डीएसपी विष्टको कमजोर कमाण्ड: प्रहरीकै गाडी जल्दा पनि गरेका थिएनन् माथिल्लो निकायलाई रिपोर्टिङ

डीएसपी विष्टको कमजोर कमाण्ड: प्रहरीकै गाडी जल्दा पनि गरेका थिएनन् माथिल्लो निकायलाई रिपोर्टिङ

A+ A A-

सोमबार दिउँसो एकाएक बालाजु माछापोखरी क्षेत्र अशान्त बन्यो । प्रहरी र यातायात मजदुरबीच उत्पन्न विवाद साम्य नहुँदा स्थिति तनावग्रस्त बनेको थियो । ट्राफिक नियमको विरोध गर्दै यातायात मजदुरहरूले अवरुद्ध पारेको सडक प्रहरीले हस्तक्षेप गरेर खोल्न खोज्दा मजदुर आक्रोशित भएका थिए ।

सोमबार दिउँसो १ देखि साँझ ५ बजेसम्म माछापोखरी क्षेत्र अशान्त बन्यो । विवाद चर्किंदै गएपछि यतिसम्म पुग्यो कि आन्दोलनरत मजदुरहरूले बालाजु प्रहरी वृत्तका प्रमुख प्रहरी नायब उपरीक्षक (डीएसपी) रविन विष्ट सवार बा २ झ १४४ नम्बरको स्कार्पियोसहित दुईवटा गाडीमा आगजनी नै गरे ।

मजदुरहरूले आगजनी गरेका प्रहरीका दुवै गाडी पूर्ण रूपमा ध्वस्त भएका छन् । यातायात मजदुरले आन्दोलन यत्तिमै सीमित गरेनन्, मंगलबार बिहानसम्म देशभरका यातायात मजदुरहरूले सार्वजनिक यातायात नचलाउने निर्णयसमेत गरेका थिए ।

बिहान ९ बजेदेखि सिंहदरबारमा यातायात व्यवसायी उपप्रधान तथा भौतिक यातायातमन्त्री नारायणकाजी श्रेष्ठसँगको वार्तापछि भने सवारी सञ्चालन गर्ने सहमतिमा पुगेका छन् । ट्राफिक प्रहरीले ट्राफिक नियम उल्लंघन गर्दा न्यूनतम लाग्ने जरिवाना पाँच सय रुपैयाँबाट एकैपटक १ हजार ५ सय रुपैयाँ पुर्‍याएपछि मजदुरहरू आन्दोलित बनेका हुन् ।

डीएसपी विष्टको कमजोर कमाण्ड

मजदुर संघले बालाजु क्षेत्र मात्रै होइन, चक्रपथ सडकखण्डका विभिन्न ठाउँमा सवारी तेस्राएर सडक अवरोध गरेको थियो । अन्य ठाउँमा सामान्य विरोध प्रदर्शन भए पनि बालाजु माछापोखरीमा भने प्रदर्शन हिंसात्मक बन्न पुग्यो ।

त्यसको मुख्य कारण कमजोर प्रहरी कमाण्ड हो । प्रदर्शन नियन्त्रणका लागि बालाजु प्रहरी प्रमुख डीएसपी रविन विष्ट आफैँ फिल्डमा खटिएका थिए । तर, उनकै कमाण्डमा रहेको प्रहरीमाथि मजदुर आक्रोशित हुन पुगे । प्रहरीले मजदुरमाथि जबर्जस्त बल प्रयोग गर्न खोजेको र डीएसपी विष्टले शालिनता नअपनाउँदा माछापोखरी क्षेत्र अशान्त बन्न पुगेको हो ।

प्रदर्शनमा उत्रिएका मजदुरहरूले डीएसपी चढेको गाडीमै आगजनी गरेपछि डीएसपी विष्टसहित दर्जन प्रहरीले भागेर ज्यान जोगाए । मंगलबार बिहान उपत्यका प्रहरी कार्यालय रानीपोखरीले डीएसपी विष्टलाई जिम्मेवारीबाट हटाइसकेको छ ।

बालाजु प्रहरीले स्थिति नियन्त्रण गर्न नसकेपछि काठमाडौं प्रहरी परिसरका एसपी सिताराम रिजालसहितको टोली नै माछापोखरी पुग्यो । तर, स्थिति झन् उग्र बन्दै गएपछि सशस्त्र प्रहरी बलको टोलीसमेत मगाउनुपरेको थियो । प्रहरीले केही सेल अश्रुग्यास पनि प्रहार गरेको थियो । काठमाडौं प्रहरी परिसरका प्रवक्ता एसपी रिजालले घटनाबारे र प्रहरीको कमजोरीबारे छानबिन भइरहेको बताए ।

‘प्रहरीकै गाडी र त्यसमा पनि डीएसपीकै गाडी तोडफोड हुँदासम्म पनि त्यसको रिपोर्टिङ हामीले पाएनौँ । त्यस कारण पनि गाडीमा क्षति भयो । प्रहरीको कमजोरीबारे हामी छानबिन गर्दैछौँ,’ एसपी रिजालले भने । प्रहरीका पूर्वडीआईजी हेमन्त मल्लले पनि प्रहरीले प्रदर्शनको अवस्थाको विश्लेषणमा प्रहरी चुकेको बताए ।

‘प्रदर्शनको अवस्था हेरेर प्रहरी अघि बढ्नुपर्ने हो । हिजोको घटनामा त्यो देखिएन,’ मल्लले शिलापत्रसँग भने । बालाजु प्रहरी प्रमुख डीएसपी विष्टमाथि प्रदर्शनकारी यसरी भौतिक आक्रमणमै उत्रिएको यो पहिलो घटना भने होइन । यसअघि २५ मंसिरमा तारकेश्वर नगरपालिकाका सविन फुयाँलको मृत्यु प्रकरणमा समेत प्रहरीले अनुसन्धानमा लापरबाही गरेको भन्दै बालाजु प्रहरी वृत्तअगाडि पीडित परिवारले आन्दोलन नै गरेका थिए ।

उक्त घटनामा समेत प्रदर्शनकारीले प्रहरीको मोटरसाइकल नै जलाएका थिए । जिम्मेवारीबाट हटाइएका विष्ट यसअघि कारबाहीमा परेका अधिकारी हुन् । रुपन्देहीकाे बेलैया प्रहरी कार्यालयमा हुँदा थुनुवासँग रकम लिएकाे खुलेपछि विष्ट विभागीय कारबाहीमा परेका थिए ।

प्रकाशित मिति: मंगलबार, फागुन २, २०७९ १३:१६