सांसद अरुण चौधरीको मुद्दामा अन्तिम सुनुवाइ सकियो

A+ A A-

कैलाली कारागारमा थुनामा रहेका प्रतिनिधिसभाका निलम्बित सांसद अरुण चौधरीको मुद्दामा अन्तिम सुनुवाइ सकिएको छ । कैलाली बार एशोसियसनको कक्षमा राखिएको श्रव्यदृष्य संवाद कक्षमा रहेको श्रव्यदृष्यबाट चौधरीले आज बयान दिएका हुन् ।

बुधबार उच्च अदालत दिपायलका न्यायाधीशद्वय देशबहादुर सार्की र गणेश ठाकुरको इजलासमा उक्त मुद्दाको सुनुवाइ भएको हो ।

'मैले न्याय पाउनुपर्छ । मैले त्यो फैसलाबारे जानकारी नै पाएको थिएन । हजुरहरूकै मिडियामार्फत् मलाई मुद्दा छ भन्ने थाहा पाएँ,’ चौधरीले भने, ‘म कैलाली आउँदै थिए । मलाई अपहरणको शैलीमा बाटोमा समातियो ।’

माघ २९ गते उच्च अदालतले कारागार कार्यालयमा थुनामा रहेका चौधरीलाई कैलाली जिल्ला अदालतमा रहेको श्रव्य दृश्य संवाद कक्षमा उपस्थित गराउन आदेश दिएको थियो । उच्च अदालतले सरकारी वकिलको कार्यालय कैलालीलाई लिखित जवाफ पेस गर्न र चौधरीलाई बयान दिन बुधबार उपस्थित गराउन भनिएको थियो ।

ट्याक्टर जलाएको भन्दै २०७० वैशाख ९ गते कैलाली जिल्ला अदालतले चौधरीसहित तीन जनाविरुद्ध जनही ६ महिना कैद र ८ लाख १८ हजार ४२३ रुपैयाँ पीडितलाई उपलब्ध गराउने फैसला गरेको थियो । ६ महिना कैद भुक्तान नगरेको भन्दै चौधरीलाई प्रहरीले माघ १९ गते बाँकेबाट पक्राउ गरेको थियो । पक्राउ परेपछि उनी सांसदबाट निलम्बित भएका छन् ।

बहसपछि केही समयमा आदेश आउन सक्ने बताइएको छ ।

प्रकाशित मिति: बुधबार, फागुन ३, २०७९ १७:४४