शरीरको अधिंकाश भाग गरी ७० प्रतिशत जलेको अस्पतालले जनाएको थियो ।

‘उपचारका लागि आमालाई पनि लैजानुपर्छ’

अस्पतालले बिहीबार बिहान दुवै जनाको श्वासनलीमा तातो हावा र धुवाँको कारणले जलन भएको हुन सक्ने सम्भावना अत्यधिक भएको भन्दै स्रोतसाधनको कमी हुँदा नेपालमा उपचार गर्न सम्भव नहुने भएकाले देशबाहिर उपचारका लागि लैजान सिफारिस गरेको थियो ।

तर, भण्डारी देशबाहिर उपचारका लागि जना तयार भएनन् । उनी नेपालमै उपचार गराउने अडान लिइरहेका थिए । आफन्तले सम्झाइ बुझाइ गरेपछि बल्लतल्ल उनी राजी भएको भण्डारीकी कान्छी आमा मुना भण्डारीले बताइन् ।

भण्डारी राजी भएपछि उनलाई उपचारका लागि भारतको नेसनल बर्न सेन्टरमा लिने निर्णय भएको थियो ।

भण्डारीसँगै आईसीयूमा उपचार भइरहेको थियो, आमाको । उनले आफूलाई उपचारका लागि भारत जाने भएपछि आमालाई पनि उपचारका लागि सँगै लाने व्यवस्था गर्न भनेका थिए । एक नेताले भने, ‘चन्द्र दाइले आफूसँगै आमालाई पनि उपचारका लागि लैजानुपर्छ भन्नुभएको थियो ।’

भण्डारीको भनाइलाई उद्धत गर्दै उनले भने, 'आमालाई मसँगै भारत लैजानुपर्छ है, दुवैजनाकाे सँगै जाने व्यवस्था गर्नू ।’

परिवारका सदस्यले उनको कुरामा सहमति जनाएका थिए । आफूसँगै आमालाई लैजाने भनेपछि उनी आमाछोरा नै निको हुने आशावादी बनेका थिए ।

तर, भण्डारीको आमा छोरा निको हुने सपना अधुरै रह्यो । उपचारका लागि भारत उड्नुभन्दा पहिला नै भण्डारीकी आमाले प्राण त्यागिन् । बिहान १० बजेर ५७ मिनेटमा उनको निधन भएको अस्पतालले जनाएको छ ।

यो कुरा भने भण्डारीले पत्तो पाएका छैनन् । आमा सकुशल छन्, उनलाई लागेको छ । देह त्यागिसकेकी आमालाई अस्पतालमै छोडेर थप उपचारका लागि दिउँसो सवा ३ बजे श्री एयर ‘एयर एम्बुलेन्स’ मार्फत मुम्बई उडेका छन् ।

प्रकाशित मिति: बिहीबार, फागुन ४, २०७९ २०:१०