कुशलको शतकमा नामिबियामाथि नेपालको ऐतिहासिक जित (भिडियो)

तस्वीर: सुशील श्रेष्ठ/शिलापत्र

A+ A A-

आईसीसी क्रिकेट विश्वकप लिग टु अन्तर्गत त्रिकोणात्मक सिरिजमा नेपालले नामिबियालाई दुई विकेटले पराजित गरेको छ ।

त्रिवि क्रिकेट मैदानमा मंगलबार भएको खेलमा नेपालले नामिबियालाई दुई विकेटले पराजित गरेको हो । नामिबियाले दिएको २८६ रनको चुनौती पछ्याउँदै ब्याटिङ गरेको नेपालले ४७.४ ओभरमा आठ विकेटको क्षतिमा लक्ष्य भेट्टाएको हो ।

यो एकदिवसीय अन्तर्राष्ट्रिय क्रिकेटमा नेपालले बनाएको सर्वाधिक रन पनि हो । यसअघि पपुवा न्युगिनीविरुद्ध नेपालले २८६ रन बनाएको थियो । नेपालका लागि कुशल भुर्तेलले ९९ बलमा शतक बनाए । उनकै उत्कृष्ट प्रदर्शनमा नेपालले जित निकालेको हो । शतक बनाउने क्रममा उनले ९ चौका र चार छक्का प्रहार गरे ।

एकदिवसीय अन्तर्राष्ट्रिय क्रिकेटमा उनको यो पहिलो शतक हो । कुशलले ११३ बलमा १० चौका र चार छक्काको मद्दतमा ११५ रन बनाएर आउट भए । त्यस्तै, नेपालका लागि कप्तान रोहितकुमार पौडेलले ७२ रन बनाए । कप्तान रोहितले ७६ बलमा सात चौका र तीन छक्का प्रहार गर्दै ७२ रन बनाए ।

२७ रन हुँदा रोहितले जीवनदान पाएका थिए । त्यसपछि ३९ मा फेरि उनले दोस्रो पटक जीवनदान पाए । रोहितले छैटौँ अर्धशतक बनाए । उनी एकदिवसीय अन्तर्राष्ट्रिय क्रिकेटमा हजार रन पूरा गर्ने पहिलो नेपाली खेलाडी पनि बने । कुशल र रोहितले १३३ रनको साझेदारी गरेपनि नेपाल जिततर्फ अग्रसर बनेको थियो ।

त्यस्तै, सन्दीप जोराले २४ बलमा २८ रन बनाए । ज्ञानेन्द्र मल्लले २५ रन बनाएर आउट भए । ज्ञानेन्द्रले ३५ बलमा चार चौका प्रहार गरे । तर उनी लोफ्टिइ इटोनको बलमा एलबीडब्लु आउट भएका थिए । करण केसीले २० रन बनाए । दीपेन्द्रसिंह ऐरी सात र कुशल मल्ल ६ रनमा आउट हुँदा ओपनर आशिफ शेख भने खाता नै नखोलेर पभिलियन फर्किए ।

यसअघि टस हारेर ब्याटिङ गरेको नामिबियाले निर्धारित ५० ओभरमा सबै विकेट गुमाएर २८५ रनको योगफल तयार पारेको थियो । नामिबियाले खराब सुरुवात गरे पनि उत्कृष्ट प्रदर्शन गर्दै नेपाललाई राम्रो लक्ष्य दिएको थियो । नामिबियाका लागि माइकल भान लिंगनले शतक बनाए । उनले शतकसहित १३३ रन बनाए । उनलाई करण केसीले आउट गराए । त्यस्तै, कप्तान जेरहार्ड इमासमुसले पनि अर्धशतक बनाए । कुशल मल्लको बलमा सन्दीपबाट क्याचआउट हुनुअघि उनले ५६ रन बनाए ।

बलिङतर्फ नेपालका करण केसीले पाँच विकेट लिए । उनले १० ओभरमा ६१ रन खर्चिएर पाँच विकेट लिएका हुन् । सन्दीप लामिछानेले तीन विकेट लिए । सन्दीपले १० ओभर बलिङ गर्दै ६६ रन खर्चिएर तीन विकेट हुन् । त्यस्तै, सोमपाल कामी र कुशल मल्लले समान १–१ विकेट लिए ।