नेपालबाट थाइल्याण्ड चरेस पठाउने तस्करको खोजीमा ब्युरो, यसअघि पनि हुन्थ्यो तस्करी

नेपालबाट थाइल्याण्ड चरेस पठाउने तस्करको खोजीमा ब्युरो, यसअघि पनि हुन्थ्यो तस्करी

A+ A A-

प्रहरीको लागुऔषध नियन्त्रण ब्युरो कोटेश्वरको टोलीले त्रिभुवन विमानस्थलबाट करिब २३ किलो लागुऔषध चरेससहित चार जना थाइ नागरिकलाई पक्राउ गर्‍यो । नेपालबाट लागुऔषध चरेस थाइल्याण्ड लैजान लागेको विशेष सूचनाका आधारमा खटिएको ब्युरोको टोलीले उनीहरूलाई त्रिभुवन अन्तर्राष्ट्रिय विमानस्थलबाट पक्राउ गरेको हो ।

ब्युरोका प्रमुख प्रहरी वरिष्ठ उपरीक्षक (एसएसपी) विकास खनालका अनुसार उनीहरू त्रिभुवन विमानस्थलको डिपाचर कक्षबाट पक्राउ परेका हुन् । पक्राउ परेका थाइ नागरिकहरू थाइ एयरलाइन्सको उडानमार्फत बैंकक जान लागेका थिए ।

पक्राउ पर्नेमा एबी ३६८०६२६ नम्बरको पासपोर्ट भएकी ४८ वर्षीया यवालुक जुएबश्री, एडी ०२८१३७३ नम्बरको पासपोर्ट भएकी ४२ वर्षीया परिचर्त पमप्रुक, एडी ०२३०९५८ नम्बरको पासपोर्ट भएका २५ वर्षीय नतापोल त्रिचेइया र एडी ०२३०९५८०२१९३३१ पासपोर्ट भएकी १९ वर्षीया नतनरे त्रिचेइया छिन् ।

एसएसपी खनालका अनुसार लगेजभित्र फल्सबटम बनाएर लुकाइछिपाइ बैंकक लिन खोज्दा पक्राउ उनीहरू परेका हुन् । पक्राउ परेका चारै जना थाइ नागरिक दुई दिनअघि मात्रै नेपाल आएको खुलेको छ । प्रहरीका अनुसार पक्राउ परेकी ४८ वर्षीया यवालुक जुएबश्री, २५ वर्षीय नतापोल त्रिचेइया र १९ वर्षीया नतनरे त्रिचेइया भने पहिलोपटक नेपाल आएको खुलेको छ । त्रिचेइयाद्वय दाजु बहिनी हुन् भने जुएबश्री सौतिने आमा ।

पक्राउ परेकी अर्की पमप्रुक भने यसअघि पनि नेपाल आएको खुलेको छ । उनकै योजनामा यवालुक जुएबश्री नेपाल आएको अनुमान प्रहरीको छ । प्रहरीसँगको वयानका क्रममा उनीहरूले लगेजभित्र लागुऔषध रहेको आफूहरूलाई थाहा नभएको बताएका छन् ।

ब्युरोका एसएसपी खनालले भने, ‘उनीहरूले आफूले बोकेको लगेजभित्र लागुऔषध चरेस राखिएकोबारे जानकारी नभएको वयान दिएका छन् । बैंकक पुगेपछि यो अर्को मान्छेलाई दिनु भनेकाले आफूहरूले लिएको र बाँकी थाहा नभएको भनेका छन् ।’

प्रहरीसँग उनीहरू थाइ भाषाबाहेक अंग्रेजीमा पनि बोल्न नसक्ने भएपछि अनुसन्धानमा केही कठिनाइ भएको छ । अनुसन्धानमा खटिएका प्रहरीका अनुसार उनीहरूसँग चरेस थाइल्याण्ड पठाउने समूह भने नेपाली रहेको खुलेको छ ।अनुसन्धानमा संलग्न एक प्रहरी अधिकारीले भने, ‘थाइ नागरिकलाई चरेस पठाउने लागुऔषधका तस्कर नेपाली नै हुन् । ती व्यक्तिले थाइ नागरिक बसेको होटलबाहेक अन्यत्र नै लगेजभित्र चरेस प्याक गरेको देखिन्छ । ती नेपालीबारेको केही क्लु हामीले फेला पारेका छौँ ।’

पछिल्लो समय अन्तर्राष्ट्रिय गिरोहले खैरो हिरोइनसहित विभिन्न प्रकारका लागुऔषध त्रिभुवन विमानस्थलबाट नेपाल भित्र्याउँदै आएको छ । नेपालमै उत्पादित चरेस विदेश पठाउन लागेको यो पहिलोपटक भने होइन । तर, २०७० यता त्रिभुवन विमानस्थलमै यति ठूलो परिमाणको चरेस फेला परेको थिएन ।

यसअघि नयाँबानेश्वरस्थित एभरेष्ट होटलका तत्कालीन सञ्चालक मस्कुर अहमद लारीले नेपालबाट पहिलोपटक चरेस विदेश पठाउने गरेको खुलेको थियो । २०५५ सालमा त्रिभुवन अन्तर्राष्ट्रिय विमानस्थल हुँदै लारीले २ सय ५० किलो चरेस जर्मनीको फ्र्यांफर्ट विमानस्थल पठाएको खुलेको थियो । उक्त चरेस जर्मन प्रहरीले विमानस्थलबाट नै बरामद गरेको थियो ।

जर्मन दूतावाससमेतको जाहेरीमा प्रहरीले अनुसन्धान गर्दा मस्कुर अहमद लारी पनि लागुऔषध कारोबारी भएको खुलेको थियो । सोही अभियोगमा लारी २५ माघ २०७४ मा काठमाडौंबाट पक्राउ परेका थिए ।

प्रकाशित मिति: बुधबार, फागुन ३, २०७९ १४:२०