निजगढ–काठमाडौं फास्ट ट्र्याकको विकल्पमा तीन जिल्लाले नयाँ द्रुतमार्ग बनाउँदै

निजगढ–काठमाडौं फास्ट ट्र्याकको विकल्पमा तीन जिल्लाले नयाँ द्रुतमार्ग बनाउँदै

A+ A A-

निर्माणाधीन काठमाडौं–निजगढ फास्ट ट्रयाक (द्रुतमार्ग) नजिकैबाट हुने गरी चारवटा गाउँपालिकाले नयाँ द्रुतमार्ग निर्माणको परिकल्पना गरेका छन् । एउटा नयाँ सडक निर्माण हुँदा तराईको सर्लाही र रौतहटसँगै बागमती प्रदेशको मुकाम हेटौँडा पुग्न छिटो हुने भएपछि काभ्रे, ललितपुर र मकवानपुरका चारवटा गाउँपालिकाले नयाँ द्रुतमार्गको योजना अघि सारेका छन् ।

बनेपादेखि मकवानपुरको पूर्वी क्षेत्रस्थित बागमती गाउँपालिकाको फापरबारी बजारसम्म करिब ७० किलोमिटरको नयाँ द्रुतमार्ग निर्माणका लागि गाउँपालिकाहरूले डीपीआर बनाएर संघीय सरकारलाई बुझाउने तयारी गरेका छन् ।

बेथानचोक गाउँपालिका काभ्रे, ललितपुरको महाङ्काल गाउँपालिका र बागमती गाउँपालिका, मकवानपुरको पूर्वी क्षेत्रस्थित बागमती गाउँपालिका गरी चारवटा स्थानीय तहले सडक निर्माणलाई साझा योजनाका रुपमा अगाडि बढाउने निर्णय गरेका छन् । केही दिनअघि मकवानपुरको बागमती गाउँपालिकामा चारवटा पालिकाको छलफलबाट आ–आफ्नो क्षेत्रमा सडकको डीपीआर गर्ने सहमति भएको हो । उक्त निर्णयअनुसार सम्बन्धित गाउँपालिकाले आफ्नो क्षेत्रभित्र दुई लेनको सडकको डीपीआर बनाउनुपर्नेछ ।

सडकको सुरुवाती बिन्दु काभ्रेको बनेपा र अन्तिम बिन्दु मकवानपुरको फापरबारी बजार हुनेछ । फापरबारी बजार धरान–चतरा सडक मार्गसँग जोडिएको छ । फापरबारीबाट धरान–चरता सडक हुँदै करिब आधा घण्टाको दूरीमा नेपाली सेनाबाट निर्माणाधीन काठमाडौं–तराई फास्ट ट्र्याक पुग्न सकिन्छ । निर्माणाधीन फास्ट ट्र्याक मकवानपुर र ललितपुरमै पर्छ । तर, फास्ट ट्र्याक निर्माणको टुंगो नभएपछि तीन जिल्लाका चार पालिकाले नयाँ द्रुतमार्गको काम अगाडि बढाउने योजना बनाएका हुन् ।

नयाँ द्रुतमार्ग निर्माण भएपछि बनेपाबाट छुटेका सवारीसाधनलाई तराई पुग्न हेटौँडा गएर घुम्नु नपर्ने र फापरबारीबाट पूर्वतर्फ मकवानपुरको बागमती गाउँपालिका राईगाउँ हुँदै सर्लाही र रौतहटको सिमानास्थित पूर्व–पश्चिम राजमार्ग पुग्न सकिने महाङ्काल गाउँपालिका अध्यक्ष गणेशबहादुर केसीले शिलापत्रलाई जानकारी दिए ।

नयाँ द्रुतमार्गको परिकल्पनाअनुसार बनेपा–पनौती–ढुंखर्क–च्याम्राराङ्बेँसी–ठूलादुर्लुङ–फापरबारी–धरान चतरा जोड्ने सडक निर्माण भएपछि तराई–काठमाडौं फास्ट ट्र्याकको समेत सवारीसाधन घट्ने देखिन्छ । त्यति मात्र नभई धुलिखेल सिन्धुली हुँदै बर्दीबास पुगिने बीपी राजमार्गको वैकल्कि मार्गका रूपमा नयाँ द्रुतमार्ग प्रयोगमा आउने सम्भावना देखिएको छ । दोलखा, रामेछाप सिन्धुली र काभ्रेका बासिन्दालाई तराई र हेटौँडा पुग्न बीपी राजमार्गहुँदै सिन्धुलीबाट धरान–चतारा सडक खण्ड प्रयोग गर्नुपर्ने बाध्यता छ ।

ललितपुरका बासिन्दालाई तराई पुग्न हेटौँडा–काठमाडौं जोड्ने छोटो मार्ग वा बीपी राजमार्ग प्रयोग गर्नुको विकल्प छैन । तराई वा हेटौँडा जता जाँदा पनि अत्यधिक लामो सडक यात्रा गर्नुपर्ने भएपछि चारवटा गाउँपालिकाले साझा योजनाका रुपमा नयाँ द्रुतमार्ग निर्माण गर्ने निर्णय गरेको महाङ्काल गाउँपालिका अध्यक्ष केसी बताउँछन् ।

बागमती गाउँपालिकाको फापरबारी बजारबाट बेतिनी हुँदै ललितपुरको महाङ्काल गाउँपालिका र काभ्रेको बेथानचोक गाउँपालिकादेखि बनेपासम्म करिब ७० किलोमिटरको सडक निर्माण हुने केसीले शिलापत्रसँग बताए । मकवानपुरतर्फ बागमती गाउँपालिकाले र मकवानपुरसँग सिमाना जोडिएको ललितपुरबाट काभ्रेसम्मको डीपीआर त्यहाँस्थित पालिकाहरूले भूगोल निर्धारण गरेर डीपीआर निर्माण गर्ने निर्णय भएको अध्यक्ष केसीले जानकारी दिए ।

अध्यक्ष केसीका अनुसार फापरबारीदेखि ललितपुर सिमानासम्म सडकको ट्र्याक बनिसकेको छ । ललितपुरको महाङ्काल गाउँपालिका वडा नम्बर ६ मा करिब ७ किलोमिटर क्षेत्रमा नयाँ ट्र्याक खोल्न बाँकी रहेको अध्यक्ष केसीले बताए । गाउँपालिकाले छिट्टै नयाँ ट्रयाक खोल्ने उनले जानकारी दिए । सडकलाई स्तरोन्नति गर्दै दुई लेनमा कालोपत्रे गरिने उनी बताउँछन् । चारवटै पालिकाले डीपीआर बनाएर संघीय सरकारलाई आवश्यक बजेट व्यवस्थाका लागि माग गरिने केसीले जानकारी दिए ।

‘नयाँ द्रुतमार्ग बनाउन सके काभ्रे र ललितपुरवासीलाई मकवानपुरको बागमती गाउँपालिकाको राईगाउँहुँदै सर्लाही पुग्न निकै छोटो पर्छ,’ उनले भने, ‘धरान–चतरा सडकखण्डबाट हेटौँडा पुग्न पनि नजिक हुन्छ ।’ भित्री द्रुतमार्गको योजनाअनुसार बेथानचोक गाउँपालिकाले आफ्नै स्रोतबाट सडकको स्तरोन्नति गर्न सुरु गरिसकेको छ । बेथानचोकको मुसेखोल्सा–चलाल गणेशस्थान सडकखण्डको स्तरोन्नति सुरु भएको गाउँपालिका अध्यक्ष भगवान् अधिकारीले जानकारी दिए ।

बनेपादेखि काभ्रे–ललितपुरको सिमानासम्म सडक राम्रो भएको जनाइएको छ । महाङ्काल गाउँपालिका अध्यक्ष केसीका अनुसार ट्रयाक खुलिसकेका क्षेत्रमा सडक स्तरोन्नति गर्दै दुई लेनको कालोपत्रे गरिने भएको हो । ‘ललितपुरमा करिब ७ किलोमिटरबाहेक फापरबारीदेखि बनेपासम्म सडकको ट्र्याक खुलिसकेको छ । अब पुरानै ट्र्याकलाई स्तरोन्नति गर्दै कालोपत्रे गर्नुपर्ने हुन्छ । ललितपुरमा हामी छिट्टै नै ट्र्याक खोलेर स्तरोन्नति अगाडि बढाउँछौँ,’ केसीले शिलापत्रसँग भने ।

प्रकाशित मिति: बिहीबार, फागुन ४, २०७९ १४:००